Gürcüstan hökuməti ölkədə ali təhsil sahəsində islahatlar konsepsiyası hazırlayır
Tbilisi, 20 avqust, AZƏRTAC
Gürcüstan hökuməti ölkədə fəaliyyət göstərən universitetlərin maddi -texniki bazasının möhkəmləndirilməsi, təhsilin keyfiyyətinin artırılması məqsədilə islahatlar konsepsiyası hazırlayıb.
AZƏRTAC xəbər verir ki, bu barədə Gürcüstanın Baş naziri İrakli Kobaxidze bildirib.
Onun sözlərinə görə, hakimiyyət universitet təhsili sahəsində köklü islahatlar aparmaq üçün kifayət qədər iddialı plana malikdir.
Bildirilir ki, bu günə qədər Gürcüstanda 63 universitet akkreditasiyadan keçib, onlardan 19-u dövlətə məxsusdur. Boloniya sistemindən sonra ölkənin ali təhsil sistemi bakalavr, magistratura və doktorantura səviyyələrini əhatə edir. Baş nazirin sözlərinə görə, ən mühüm prioritetlərdən biri regional universitetlərin imkanlarının davamlı və genişmiqyaslı inkişafı olacaq.
Bu istiqamət çərçivəsində Kutaisi Texnologiya Universiteti inkişaf edir və yeni tədris korpusunun tikildiyi Zuqdidi Dövlət Universiteti genişlənir.
Konsepsiya, ilkin məlumatlara görə, bir çox sahələri - infrastrukturdan tutmuş, kurikulumların yenidən nəzərdən keçirilməsinə, professor-müəllim heyəti üçün daha yaxşı şəraitin yaradılmasına qədər əhatə edəcək və növbəti üç il ərzində həyata keçiriləcək.
Xətayi Əzizov
AZƏRTAC -ın xüsusi müxbiri
Tbilisi
Bölmənin digər xəbərləri
