Gürcüstanda koronavirusla bağlı bəzi məhdudiyyətlər bu gündən aradan qaldırılıb
Tbilisi, 1 mart, AZƏRTAC
Gürcüstanda koronavirus pandemiyası səbəbindən tətbiq olunan bir neçə məhdudiyyət martın 1-dən aradan qaldırılıb.
AZƏRTAC xəbər verir ki, məhdudiyyətlər Dövlət Qurumlararası Koordinasiya Şurasının qərarı əsasında ləğv edilib.
Şuranın qərarına əsasən, martın 1-dən dövlət və özəl uşaq bağçaları açılıb, martın 8-dən isə kanat yollarından istifadəyə icazə veriləcək.
Bundan başqa, martın 15-dən teatrlar, idman klubları, peşəkar ansambllarda məşq və təlimlərin keçirilməsi mümkün olacaq, aprelin 1-dən isə fəaliyyət tam bərpa olunacaq. Martın 15-də bəzi ali təhsil müəssisələri praktiki təlimləri, auditoriyalarda dərsləri və laboratoriya üzrə məşğələləri bərpa ediblər.
Eyni zamanda muzey və kitabxanalar isə fəaliyyətlərini martın 1-dən etibarən bərpa ediblər.
Bununla yanaşı bu gündən daxili turlara icazə verilir.
Milli Turizm İdarəsindən bildirilib ki, tur başlamazdan əvvəl bələdçi, sürücü və turistlərin hərarətləri ölçülməlidir. Bələdçi və sürücü də daxil olmaqla tur qrupu fərdi qoruyucu vasitələrlə təmin edilməlidir.
Bu gündən, həmçinin Batumi şəhərində kafe və restoranlara qapalı məkanlarda da müştərilərə xidmət göstərməyə icazə verilib. Bu qərar martın 8-dən Gürcüstanın paytaxt Tbilisi və digər bölgələrdə fəaliyyət göstərən kafe və restoranlara da şamil olunacaq.
Martın 1-dən etibarən Gürcüstan hava məkanını bir neçə ölkə, o cümlədən Azərbaycan üçün açır. Ölkəyə təyyarə ilə gələcək xarici vətəndaşlardan 72 saatdan gec olmayaraq edilən PCR testinin mənfi nəticəsini təsdiqləyən arayış tələb olunacaq. Bu qayda Gürcüstan ərazisindən tranzit keçidi kimi istifadə edəcək vətəndaşlara da şamil olunacaq. Gürcüstanda qalacaq xarici vətəndaşlar 3 gündən sonra öz hesablarına məcburi PCR testindən keçməli olacaqlar.
Hazırkı mərhələdə Gürcüstan hökuməti quru sərhədlər vasitəsilə sərbəst gediş-gəlişə tətbiq etdiyi məhdudiyyətləri qüvvədə saxlayır.
Ölkəyə quru sərhədlərdən koronavirusa qarşı vaksinasiyanın hər iki mərhələsindən keçən istənilən ölkənin vətəndaşları daxil ola bilərlər.
Xətayi Əzizov
AZƏRTAC-ın xüsusi müxbiri
Tbilisi
Bölmənin digər xəbərləri
