KANADA AZƏRBAYCAN TƏŞKİLATLAR ASSAMBLEYASININ BİRİNCİ QURULTAYI KEÇİRİLMİŞDİR
Bakı, 2 iyun (AZƏRTAC). Diasporla İş üzrə Dövlət Komitəsindən bildirmişlər ki, mayın 30-da Toronto şəhərinin “Meron” mərkəzində Kanada Azərbaycan Təşkilatlar Assambleyasının (KATA) I qurultayı keçirilmişdir.
Tədbirdən əvvəl assambleyaya daxil olan təşkilatların sədrləri və nümayəndələri, Azərbaycanın Kanadadakı səfirliyinin əməkdaşları və Diasporla İş üzrə Dövlət Komitəsinin nümayəndələri ümummilli lider Heydər Əliyevin Niaqara şəhərindəki büstünü ziyarət etmiş, önünə əklil qoymuşlar.
Azərbaycanın Kanadadakı səfiri Fərid Şəfiyevin də iştirak etdiyi qutultayı “Kvebek Azərbaycanlıları Assosiasiyası”nın sədri Məsud Əliyev açmışdır.
Kanada Azərbaycan Əməkdaşlıq Assosiasiyasının sədri İlham Axundov assambleyanın 2007-ci ilin yanvarında keçirilmiş təsis qurultayından bu günə qədərki fəaliyyəti ilə bağlı geniş məruzə etmişdir. Məruzədə siyasi, humanitar və təhsil sahəsində həyata keçirilən layihələrdən, Kanada Federal və əyalət parlamentləri ilə birlikdə görulən işlərdən və Kanadadakı Azərbaycan icmasının mütəşəkkilliyindən bəhs olunmuşdur.
Qurultay nümayəndələri assambleyanın iki illik fəaliyyətini qənaətbəxş hesab etmişlər.
Tədbirdə Ontario Azərbaycanlıları Assosiayasının sədri Cavad Zarrin, Ottava Azərbaycan İcmasının sədri Yaşar Muğan, Azəri-Türk Dünya Qadınları Cəmiyyətinin sədri Kəmalə Şiriyeva çıxış etmişlər.
Kanada-Azərbaycan İncəsənət Assosiasiyasının sədri Yusif Savalan və Alberta Azərbaycanlıları Cəmiyyətinin vitse-prezidenti Səbinə İsgəndərova çıxışlarında təmsil etdikləri qurumların assambleyaya üzv qəbul edilməsi təklifini irəli sürmüşlər. Qurultay hər iki müraciətə müsbət rəy vermiş və bununla da assambleyaya daxil olan diaspor təşkilatlatlarının sayı 12-yə çatmışdır.
Məruzə ətrafında çıxışlarla yanaşı Dünya Azərbaycanlılarının Həmrəylik Xartiyasından irəli gələn mühum məsələlər də müzakirə edilmişdir.
Səfir Fərid Şəfiyev çıxışında Azərbaycan-Kanada dövlətlərarası münasibətlərindən, eləcə də bu ölkədəki Azərbaycan diasporunun getdikcə güclənməsindən söz açmışdır.
Diasporla İş üzrə Dövlət Komitəsinin təmsilçiləri başda Prezident İlham Əliyev olmaqla Azərbaycan dövlətinin diasporumuza dəstəyi və qayğısı, Dövlət Komitəsinin Kanadadakı soydaşlarımızın ölkəmizi təbliğ edən layihələrinə verdiyi dəstək barədə danışmışlar.
Kanada Federal parlamentinin üzvləri Yasmin Ratansi, Ken Drayden, Kirsty Duncan, Barry Devolin, John McKay, Robert Oliphant və Ontario əyalətinin deputatları Reza Moridi, Monte Kvinter, Ramal Xelili, eləcə də türk, rus və yəhudi icmalarının nümayəndələri qurultayda iştirak etmişlər.
Kanadalı deputatlar çıxışlarında Azərbaycan xalqını və Kanadadakı Azərbaycan icmasını milli bayram - Respublika günü münasibətilə təbrik etmiş, Kanada-Azərbaycan Təşkilatları Assambleyasına uğurlar arzulamışlar.
Ken Drayden Kanada Liberal Partiyasının sədri və Kanada Parlamentinin üzvu S.İqnatyevin, Ontario vilayətinin deputatı Reza Moridi isə Ontario parlamentinin sədri Dalton Mak Kentinin Azərbaycan xalqına ünvanlanmış təbrik məktublarını oxumuşlar.
Deputat Y.Ratansi isə uğurlu fəaliyyətinə, Kanada və Azərbaycan xalqları və dövlətləri arasında əməkdaşlığın inkişafında göstərdiyi səylərə görə Kanada-Azərbaycan Təşkilatları Assambleyasına “Nailiyyət sertifikatı”nı təqdim etmişdir.
Qurultayda assambleyanın növbəti müddət üçün iş planı və qurumun rəhbər orqanlarının tərkibi seçilmiş, toplantının qətnaməsi qəbul edilmişdir.
Sonda tədbir iştirakçıları Azərbaycan Prezidenti İlham Əliyevə müraciət qəbul etmişlər.
Bölmənin digər xəbərləri
