Gürcüstanı qardaş qırğınına təşviq edənlər, əslində, regiondakı mövcudluqlarının mahiyyətini göstərirlər ŞƏRH
Bakı, 12 oktyabr, AZƏRTAC
Dövlətlərin daxili işlərinə qarışılmasının yolverilməzliyinin beynəlxalq hüququn ümumtanınmış normalarında əksini tapan 10 əsas prinsipdən biri olmasına baxmayaraq Qərb imperializmi artıq onillərdir ki, "demokratiya" və "insan haqları" pərdəsi altında ayrı-ayrı dövlətlərin daxili yurisdiksiyasında olan məsələlərə açıq şəkildə müdaxilə etməkdədir.
Bunu AZƏRTAC-a açıqlamasında Milli Məclisin deputatı Bəhruz Məhərrəmov deyib.
O qeyd edib ki, işğal və təcavüzün yeni metod və forması kimi tətbiq olunan bu mexanizmlər bir qayda olaraq ayrı-ayrı dövlətlərdə seçkilər, xüsusən parlament seçkilərində daha da aktivləşir və ABŞ başda olmaqla bir sıra qlobal subyektlər siyasi cəhətdən həssas situasiyaları özlərinin imperialist maraqları naminə imkan və fürsətə çevirməyə çalışırlar.
“Sirr deyil ki, məxməri inqilabın ardınca Qərb Gürcüstanda əsaslı formada möhkəmlənib və xüsusən qeyri-hökumət təşkilatları şəbəkəsi ilə Gürcüstan cəmiyyətində, hətta Gürcüstanın dövlət idarəçiliyi üzərində çox ciddi təsir və nəzarət mexanizmi formalaşdıra bilib. Bu amil ayrı-ayrı Qərb dövlətləri, o cümlədən ABŞ-a imkan verməkdədir ki, Gürcüstanın suveren hüququ olan məsələlərdə söz sahibi kimi çıxış etsin, yaxud Gürcüstan hakimiyyətinin ayrı-ayrı qollarının bu və ya digər qərar qəbuluna təsir edə bilsin. Məsələn məlumdur ki, bir neçə ay öncə Gürcüstan parlamentində qeyri-hökumət təşkilatlarının fəaliyyətinin şəffaflaşdırılması sahəsində qanunvericiliyin müzakirəsi və qəbulu zamanı Qərb həmin rıçaqları işə salmış və Gürcüstan hakimiyyətini çox çətin durumda qoymuşdu. Birbaşa Qərbdən maliyyələşən 25 mindən artıq vətəndaş cəmiyyəti institutu ən azı elə təsisçilərinin qismində meydanlara axışmaqla ölkənin milli təhlükəsizliyini təhdid edən kritik situasiyaya səbəb olmuşdur”, - deyə deputat xatırladıb.
Son zamanlar Gürcüstan hakimiyyətinin Qərbin qeyd olunan təzyiq mexanizmlərinin imkanlarını və funksiyalarını minimuma endirmək istiqamətində müəyyən səylərə start verdiyini deyən B.Məhərrəmov əlavə edib: “Etiraf etmək lazımdır ki, ölkənin suverenliyinə xidmət edən bu təşəbbüslər ilkin nəticələrə və hətta müəyyən məsələlərdə Qərbin iradəsinin qırılmasına səbəb olmaqdadır. Gürcüstan daxilində Gürcüstanın mövcud hakimiyyətinə faktiki olaraq uduzan Qərb qeyd olunan qanunvericilik aktının qəbulunun ardınca Gürcüstan daxilindəki resurslarla kifayətlənməyərək, daha doğrusu, həmin resursların tətbiqinin lazımi effekt vermədiyini müşahidə edərək özünün nəzarətində olan ayrı-ayrı qlobal insan haqları təsisatlarını və hətta bəzi dövlətləri, o cümlədən ABŞ-ın dövlət institutlarını açıq şəkildə bu prosesə cəlb edərək Gürcüstan ətrafında açıq təhdid çənbəri formalaşdırıb. Bir qayda olaraq, demokratiya, insan haqları, azad seçki və vətəndaşların seçkilərdə sərbəst iradə ifadəsindən dəm vuran Qərb Gürcüstanda özünə bağlı siyasi təsisatları və vətəndaş cəmiyyəti institutlarını açıq şəkildə maliyyə və siyasi dəstəklə təmin etməklə, əslində, bu meyarların sadəcə alət kimi istifadə olunduğunu və Qərb üçün daha önəmli olan şeyin ümumbəşəri dəyərlər yox, iqtisadi, ticari və siyasi maraqlar olduğunu göstərməkdədir”.
Deputatın sözlərinə görə, Gürcüstan hakimiyyətinin uğurlu hesab edilə biləcək müqaviməti fonunda özünün təcavüzkar maraqlarını müdafiə etmək naminə Qərb dövlətlərinin bu ölkəni müharibəyə və xaosa sürükləmək istiqamətində kompleks tədbirləri işə saldığını müşahidə edə bilərik.
“Təəssüf doğuran məqam ondan ibarətdir ki, Gürcüstanda illərlə möhkəmlənməklə Qərb bu ölkədə qardaş qırğınına səbəb ola biləcək situasiyanı formalaşdırmaq imkanındadır. Lakin Gürcüstan hakimiyyəti qətiyyət nümayiş etdirərək Qərbin bu ölkədəki vətəndaş cəmiyyəti institutlarına, ayrı-ayrı dövlət orqanlarına və bütövlükdə cəmiyyətə təsir imkanını neytrallaşdırmağı bacararsa, bu, Gürcüstan dövlətçiliyi tarixinin yeni mərhələsinin başlanması və sözün əsl mənasında, suverenlik dövrünün yeni erası ola bilər. İndiki halda Tbilisi üçün arzu olunan situasiyanı reallaşdırmaq mürəkkəb görünsə də, Cənubi Qafqazda artıq analoji addımı atmış, yəni Qərb imperializminin bütün təsir mexanizmlərini fiaskoya uğratmış, rəngli inqilabları və regiona müdaxiləyə yol açan digər cəhdləri tam şəkildə neytrallaşdırmağı bacaran Azərbaycan nümunəsi var. Lakin unutmamalıyıq ki, Azərbaycan nümunəsi hökumətin, yaxud cəmiyyətin ayrı-ayrı qruplarının qərarı ilə bir anda formalaşdırıla biləcək təcrübə deyil. Azərbaycanın suveren maraqlarında ehtiva olunan qeyd edilən konfiqurasiyanın bazisində ilk növbədə xalq və iqtidar həmrəyliyi dayanır. Əlbəttə, Azərbaycan yaxın qonşu olaraq Gürcüstanda baş verən prosesləri diqqətlə izləyir və gürcü xalqının iradəsinin təntənəsini arzulayır. Lakin görünən odur ki, özünü Gürcüstanın hamisi kimi təqdim etməyə çalışan ABŞ və Fransa Gürcüstanı qardaş qırğınına və digər istiqamətdə gərgin situasiyalara təşviq etməklə, əslində, regiondakı mövcudluqlarının mahiyyətini göstərmiş olurlar”, - deyən B.Məhərrəmov fikirlərini yekunlaşdırıb.
Bölmənin digər xəbərləri
