Gürcüstanda Şərabçılıq Turizmi I Qlobal Konfransı keçiriləcək
Bakı, 19 avqust, AZƏRTAC
Sentyabrın 7-dən 9-dək Dünya Turizm Təşkilatı Gürcüstan Milli Turizm Administrasiyasının birgə əməkdaşlığı ilə Kaxetiya bölgəsində Şərabçılıq Turizmi I Qlobal Konfransını keçirəcək.
AZƏRTAC xəbər verir ki, bu barədə məlumat Dünya Turizm Təşkilatının saytında yer alıb.
Dünya Turizm Təşkilatının baş katibi Taleb Rifai konfransla bağlı deyib: “Şərabçılıq turizmi tələbatın şaxələndirilməsi üçün böyük imkanlar yaradır. Bu baxımdan, Gürcüstanda mövcud potensial yaxşı məlumdur. Çox məmnunuq ki, DTT-nin Şərabçılıq Turizmi I Qlobal Konfransını bu ölkədə keçiririk”.
Özünəməxsus və dinamik formatda təşkil olunacaq bu konfransın sessiyaları müxtəlif şərabçılıq zavodlarında keçiriləcək. İştirakçılara ekspertlərlə diskussiyalarda iştirak etmək imkanı yaradılacaq.
Qeyd edək ki, konfransda bir sıra ölkələrlə yanaşı Azərbaycan da təmsil olunacaq.
Bölmənin digər xəbərləri
