İsmayıllı öz inkişafının yeni mərhələsinə qədəm qoymuşdur VİDEO
İsmayıllı, 19 fevral (AZƏRTAC). İsmayıllıda 2013-cü ildə sosial-iqtisadi inkişafın yekunları və cari ildə qarşıda duran vəzifələrə həsr olunmuş hesabat yığıncağı keçirilmişdir.
AZƏRTAC xəbər verir ki, yığıncaqdan əvvəl tədbir iştirakçıları şəhərin mərkəzində ümummilli lider Heydər Əliyevin abidəsini ziyarət etmiş, heykəlin önünə çiçəklər qoymuşlar. Sonra Heydər Əliyev parkında rayonda istehsal olunan kənd təsərrüfatı və sənaye məhsullarından ibarət sərgiyə baxmışlar. Sərgiyə 22 müəssisə tərəfindən 200 çeşidə yaxın məhsul çıxarılmışdır.
Gənclər Evində keçirilən hesabat yığıncağında rayon icra hakimiyyətinin başçısının məruzəsi dinlənilmiş, çıxışlar olmuşdur. İlk növbədə diqqət Nazirlər Kabinetinin ötən ilin sosial-iqtisadi inkişafının yekunları və 2014-cü ildə qarşıda duran vəzifələrə həsr olunmuş iclasında Prezident İlham Əliyevin proqram xarakterli nitqinə, burada qarşıya qoyulmuş konkret vəzifələrə yönəldilmişdir. Hesabat ilində Azərbaycanda bütün sahələrdə diqqətəlayiq nəticələr qazanıldığını bildirən natiqlər ötən ilin ismayıllılar üçün də yaddaqalan olduğunu söyləmişlər. Belə ki, 2013-cü il avqustun 14-də Prezident İlham Əliyevin İsmayıllıya tarixi səfəri sakinlərin yaddaşında silinməz iz qoymuşdur. Qeyd olunmuşdur ki, səfər çərçivəsində dövlətimizin başçısı rayonda gedən genişmiqyaslı tikinti-quruculuq, abadlıq işləri ilə yaxından maraqlanmış, bir sıra obyektlərin açılışında iştirak etmişdir. Səfərdən sonra Prezidentin 2013-cü il 15 avqust tarixli Sərəncamı ilə rayona 2 milyon manat vəsait ayrılmış və bu vəsait hesabına xeyli tikinti-quruculuq, abadlıq işləri aparılmışdır.
Hesabat ilində rayonda ümumi sahəsi 12 min 556 kvadratmetr olan evlər tikilib istifadəyə verilmişdir ki, bu da əvvəlki ildəkindən 10,5 dəfə çoxdur. Sumağallı kəndində 1,8 meqavat gücündə su-elektrik stansiyası, şəhərdə yeni avtovağzal, İvanovka kəndində 16 tonluq çörək zavodu, şəhərdə 50 nəfərin çalışdığı tikiş fabriki, Lahıcda və İvanovkada hər biri 15 çarpayılıq sahə xəstəxanası, Tircan, Topçu kəndlərində həkim məntəqələri, 4 kənd məktəbi üçün yeni binalar istifadəyə verilmişdir. Kürdmaşı kəndi ərazisində “İsmayıllı Şərab-1” ASC-nin Şərab zavodu yenidən qurulmuş, illik istehsal gücü 240 min baş olan “İsmayıllı quşçuluq” müəssisəsi fəaliyyətə başlamışdır. Prezident İlham Əliyevin Sərəncamı ilə ayrılmış vəsait hesabına İvanovka-Hacıhətəmli-Mollaisaqlı avtomobil yolunun yenidən qurulması başa çatdırılmış, Basqal-Sulut, İsmayıllı-Göytəpə- Ruşan- Qalıncaq yolu əsaslı təmir edilmişdir.
2013-cü ildə rayonda əsas kapitala 36 milyon 691 min manat və ya əvvəlki ildəkindən 19 milyon 765 min manat çox vəsait qoyulmuş, 18 milyon 598 min manat dəyərində əsas fondlar istifadəyə verilmişdir. Həmçinin ötən il rayonda ümumi məhsul buraxılışı 155 milyon 440 min manata çatmışdır ki, bu da 2012-cü ildəkindən 21 milyon 843 min manat çoxdur.
Məruzə və müzakirələrdə cari ildə görüləcək işlər barədə də ətraflı danışılmışdır. Məlumat verilmişdir ki, görkəmli alim Zərifə Əliyeva adına park, qala divarları əsaslı surətdə yenidən qurulacaq, velosiped istehsalı zavodunun tikintisinə başlanacaqdır. Eyni zamanda şəhərdə tikinti-quruculuq və abadlıq işləri ilə əlaqədar bir sıra yeni layihələr həyata keçiriləcək, kənd yollarının yenidən qurulması, ümumtəhsil məktəblərinin maddi-texniki bazasının möhkəmləndirilməsi, əhaliyə göstərilən səhiyyə xidmətinin, su, elektrik enerjisi, qaz təchizatının yaxşılaşdırılması istiqamətində tədbirlər davam etdiriləcəkdir.
Hesabat yığıncağında Prezident Administrasiyasının məsul işçisi Niyaz Əliyev və Milli Məclisin deputatı Novruzəli Aslanov çıxış etmişlər.
Sonda Prezident İlham Əliyevə müraciət qəbul olunmuşdur.
Bölmənin digər xəbərləri
