Kəngərli, 1 may, AZƏRTAC

Ümummilli liderimiz Heydər Əliyev Azərbaycanın gələcək inkişafında təhsilin rolunu xüsusi qiymətləndirib, gənc nəslin təhsilini daim diqqət mərkəzində saxlayıbdır. Ötən əsrin 70-ci illərində Ulu Öndər tərəfindən əsası qoyulan təhsil strategiyası bu gün də ölkəmizdə uğurla davam etdirilir. Azərbaycan Respublikasının Prezidenti İlham Əliyevin müəyyənləşdirdiyi “Maddi dəyərlərin, iqtisadi potensialın insan kapitalına çevrilməsi” prinsipi əsasında inkişaf etdirilən təhsil sistemi yeni mərhələyə yüksəldilib, ölkəmizdə, eləcə də muxtar respublikada güclü tədris bazası yaradılıb. Müasir təhsil sisteminin yaradılması istiqamətində görülən işlər Kəngərli rayonunu da əhatə edib.

Naxçıvan Muxtar Respublikası Ali Məclisinin mətbuat xidmətindən AZƏRTAC-a bildirilib ki, mayın 1-də Kəngərli Rayon Təhsil Şöbəsinin yeni inzibati binası istifadəyə verilib.

Naxçıvan Muxtar Respublikası Ali Məclisinin Sədri Vasif Talıbov açılış tədbirində iştirak edib.

Ali Məclisin Sədri Kəngərli Rayon Təhsil Şöbəsinin yeni inzibati binasının istifadəyə verilməsi münasibətilə kollektivi və tədbir iştirakçılarını təbrik edərək deyib: Bu gün ölkəmizdə təhsilin inkişafına xüsusi diqqət və qayğı göstərilir. Hər il onlarla yeni məktəb binası tikilərək istifadəyə verilir. Yeni yaradılmasına baxmayaraq, Kəngərli rayonunda da bu istiqamətdə işlər uğurla həyata keçirilir. Kəngərli Rayon Təhsil Şöbəsinin tabeliyində 12 ümumtəhsil məktəbi və 4 məktəbdənkənar təhsil müəssisəsi fəaliyyət göstərir. Ümumtəhsil məktəblərindən 11-i müasir binada yerləşir. 1 məktəb binasında isə yenidənqurma işləri davam etdirilir. Hazırda rayondakı ümumtəhsil məktəblərində 3084 şagird təhsil alır, onların təlim-tərbiyəsi ilə 357 müəllim məşğul olur. Təhsil Şöbəsinin yeni inzibati binasında yaradılan şərait rayonda təhsilin günün tələbləri səviyyəsində qurulmasına imkan verəcəkdir. Ona görə də Təhsil Şöbəsinin əməkdaşları məktəblərin fəaliyyətinə gündəlik nəzarəti gücləndirməli, tədrisin müasir tələblər səviyyəsində qurulması üçün səylərini artırmalıdırlar.

Ali Məclisin Sədri deyib: 2013-2014-cü tədris ilində Kəngərli rayonunda orta məktəbləri bitirən 333 məzundan 102-si ali məktəblərə, 17-si orta təhsil bazasından, 8-i IX sinif bazasından orta ixtisas məktəblərinə, 26-sı isə Heydər Əliyev adına Hərbi Liseyə qəbul olunmuşdur. Məzunlardan 14-ü 500-700 intervalında bal toplamışdır. Bundan başqa rayonun ümumtəhsil məktəblərindən 2-si ötən tədris illərində “İlin ən yaxşı məktəbi” müsabiqəsinin qalibi olmuşdur. Təhsil sahəsində çalışanlar üçün yaxşı iş şəraitinin yaradılması gələcəkdə bu nailiyyətlərin daha da artırılmasına imkan verəcəkdir.

Ali Məclisin Sədri rayonun ümumtəhsil məktəblərində tədrisin müəllim tələbkarlığı və şagird çalışqanlığı əsasında qurulacağına, təhsil sahəsində nailiyyətlərin artırılaraq muxtar respublikanın orta göstəricisinə çatdırılacağına əminliyini bildirib, qarşıda duran vəzifələrin icrasında kollektivə uğurlar arzulayıb, açılışı bildirən lenti kəsibdir.

Məlumat verilib ki, 4 mərtəbəli binada müasir iş otaqları və geniş iclas zalı vardır. Otaqların hər biri mebel dəstləri və avadanlıqlarla təmin olunub. Həmçinin binada qazanxana, anbar, bufet, arxiv və digər yardımçı otaqlar da yerləşir.

Binaya fiber optik xətt çəkilib, kompyuterlər internetə qoşulub və xüsusi proqramla təmin edilibdir. Bu da rayonda təhsil məlumat bazasının yaradılmasına və elektron idarəetmə sisteminin tətbiqinə imkan verəcəkdir.

Həyətdə də abadlıq işləri görülüb, müasir işqılandırma sistemləri quraşdırılıbdır.

Kəngərli Rayon Uşaq-Gənclər Şahmat Məktəbi üçün

müasir bina tikilib

Mayın 1-də Kəngərli Rayon Uşaq-Gənclər Şahmat Məktəbinin yeni binasının açılışı olub.

Bu münasibətlə keçirilən tədbirdə çıxış edən Naxçıvan Muxtar Respublikası Ali Məclisinin Sədri Vasif Talıbov Kəngərli Rayon Uşaq-Gənclər Şahmat Məktəbinin yeni binasının istifadəyə verilməsi ilə muxtar respublikanın rayonlarında fəaliyyət göstərən bütün şahmat məktəblərinin müasir binalarla təmin olunduğunu bildirərək deyib: Ölkəmizdə şahmatın inkişafına ümummilli liderimiz Heydər Əliyevin Azərbaycana rəhbərliyi dövrlərində başlanılmışdır. Ötən əsrin 70-ci illərində Ulu Öndərin rəhbərliyi ilə Azərbaycanın bütün bölgələrində şahmat məktəbləri yaradılmış, şahmat fənni tədrisə əlavə edilmişdir. Təəssüf ki, ötən əsrin 90-cı illərinin məlum hadisələri bütün sahələrdə olduğu kimi, şahmat məktəblərinin fəaliyyətinə və şahmatın tədrisinə də böyük zərbələr vurmuşdur. Lakin bu gün Azərbaycanda Ulu Öndərin siyasi xətti uğurla davam etdirilir, digər sahələrlə yanaşı, şahmatın tədrisi və inkişafı istiqamətində də ardıcıl tədbirlər görülür. Azərbaycan Respublikasının Prezidenti cənab İlham Əliyevin 2009-cu il 5 may tarixli Sərəncamı ilə təsdiq edilən “2009-2014-cü illərdə Azərbaycanda şahmatın inkişaf etdirilməsi Dövlət Proqramı”nın uğurla icrası ölkəmizdə şahmatın inkişafına mühüm töhfə vermişdir.

Ali Məclisin Sədri deyib: Şahmatın tədrisi vacib məsələdir. Ona görə ki, şahmat gənclərin əqli inkişafı ilə yanaşı, həm də onların asudə vaxtlarının səmərəli təşkilinə imkan verir. Muxtar respublikada şahmat fənni ümumtəhsil məktəblərinin tədris proqramına daxil edilmişdir. Hazırda şahmat məktəbləri ilə bərabər, ümumtəhsil məktəblərində də həftədə 2 saat olmaqla şahmat fənni tədris olunur. Bu gün Kəngərli rayonunun ümumtəhsil məktəblərində təhsil alan 3084 şagird şahmatın tədrisinə cəlb olunub. İstifadəyə verilən Uşaq-Gənclər Şahmat Məktəbində isə 30 qrupda 405 şagirdin təlimi ilə 18 məşqçi-müəllim məşğul olur.

Qeyd olunub ki, həyata keçirilən tədbirlər son illər muxtar respublikada istedadlı şahmatçılar nəslinin yetişməsinə, idmanın bu növü üzrə beynəlxalq yarışların təşkilinə imkan verir. Muxtar respublikada hər il may ayında ənənəvi olaraq ümummilli lider Heydər Əliyevin anadan olmasının ildönümünə həsr olunmuş beynəlxalq şahmat festivalları keçirilir. Bu il də Ulu Öndərin anadan olmasının 92-ci ildönümünə həsr olunmuş “Naxçıvan Open-2015” Beynəlxalq Şahmat Festivalı keçiriləcəkdir. Mayın 2-də start veriləcək festivalda 12 ölkədən 350-dən artıq şahmatçı iştirak edəcəkdir. Sevindirici haldır ki, onlardan 80-i muxtar respublikadan olan şahmatçılardır.

Ali Məclisi Sədri həyata keçirilən tədbirlərin Kəngərli rayonunda da şahmatın inkişafına təkan verəcəyini, gələcəkdə rayonda şahmat ustalarının yetişəcəyinə əminliyini bildirib, Uşaq-Gənclər Şahmat Məktəbinin yeni binasının istifadəyə verilməsi münasibətilə rayon şahmatçılarını və məktəbin məşqçi-müəllimlərini təbrik edib.

Sonra Ali Məclisin Sədri açılışı bildirən lenti kəsib.

Məlumat verilib ki, 4 mərtəbəli binada 1-i elektron lövhəli olmaqla 10 sinif otağı, kompyuter sinfi, müəllimlər və hakimlər otaqları, oyun zalı və bufet vardır. Məktəbdə müasir tədris bazası yaradılıb, sinif otaqları və oyun zalı xüsusi masalar, maqnitli şahmat lövhələri və digər tədris vasitələri ilə təchiz edilibdir. Bu da rayondaxili müxtəlif yarış və birinciliklərin keçirilməsinə imkan verəcəkdir.

Kompyuter sinfində və hakimlər otağında ümumilikdə 10 kompyuter dəsti quraşdırılıb. Kompyuterlərə xüsusi şahmat proqramları yüklənib və internetə qoşulub. Gənc şahmatçılar internet üzərindən ölkəmizdə və dünyada keçirilən yarışları birbaşa izləyəcək, şahmatın tədrisi üzrə yeni biliklər əldə edəcək, şahmat ustalarının oyun təcrübələri ilə tanış olacaqlar. Binadakı elektron lövhə də şagirdlərin şahmatın sirlərinə dərindən yiyələnmələrinə, o cümlədən rayonun ümumtəhsil məktəbləri ilə şahmat məktəbi arasında distant dərslərin təşkilinə imkan verəcəkdir.

Bina ilə tanışlıqdan sonra məktəbin məşqçi-müəllimləri ilə görüşən Ali Məclisin Sədri deyib ki, müasir şahmat məktəbinin istifadəyə verilməsi rayonda təhsilin inkişafına da öz töhfəsini verəcəkdir. Şahmatla məşğul olan şagirdlər keçirilən dərsləri, xüsusilə də dəqiq elmləri daha yaxşı mənimsəyirlər. Həmçinin şahmat şagirdlərin əqli inkişafına kömək edir ki, bu da onların gələcəkdə informasiya texnologiyalarından istifadə imkanlarının artırılmasında və peşə sahibi olmalarında vacib şərtdir. Müəllimlər bütün bu amilləri nəzərə almalı, şagirdlərin şahmata marağını artırmalı, məşqçi-müəllimlər şahmat məktəbi ilə yanaşı, həm də ümumtəhsil məktəblərində dərslər keçməli, idman növü kimi şahmat hər bir gəncin həyat tərzinə çevrilməlidir.

Müəllim Məhəddin Kazımov minnətdarlıq edərək deyib ki, muxtar respublikada şahmatın kütləviliyinə nail olunubdur. Müasir şahmat məktəblərinin tikilib istifadəyə verilməsi, şahmatçılara və məşqçi-müəllimlərə hərtərəfli qayğı göstərilməsi bu sahənin inkişafına öz töhfəsini verməkdədir. Bu tədbirlərin tərkib hissəsi olaraq Kəngərli Rayon Uşaq-Gənclər Şahmat Məktəbi üçün yeni binanın istifadəyə verilməsi rayonda gənclərin idmanın bu növünə olan marağını daha da artıracaqdır.

Müasir memarlıq quruluşuna malik olan binanın ətrafı da abadlaşdırılıb, yaşıllıqlar salınıbdır.