IDEA İctimai Birliyi davamlı ağacəkmə aksiyasına başlayıb
Bakı, 10 mart, AZƏRTAC
IDEA İctimai Birliyi yaz əkin mövsümü ilə əlaqədar Bakı Şəhər İcra Hakimiyyətinin Yaşıllaşdırma Təsərrüfatı Birliyi ilə birgə paytaxt ərazisində yaşıllıqların artırılması və keyfiyyətinin yaxşılaşdırılması proqramı çərçivəsində davamlı ağacəkmə aksiyalarına başlayıb.
İctimai Birlikdən AZƏRTAC-a bildiriblər ki, aksiyalar çərçivəsində Ekologiya və Təbii Sərvətlər Nazirliyinin Dövlət Ekspertiza İdarəsi tərəfindən təhlükəli hesab edilərək kəsilməsi haqqında rəy verilmiş və ya artıq kəsilmiş qovaq ağaclarının yerinə Abşeron yarımadasının və Bakının torpaq və iqlim şəraitinə uyğun şam, sərv, zeytun, yapon saforası, göyrüş muşmulla, dağdağan ağaclarının əkilməsi planlaşdırılır.
Məlum olduğu kimi, qovaq ağaclarının bir çox fəsadları var. Onların bəziləri yay aylarında çiçəkləyən zaman öz toxumlarını pambığa bənzəyən liflərə bürünmüş formada yayırlar. Bu isə çox hallarda nəfəs yollarına dolaraq öskürəyin yaranmasına və ya allergik reaksiyalara səbəb olur. Təəssüflər olsun ki, vaxtilə şəhər əkinlərində, xüsusilə də məhəlləarası əkinlərdə xeyli istifadə edilən piramidal qovaq hazırda ən çox təhlükə törədən ağac kimi tanınır. Çünki bu ağacın oduncağı yumşaq olduğu üçün tez zədələnir və zədə yerinə su düşdükdə ağac az müddətdən sonra həmin yerdən çürüyür. Digər tərəfdən onların kök sistemi də tez çürüyür və küləkli havalarda hündür gövdəsini saxlaya bilməyərək aşır və müəyyən itkilərə səbəb olur. Beləliklə də bu ağac növlərinin şəhər şəraitində əkilib-becərilməsi həm dekorativlik baxımından, həm də sanitar-gigiyenik baxımdan məqbul hesab edilmir.
Paytaxtımızda qovaq ağacı ölümlə nəticələnən qəzalara da səbəb olub. Belə ki, 2013-cü ildə qovaq ağacı aşaraq ana və uşağın üstünə düşdüyündən hər ikisi həyatını itirib. Eyni tipli hadisə 2011-ci ildə baş verib və Bakı sakini Elçin Əzizov dünyasını dəyişib. Əslində hər iki halda da qovaq ağacları xarici görünüş etibarı ilə sağlam olub. Sadəcə güclü külək nəticəsində zəif kök sistemi iri gövdəni saxlaya bilməyib və bədbəxt hadisələr baş verib.
Qovaq ağacları çox hallarda avtomobillərin, evlərin, eyvanların, elektrik naqilləri və qaz xəttlərinin üzərinə düşərək qəzalı vəziyyətə səbəb olur və insanların əmlakına ziyan yetirir. Təkcə 2015-ci il ərzində qəzalı durumda olan qovaq ağacları haqqında qeydiyyatdan keçmiş müraciətlərin sayı 660-dan çoxdur.
Yuxarıda göstərilənləri nəzərə alaraq IDEA İctimai Birliyi və Bakı Şəhər İcra Hakimiyyətinin Yaşıllaşdırma Təsərrüfatı Birliyi layihənin icrasına qovaq ağaclarının ən çox əkildiyi və qəzaların daha çox olduğu Nizami rayonundan başlayıb. Martın 5-də R. Rüstəmov küçəsində keçirilən ilk ağacəkmə aksiyasında IDEA İctimai Birliyinin könüllüləri də iştirak edərək qovaq ağaclarının yerinə 500-ə qədər şam, qarağac, sərv və göyrüş ağacları əkiblər.
Qeyd edək ki, IDEA İctimai Birliyi və Yaşıllaşdırma Təsərrüfatı Birliyi tərəfindən həyata keçirilən qovaq ağaclarının yerinə digər ağacların əkilməsi aksiyasını növbəli şəkildə Elşən Süleymanov, Q.Qarayev, Naxçivani, Əliağa Kürçaylı, Şərifli, Nəsimi, B.Nuriyev, İ.İsmayılov, K.Balakişiyev və Ş.Mirzəyev küçələrində, o cümlədən Babək prospekti ərazisində də təşkil edəcək. Ümumilikdə Nizami rayonundakı qəzalı ağacların yerləşdiyi ərazilərdə fevral-aprel ayları ərzində 1500-ə yaxın ağacın əkilməsi nəzərdə tutulub. Bakının digər rayonlarında da eyni aksiyalar təşkil olunacaq. Bütün tədbirlər mütəmadi olaraq mətbuatda işıqlandırılacaq.
IDEA İctimai Birliyi yaşıllıqların artırılması və qorunmasına xüsusi həssaslıqla yanaşır və təsis edildiyi dövrdən etibarən ölkə ərazisində 5 milyondan artıq ağacın əkilməsinə nail olub.
Bölmənin digər xəbərləri
