Hindistanda torpaq sürüşməsi azı on nəfərin həyatına son qoyub
Bakı, 20 iyul, AZƏRTAC
Hindistanın Maharaştra ştatında torpaq sürüşməsi nəticəsində azı 10 nəfər həlak olub, 100-dən çox insan isə torpaq altında qalıb.
AZƏRTAC NDTV telekanalına istinadla xəbər verir ki, hadisə iyulun 20-nə keçən gecə Rayqad dairəsinin İrsalvadi yaşayış məntəqəsində qeydə alınıb. Yamacda yerləşən 30-a yaxın ev leysan yağışları səbəbindən baş verən torpaq sürüşməsinin dağıdıcı təsirinə məruz qalıb.
Xilasetmə əməliyyatında 80 kilometr məsafədə yerləşən Mumbay şəhərindən gələn xilasedicilər iştirak edir. İndiyə qədər 75 nəfəri torpaq altından sağ çıxarmaq mümkün olub. Yaşayış məntəqəsi çətin keçilən ərazidə yerləşir və ora yalnız kilometrlərlə uzanan piyada cığırı ilə getmək mümkündür. Digər tərəfdən, regionda hələ də davam edən güclü yağışlar xilasetmə işlərini çətinləşdirir.
Yerli hakimiyyət orqanları həlak olan vətəndaşların ailələrinə 6 min dollar təzminat ödəniləcəyini elan edib.
Bölmənin digər xəbərləri
