Bakı, 5 iyul, Emil Məlikov, AZƏRTAC

Azərbaycan Dövlət Gənc Tamaşaçılar Teatrında 95-ci mövsümdə altı tamaşanın premyerası olub. Bu mövsüm ərzində ilk premyera Əməkdar incəsənət xadimi Mehriban Ələkbərzadənin müəllifi və quruluşçu rejissoru olduğu repressiya illərində dəhşətli cəzalara məruz qalmış ziyalılarımızın həyat yoldaşlarının sürgündəki məşəqqətlərindən bəhs edilən “Kod adı: V.X.A” tamaşası olub. Sonra müharibədə yeganə oğlunu itirmiş qadından bəhs edən və quruluşçu rejissoru Elşad Rəhimzadə olan yazıçı-dramaturq Ülviyyə Heydərovanın “İnanıram” monopyesi əsasında hazırlanan eyniadlı tamaşa, ədəbiyyat üzrə Nobel mükafatını almış ilk ingilis yazıçısı Redyard Kiplinqin “Cəngəlliklərin kitabı” və “İkinci cəngəlliklər” əsərləri əsasında uşaqlar üçün Elşad Rəhimzadənin quruluşunda hazırlanan “Mauqli” adlı tamaşa teatrsevərlərə təqdim olunub. Eyni zamanda, Əməkdar artist Nicat Kazımovun quruluşunda 44 günlük Vətən müharibəsinə həsr olunmuş İlqar Fəhminin “Balaca kişilər” pyesi əsasında eyniadlı tamaşanın, Müşfiq Əliyevin quruluşunda İsveç dramaturqu Benqt Alforsun “İllüzionistlər” pyesi əsasında hazırlanan “35 ildən sonra” adlı tamaşanın, həmçinin quruluşçu rejissoru və baş rolun ifaçısı Aydan Həsənzadə olan fransız dramaturqu Jan Kotonun “Biganə yaraşıqlı” əsəri əsasında hazırlanan “Biganə məşuq” tamaşasının premyerası keçirilib.

Bu barədə AZƏRTAC-a teatrın mətbuat katibi Samirə Əşrəf məlumat verib.

“Bildiyiniz kimi bu il Ümummilli Lider Heydər Əliyevin anadan olmasının 100, Azərbaycan peşəkar milli teatrının yaranmasının 150 illiyi münasibətilə Mədəniyyət Nazirliyi tərəfindən təşkil olunan silsilə tədbirlər çərçivəsində teatr və konsert truppalarının regionlara qastrol səfərləri də təşkil olunub. Azərbaycan Dövlət Gənc Tamaşaçılar Teatrının builki ilk qastrol səfəri Sumqayıt şəhərinə olub. Teatr Sumqayıt Dram Teatrının səhnəsində “Dəcəl keçi” tamaşası ilə çıxış edib. Regionlara olan digər qastrol səfərləri isə Gəncə Dram Teatrında Anton Pavloviç Çexovun “Qağayı” əsəri əsasında hazırlanan eyniadlı tamaşa ilə və nəhayət, Lənkəran Dövlət Dram Teatrında “Bremen musiqiçiləri” adlı tamaşa olub. Daha bir qastrol səfərimiz isə Özbəkistanın paytaxtı Daşkənddə “Avrasiya” 1-ci Beynəlxalq Teatr Festivalında həyata keçirilib. Özbəkistan Mədəniyyət və Turizm Nazirliyinin təşkil etdiyi festivalda Azərbaycan Dövlət Gənc Tamaşaçılar Teatrının yaradıcı heyəti İsveç dramaturqu Lars Norenin “Müharibə” pyesi əsasında Əməkdar incəsənət xadimi Bəhram Osmanovun hazırladığı “Mən gəldim, qızlar” tamaşası ilə çıxış edib. Gənc Tamaşaçılar Teatrı builki mövsüm bağlanışını böyük dramaturqumuz Mirzə Fətəli Axundovun “Sərgüzəşti Vəziri Xani Lənkəran” tamaşası əsasında hazırlanan eyniadlı tamaşa ilə edib”, - deyə teatrın mətbuat katibi vurğulayıb.