İnam Kərimov: Güclü dövlət anlayışı vətəndaş və sahibkarların hüquqlarının qorunması ilə ölçülür
Bakı, 5 fevral, Günel Türksoy, AZƏRTAC
" LEGİS" Hüquq Forumu kimi platformalar dövlət, məhkəmə və biznes arasında açıq dialoq üçün etibarlı hüquqi mühitin formalaşmasına xidmət edir. Müasir dövrdə güclü iqtisadiyyat yalnız sərmayə və təşəbbüskarlıqla deyil, eyni zamanda, etibarlı, çevik və proqnozlaşdırıla bilən hüquq sistemi ilə formalaşır. Sahibkar üçün ən vacib məsələlərdən biri mübahisə yarandıqda ədalətli, şəffaf və operativ məhkəmə müdafiəsinə arxayın ola bilməsidir. Məhz bu etimad investisiya mühitinin əsas sütunlarından biridir.
AZƏRTAC xəbər verir ki, bunu Ali Məhkəmənin və Məhkəmə-Hüquq Şurasının sədri İnam Kərimov
“LEGİS” Hüquq Forumunda çıxış edərkən deyib.
O qeyd edib ki, Azərbaycanda aparılan məhkəmə-hüquq islahatlarının mərkəzində də məhz bu məqsəd dayanır: "İxtisaslaşmış kommersiya məhkəmələrinin fəaliyyətə başlaması kommersiya mübahisələrinin daha peşəkar şəkildə baxılmasına, məhkəmə təcrübəsində vahid yanaşmanın formalaşmasına və qərarların hüquqi əsaslandırılmasının gücləndirilməsinə imkan verib. Deyə bilərəm ki, son illər məhkəmə aktlarının sabitliyinin yüksəlməsi bütövlükdə məhkəmə hakimiyyətinə olan inamın artmasına gətirib çıxarıb. Aparılan təhlillər kommersiya məhkəmələrinin icraatında olan mübahisələrin sayının ildən-ilə artdığını göstərir. Bu artım bir tərəfdən iqtisadi aktivliyin göstəricisi, digər tərəfdən isə sahibkarların məhkəməyə və ədalətli qərar gözləntilərinə olan etimadının ifadəsidir. Güclü dövlət anlayışı məhz vətəndaş və sahibkarların hüquqlarının qorunması ilə ölçülür. Bu baxımdan ölkəmizdə inzibati hüququn inkişafı Prezident İlham Əliyev tərəfindən daim vurğulanan “dövlət siyasətimizin mərkəzində Azərbaycan vətəndaşı dayanır” prinsipinin bariz təzahürüdür. Bununla belə, inzibati məhkəmə icraatı sahəsində yeni mərhələyə uyğun islahatlara ehtiyac qalmaqdadır. Bu islahatlar həm tətbiq zamanı yaranan çətinlikləri aradan qaldırmalı, həm də müasir çağırışlara uyğunlaşmanı təmin etməlidir".
İnam Kərimov qeyd edib ki, qanunun aliliyinin, etimad və şəffaflığın gücləndirilməsində alternativ mübahisə həlli mexanizmləri də mühüm rol oynayır: "Ümid edirik ki, ölkəmizdə arbitraj institutlarının inkişafı kommersiya və mülki mübahisələrin daha operativ və səmərəli həllinə xidmət edəcək. Bu sahədə məhkəmə sistemi ilə əməkdaşlıq xüsusi əhəmiyyət daşıyır və biz də bu istiqamətdə dəstək göstərməyə hazırıq. Qloballaşan dünyada hüquq sistemi dəyişən iqtisadi və texnoloji çağırışlara uyğunlaşmalıdır. Bu baxımdan süni intellektin hüquqda tətbiqi artıq reallıqdır. Süni intellekt nə hakimi, nə də hüquqşünası əvəz edir, lakin düzgün və məsuliyyətli istifadə edildikdə məhkəmə təcrübəsinin təhlilində, hüquqi sənədlərlə işdə və risklərin qiymətləndirilməsində effektiv köməkçi alətə çevrilir. Hazırda məhkəmələrdə bu istiqamətdə zəruri addımlar atılır və süni intellektin tətbiqi məhkəmə fəaliyyətinin səmərəliliyinin artırılmasına xidmət edəcək".
Bölmənin digər xəbərləri
