Hollivud ulduzları Venesiya Film Festivalına qatılmaya bilərlər
Bakı, 20 iyul, Emil Məlikov, AZƏRTAC
Hollivud kinoaktyorları və filmləri ABŞ Kinematoqrafçılar Gildiyasının təşkil etdiyi tətilə görə 80-ci Venesiya Film Festivalına qatılmaya bilərlər.
AZƏRTAC kinonews.ru saytına istinadla xəbər verir ki, Venesiya Film Festivalının rəhbəri Alberto Barbera, tətil səbəbindən Amerika film və ulduzlarının tədbirdə iştirak etməyəcəyi təqdirdə həyata keçiriləcək "B" planı üzərində çalışır.
Bəzi mənbələrin məlumatına görə, 80-ci Venesiya Film Festivalının Ümumavropa festivalı olacağı ehtimal edilir.
A.Barbera hadisələrin necə olacağını söyləməyin hələ tez olduğunu bildirib: “Amerikalı prodüser və rejissorların nə etmək niyyətində olduqlarını öyrənməyə çalışmalıyıq. Bu arada biz alternativ proqram yaratmaq üçün addımlar atırıq”.
Qeyd edək ki, sentyabrın 7-dən 17-dək davam edən və adətən Venesiya Film Festivalı ilə üst-üstə düşən Toronto Beynəlxalq Film Festivalının təşkilatçıları da eyni şəkildə Amerika filmlərinin məhdud iştirakı ehtimalına hazırlaşır. ABŞ Kinematoqrafçılar Gildiyasının təşkil etdiyi aktyorların tətilinin sentyabradək yekunlaşacağı ehtimal olunur.
Bölmənin digər xəbərləri
