Heç bir qüvvə Azərbaycanla hədə-qorxu, ultimatum dili ilə danışa bilməz - Şərh
Bakı, 20 iyul, AZƏRTAC
Son vaxtlar Cənubi Qafqaz regionunda baş verən prosesləri ümumiləşdirməyə çalışsaq, görərik ki, Azərbaycana qarşı silahlı təxribatlar, eyni zamanda, beynəlxalq müstəvidə diplomatik sahədə təzyiqlər davam etməkdədir. Bundan başqa, Cənubi Qafqazda davamlı sülhdə maraqlı olmayan tərəflərin Ermənistana gizli və açıq dəstəklərini ifadə etmələrinin şahidiyik. İnsanların inteqrasiya prosesinə, həmçinin sülhə doğru addımlamağa bu qədər qısqanclıqla yanaşan qüvvələrin əsas məqsədi məlumdur. Həm silahlı, həm diplomatik təxribatların faktlarla təsdiqindən danışsaq, son bir neçə gündə həm Ermənistan silahlı qüvvələrinin bölmələri, həm də separatçılar tərəfindən fortifikasiya qurğularının quraşdırılması cəhdlərin olduğunu və bunun qarşısının alındığını qeyd etmək yerinə düşər. Azərbaycan Ordusunun bölmələrinin gördüyü təxirəsalınmaz tədbirlər nəticəsində aparılan bu səngər qazma işləri dərhal dayandırılıb. Eləcə də Kəlbəcər, Ağdam, Laçın və Naxçıvan Muxtar Respublikası istiqamətlərində silahlı təxribatların şahidi oluruq, Ordumuzun mövqeləri atıcı silahlardan atəşə tutulur. Bölmələrimiz qeyd olunan istiqamətdə adekvat cavab tədbirləri görüb.
Bu fikirləri AZƏRTAC-a müsahibəsində Həmvətənlərə Dəstək İctimai Birliyinin təsisçisi, ehtiyatda olan polkovnik-leytenant, hərbi-siyasi ekspert Elmar Hüseyn deyib.
Bildirilib ki, diplomatik sahədəki təxribatlara gəldikdə, Ermənistan xarici işlər nazirinin Avstriyanın federal naziri ilə görüşündən sonrakı mətbuat konfransında səsləndirdiyi həqiqəti əks etdirməyən iddialarını misal göstərmək olar. Erməni rəsmilərinin beynəlxalq platformada fərqli prizmadan çıxış etməsinə artıq öyrəşmişik. Son bir neçə ildə düşmən ölkənin diplomatik təxribatlar istiqamətində davamlı addımlar atmasının bilavasitə şahidiyik.
Digər tərəfdən dövlətimizin başçısının kənardan siyasi iradəmizə təsir etmək cəhdləri barədə fikirlərini xatırlasaq, ümumi mənzərə göz önündə canlanar. Bu ilin altı ayının sosial-iqtisadi yekunlarına həsr olunmuş müşavirədə Prezident İlham Əliyev çıxışında bu çirkin niyyətli xarici qüvvələrin cavablarının necə olacağını açıqlayaraq deyib: “Bu gün dünyada güc amili ön plandadır və güclə hesablaşırlar, gücdən çəkinirlər. Biz son iki il yarım ərzində bir neçə dəfə bunu bir neçə ünvana göstərmişik və heç kim bizim iradəmizə təsir edə bilməz. Əksinə, bizə qarşı tuşlanmış bütün oxları sındırıb öz ləyaqətimizi qoruya bilmişik və maraqlarımızı qoruya bilmişik, daha əlavə sözlərə ehtiyac yoxdur, hər şey göz qabağındadır. Necə deyərlər, dərinə getmək istəmirəm, amma bunu artıq hər kəs görür, görməlidir və bilməlidir ki, Azərbaycanla hədə-qorxu, ultimatum dili ilə heç kim danışa bilməz və hesab edirəm ki, bundan sonra belə cəhdlər də olmayacaq”.
Hərbi-siyasi ekspertin sözlərinə görə, bu fikirlər həm də əslində həmin qüvvələr açıq mesajdır. Belə görünür ki, Cənubi Qafqazda vəziyyətin gərginləşməsində maraqlı olan tərəflər yenə də əməllərini davam etdirməkdədirlər. İndiki durumda mövqeyimizi formalaşdırmalıyıq. Azərbaycan Prezidenti əslində məsələnin daha dərin olduğunu vurğulayır. Qeyd edir ki, Vətən müharibəsindən sonrakı üç ilə yaxın vaxt ərzində ölkəmizlə güc yolu ilə danışmaq cəhdləri oldu və bunun qarşısı qətiyyətlə alındı. Çünki qarşımızdakı bu maneələr ölkəmizin reallığını qəbul etmir. Odur ki, Azərbaycanın dövlət büdcəsinin əsas istiqamətlərinin ordu quruculuğuna və iqtisadi inkişafımıza yönəlməsi də həmin bu düşmən qüvvələrə bir növ cavab idi.
“Prezident xatırladır ki, ATƏT-in keçmiş Minsk qrupuna üzv dövlətləri Ermənistan ilə Azərbaycan arasındakı münaqişəni 30 il dondurmağa çalışdılar. Biz İkinci Qarabağ savaşında şanlı və tarixi Zəfər qazanmışıq. Hazırda ordumuz qalib və güclüdür. Artıq elə texniki vasitələrimiz, hərbi imkanlarımız mövcuddur ki, bu həmin güclərin qarşısına çıxacaq vəziyyətdədirlər. Kənar qüvvələr güc amilini ön plana çəkərək hədə-qorxu, ultimatum dili ilə bizimlə danışmağa çalışsalar da, bu məqamda Azərbaycanda xalq-ordu-Ali Baş Komandan birliyi, əsgər və zabitlərimizin şücaəti baxımından, ordu quruculuğunda ölkəmizin gücü, texniki vasitələr, müasir silahlarla təchizat cəhətdən dünyaya nümunə olduq”, - deyə hərbi-siyasi ekspert vurğulayıb.
Ehtiyatda olan polkovnik-leytenantın fikrincə, ərazilərimiz azad olunduqdan sonra artıq xarici qüvvələrin sülhə mane olmaq cəhdlərini müşahidə edirik. Təəssüf ki, nəticədə ölkəmizdə yaşayan ermənilərin Azərbaycana inteqrasiya prosesinə maneçilik törədilir, iqtisadi əlaqələr və kommunikasiya bərpa olunmur. Ən əsası bu vəziyyət ümumilikdə Qarabağ regionunun inkişafına və əhalisinin sosial rifahına birbaşa təsir göstərir.
“Prezident İlham Əliyev qeyd edir ki, Azərbaycanla güc dilində danışmaq olmaz. Heç kim buna cəhd edə bilməz. Təbii ki, bu, bizim gücümüzdən xəbər verir. Bir ölkə rəhbərinin, Ali Baş Komandanın belə qətiyyətli və cəsarətli fikirlər səsləndirməsi heç də asan deyil. Biz hazırda hərbi qüdrətimizin artırılmasına milyardlarla vəsait xərcləyərək həmin uğura nail olmuşuq. Beləliklə, Azərbaycanın hərbi-siyasi qələbəsi diplomatik müstəvidə möhkəmlənir”, - deyə Vətən müharibəsi veteranı söyləyib.
Bölmənin digər xəbərləri
