İSVEÇRƏNİN BASEL ŞƏHƏRİNDƏ “AZƏRBAYCANA KİÇİK SƏYAHƏT” ADLI TANITMA TƏDBİRİ KEÇİRİLMİŞDİR
Bakı, 19 iyun (AZƏRTAC). İsveçrənin Basel şəhərindəki “Union” mədəniyyət mərkəzində “Azərbaycana kiçik səyahət” devizi altında tanıtım tədbiri keçirilmişdir.
İsveçrədə yeni fəaliyyətə başlamış “Azərbaycanın dostları” cəmiyyətinin təşkil etdiyi tədbirdə Azərbaycan xalqının tarixi, mədəniyyəti və bugünkü reallıqları, ölkəmizin hərtərəfli inkişafı barədə tədbir iştirakçılarına məlumat verilmişdir.
Diasporla İş üzrə Dövlət Komitəsinin mətbuat xidmətindən bildirmişlər ki, əcnəbi qonaqlar Azərbaycan haqqında bütün bilgilərə böyük maraq göstərmişlər.
Onların bir çoxu ölkəmiz haqqında ilk dəfə məhz bu tədbirdə məlumat aldığını bildirmişdir.
Gecədə dahi Nizami Gəncəvinin qəzəli Azərbaycan, fars və alman dillərində səsləndirilmişdir. “Tərəkəmə” və “Qaval” rəqsləri isə qonaqların sürəkli alqışları ilə müşayiət olunmuşdur.
Sonda tədbir iştirakçıları üçün Azərbaycan milli mətbəxinin ləziz yeməklərindən ibarət süfrə açılmışdır.
Bölmənin digər xəbərləri
