İSRAİL KNESSETİNİN ÜZVÜ AZƏRBAYCANIN MİLLİ BAYRAMI MÜNASİBƏTİLƏ KEÇİRİLƏN TƏDBİRDƏ İŞTİRAK ETMİŞDİR
Bakı, 2 iyun (AZƏRTAC). Azərbaycanın milli bayramı - Respublika günü münasibətilə İsraildə keçirilmiş tədbirdə Knessetin deputatı, “Kadima” partiyasının üzvü Robert Tivyayev də iştirak etmişdir.
Diasporla İş üzrə Dövlət Komitəsindən bildirmişlər ki, Azərbaycan diasporunun Türkiyənin İsraildəki səfirliyində keçirdiyi bayram tədbirində çıxış edən Knesset üzvü demişdir ki, Azərbaycan mənim üçün çox doğmadır, nənəm Qubada doğulmuş, valideynlərim evdə Azərbaycan dilində danışırdılar. Bu gün mən doğma insanların əhatəsində özümü evimdəki kimi hiss edirəm.
Türkiyə, Ukrayna, Qazaxıstan və digər dövlərlərin İsraildəki səfirliklərinin nümayəndələrinin də iştirak etdikləri tədbirdə Robert Tivyayev Azərbaycan-İsrail münasibətlərindən də danışmışdır. O bildirmişdir ki, Azərbaycan ilə İsrail arasında dostluq və əməkdaşlıq münasibətləri dərin tarixi köklərə malikdir. Yəhudilər əsrlər boyu Azərbaycanda yerli vətəndaşlarla bərabərhüquqlu şəraitdə yaşamışlar. Azərbaycanda yəhudiləri hec vaxt əcnəbi saymayıblar, bu günədək Azərbaycanda yaşayan heç bir yəhudi antisemitizmlə qarşılaşmamışdır. İsrail dövləti azərbaycanlıların yəhudilərə göstərdiyi bu yüksək səviyyəli, tolerant münasibəti həmişə yüksək qiymətləndirir.
Bölmənin digər xəbərləri
