Keçən il qaxlı fermerlər tütün istehsalından 1,3 milyon manat gəlir əldə ediblər
Qax, 5 mart, Mustafa Dadaşov, AZƏRTAC
Cari mövsümdə Qax rayonunda tütün əkini sahələrinin ötən ilə nisbətən 40 hektara yaxın artırılaraq 650 hektara çatdırılması nəzərdə tutulur. Əkin üçün lazım olan “Virciniya” növlü tütün şitillərinin yetişdirilməsi məqsədilə rayonun fermer və ailə təsərrüfatlarında ümumi sahəsi 7 min kvadratmetr olan sadə istixanalar hazırlanaraq toxum səpilib. Tütün şitilləri aprelin axırlarında sahələrə köçürüləcək.
Bu barədə AZƏRTAC-ın bölgə müxbirinə rayon icra hakimiyyətindən məlumat verilib.
Tütünçülüyün inkişafına dövlət tərəfindən yüksək diqqətin göstərilməsi, subsidiyaların ayrılması, güzəştli kreditlərin verilməsi qaxlı fermerlərin də bu sahəyə marağını artırıb. 2017-ci ildə məhsul istehsalçıları 606 hektar sahədə tütün yetişdirib, 810 ton quru tütün istehsal ediblər. Tütün istehsalı əvvəlki illə müqayisədə 2,5 dəfə artıb. Əhali tütün istehsalından 1,3 milyon manat gəlir əldə edib. Mövsüm ərzində tütünçülük sahəsində 1300 nəfərə yaxın işçi çalışıb.
Bölmənin digər xəbərləri
