Genetik Ehtiyatlar İnstitutunda elmi-tədqiqat işlərinin planı müzakirə olunub
Bakı, 6 fevral, AZƏRTAC
Genetik Ehtiyatlar İnstitutunun Elmi şurasının növbəti onlayn iclası keçirilib.
İnstitutdan AZƏRTAC-a bildirilib ki, iclasda müəssisənin direktoru, AMEA-nın müxbir üzvü Zeynal Əkpərov elmi-tədqiqat şöbələrinin işinin gücləndirilməli olduğunu vurğulayıb. Z.Əkpərov qeyd edib ki, təchizat və xidmət şöbəsi, innovasiya üzrə menecer və baş mühəndis ştatlarının yaradılması elmi müəssisədə mövcud avadanlıqlardan səmərəli istifadə olunmasına və büdcədən kənar vəsait qazanılmasına kömək edəcək.
İclasda institutda elmi-tədqiqat şöbələrinin işinin gücləndirilməsi məsələləri də müzakirə olunub. Təklif olunub ki, bitkilərin biokimyası və texnologiya şöbələrində aparılan elmi-tədqiqat işlərinin yaxınlığı nəzərə alınaraq həmin şöbələr birləşdirilsin. Şura üzvləri qeyd olunan şöbələrin əməkdaşlarının bir şöbədə daha məhsuldar elmi işlər görə biləcəyini vurğulayaraq səsvermə ilə şöbələrin birləşdirilməsi haqqında Biologiya və Tibb Elmləri Bölməsi qarşısında vəsatətin qaldırılmasını qərara alıblar. Həmçinin institutun bir sıra şöbələrinin adlarında qismən dəyişikliklərin edilməsi haqqında qərar qəbul edilib.
Elmi şurada institutun “2021-2025-ci illər üzrə elmi-tədqiqat işlərinin əhatəli planı” geniş müzakirə olunub. Z.Əkpərov bildirib ki, əvvəllər institutda hər şöbə ayrıca mövzu üzrə elmi-tədqiqat işləri aparırdı. Növbəti 5 ilin planında isə aparılan elmi işlərin səmərəliliyinin artırılması və öyrənilən genetik materialların kompleks tədqiq olunması üçün müxtəlif şöbələrin bir mövzu daxilində tədqiqat işi aparılması daha məqsədəuyğundur. Belə ki, dənli taxıl və paxlalı bitkilər, tərəvəz və bostan bitkiləri, texniki və yem bitkiləri və meyvə bitkiləri şöbələrinin təklif etdikləri elmi tədqiqat işləri bir mövzu altında birləşdirilib. Bundan başqa, bitki fiziologiyası və immunogenetika şöbələrinin, biokimya və texnologiya şöbələrinin, eləcə də biotexnologiya və molekulyar sitogenetika şöbələrinin mövzuları birləşdirilib, ümumilikdə institutda elmi-tədqiqat işlərinin 7 mövzu üzrə davam etdirilməsi nəzərdə tutulub. Qeyd edilib ki, növbəti 5 il ərzində mövzu planına işğaldan azad olunmuş ərazilərdə də elmi-tədqiqat işlərinin aparılması üzrə iş və mərhələlər daxil edilib. İşğaldan azad olunmuş ərazilərimiz minalardan təmizləndikdən sonra mərhələli şəkildə həmin bölgələrin genetik ehtiyatları təftiş olunacaq, toplanılaraq kompleks şəkildə qiymətləndiriləcək və onlardan seleksiyada istifadə olunacaqdır. Elmi-tədqiqat planı şuranın üzvləri tərəfindən geniş müzakirə edilərək açıq səsvermə ilə qəbul edilib.
Bölmənin digər xəbərləri
