“İqlim dəyişikliyi və inkişaf” mövzusunda treninq keçirilmişdir
Bakı, 21 may (AZƏRTAC). Bakıda Avropada Təhlükəsizlik və Əməkdaşlıq Təşkilatının (ATƏT) Təhlükəsizlik və Ətraf Mühit üzrə Vətəndaş Fəaliyyəti (TƏMVF) Proqramı çərçivəsində, “EkoSfera” Sosial-Ekoloji Mərkəzinin təşkilatçılığı ilə “İqlim dəyişikliyi və inkişaf” mövzusunda üçgünlük treninq keçirilmişdir.
Azərbaycan Respublikası Dövlət Neft Şirkətinin (ARDNŞ) Ekologiya İdarəsindən AZƏRTAC-a bildirmişlər ki, treninqin əsas məqsədi QHT alyansının təmsilçilərinin fəaliyyətinin gücləndirilməsi, xüsusilə də iqlim dəyişikliyi sahəsində institusional inkişafın dəstəklənməsidir. Treninqlərdə Azərbaycanın ekoloji yönümlü QHT-lərinin 30-a yaxın üzvü, ekologiya sahəsində beynəlxalq və milli ekspertlər, ARDNŞ-in, Milli Elmlər Akademiyasının, Ekologiya və Təbii Sərvətlər Nazirliyinin nümayəndələri iştirak etmişlər.
Təlim-seminarda “İqlim dəyişmələrinə təsirin azaldılması sahəsində ARDNŞ-in fəaliyyəti” mövzusunda təqdimat nümayiş etdirilmişdir.
Treninq çərçivəsində iştirakçılar üçün ARDNŞ-in “Eko-park”ına ekskursiya təşkil edilmiş, onlara “Eko-park”ın yaradılma məqsədi, parkın istehsalat sahələri və infrastrukturu, külək və günəş generatorları və parkda tətbiq olunan digər texnologiyalar barədə ətraflı məlumat verilmişdir.
Bölmənin digər xəbərləri
