İqlim dəyişikliyinin təsirlərinin azaldılması strategiyasını dəstəkləyən yeni layihəyə start verilib
Bakı, 3 mart, AZƏRTAC
“Azərbaycanın yanacaq və enerji istehlakı sektorunda karbon emissiyalarının azaldılmasını təmin edən Milli Fəaliyyət Planı” (NAMA) layihəsinin açılışı olub.
AZƏRTAC xəbər verir ki, bu layihə Azərbaycandakı mövcud milli çərçivə nəzərə alınmaqla işlənib hazırlanıb və diqqət mərkəzində istixana effekti yaradan qazların azaldılmasını nəzərdə tutan xüsusi tədbirləri əks etdirən proqram xarakterli milli fəaliyyət planıdır. Layihə Azərbaycan Respublikası Dövlət Neft Şirkəti (SOCAR), Qlobal Ətraf Mühit Fondu (GEF), BMT-nin İnkişaf Proqramının birgə maliyyə və texniki dəstəyi ilə həyata keçiriləcək.
Tədbirdə çıxış edən BMT-nin İnkişaf Proqramının ölkəmizdəki rezident nümayəndəsi səlahiyyətlərini müvəqqəti icra edən Ercan Murat layihənin aktuallığından danışıb, iqlim dəyişikliyi ilə bağlı dünya ölkələrini narahat edən problemlərə diqqət çəkib. “Azərbaycan iqlim dəyişikliyinə nisbətən az səbəb olan ölkə olsa da, bu təsirin yumşaldılması istiqamətində ciddi addımlar atır deyən”, - Ercan Murat bildirib ki, istixana qazlarının azaldılması ilə bağlı müvafiq tədbirlərin görülməsi olduqca vacibdir. BMT İnkişaf Proqramının təmsilçisi Azərbaycanın iqlim dəyişikliyi ilə bağlı görülən işlərə töhfə verəcəyinə əminliyini ifadə edib.
Dünyada sənaye sahələri inkişaf etdikcə ətraf mühitə təsirin də artdığını deyən SOCAR-ın prezidenti Rövnəq Abdullayev onun qarşısını almaq məqsədilə ciddi addımların atıldığını, Azərbaycan dövlətinin bu sahəyə xüsusi diqqətlə yanaşdığını və bununla bağlı müxtəlif layihələr reallaşdırdığını bildirib. R.Abdullayev qeyd edib ki, SOCAR-ın da bu istiqamətə əhəmiyyətli töhfələrindən biri NAMA layihəsinin icrasıdır. Layihənin məqsədi SOCAR-ın əsas və köməkçi əməliyyatlarında səmərəli texnologiya və üsullardan istifadə edərək, istixana qazlarının azaldılması vasitəsilə iqlim dəyişikliyi strategiyasını həyata keçirməklə Dövlət Neft Şirkətini dəstəkləməkdən ibarətdir.
Ekologiya və təbii sərvətlər nazirinin müavini Firdovsi Əliyev diqqətə çatdırıb ki, ekspertlər iqlim dəyişmələrinə təsirlərin azaldılması və ona adaptasiya istiqamətində yanaşmalar üzrə səylərin daha da artırılmasına çağırır. Azərbaycan Kioto prosesi başlandığı vaxtdan 600 milyon tondan artıq istilik effekti yaradan qaz tullantılarının azaldılmasına nail olub. Bundan başqa, Azərbaycan nadir ölkələrdəndir ki, meşələrin azalmasını dayandıra bilib və artımını təmin edib. Meşələrin artırılmasında və qorunub saxlanılmasında ölkədə həyata keçirilən qazlaşdırma siyasəti mühüm rol oynayır. Ölkəmiz həm də aşağı tullantılı inkişaf yolunu seçib.
İqlim dəyişikliyi ilə bağlı strategiyaya diqqət çəkən Fransanın ölkəmizdəki səfiri Orelia Buşez ötən ilin dekabrında Parisdə hazırlanan iqlim üzrə Sazişin 55 iştirakçı ölkə tərəfindən imzalanmasının əhəmiyyətini vurğulayıb. Diplomatik missiyanın rəhbəri Azərbaycanın ətraf mühitə təsirinin azaldılması istiqamətində rolunu qeyd edib.
Sonra dünyada iqlim dəyişikliyi ilə bağlı vəziyyəti əks etdirən videoçarx nümayiş olunub.
Tədbirin ikinci hissəsində NAMA layihəsinin direktoru, SOCAR-ın ekologiya üzrə vitse-prezidentinin müşaviri Orxan Əkbərov Azərbaycanın ətraf mühitin vəziyyətinə verdiyi önəmdən danışaraq, Heydər Əliyev Fondunun vitse-prezidenti Leyla Əliyevanın təsisçisi və rəhbəri olduğu IDEA İctimai Birliyinin ətraf mühitin mühafizəsi istiqamətindəki fəaliyyətini qeyd edib. O, SOCAR-ın bu sahədə gördüyü işləri diqqətə çatdıraraq bildirib ki, gələcək nəsillərə sağlam ətraf mühit, yaşıl təbiət və təmiz atmosfer miras qalmalıdır. Buna görə də hər bir vətəndaşın borcu ətraf mühit məsələlərinə diqqətlə yanaşmaqdır. NAMA layihəsinin direktoru əminliklə vurğulayıb ki, 5 il davam edəcək layihənin bəhrəsini gələcək nəsillər mütləq görəcək.
BMT-nin İnkişaf Proqramının baş proqram müşaviri Çingiz Məmmədov isə siyasi, iqtisadi sahələrdə bir-biri ilə razılığa gələ bilməyən ölkələrin ətraf mühitin qorunması məsələsində həmrəy olduqlarını və ötən il Parisdə qəbul edilən iqlim sazişi ilə bağlı bir araya gəldiklərini vurğulayaraq bildirib ki, məhz buna görə NAMA layihəsi önəm kəsb edir.
Tədbirdə layihənin əsas donorunun Qlobal Ekoloji Fond olduğu, bu Fondun 185 ölkədə 4 mindən çox layihə reallaşdırdığı diqqətə çatdırılıb.
Bölmənin digər xəbərləri
