Krımda “Qədim Ordubad və əfsanəvi Sevastopol” kitabının təqdimatı olmuşdur
Bakı, 25 sentyabr (AZƏRTAC). Krım Muxtar Respublikası Mədəniyyət Nazirliyinin rəsmi saytı xəbər verir ki, İ.Y.Franko adına Sevastopol Universal Elmi Kitabxanasında Hidayət Musayevin “Qədim Ordubad və əfsanəvi Sevastopol” kitabının təqdimatı olmuşdur.
Tədbirdə Krımın Azərbaycan icmasının nümayəndələri, Bakıdan gəlmiş qonaqlar və kitabxananın oxucuları iştirak etmişlər. Tədbiri Krımın Azərbaycan icmasının rəhbəri Rəhim Hümbətov açmışdır. İştirakçılara Rusiyanın ilk sualtı qayıqlarında xidmət etmiş müxtəlif millətlərə mənsub hərbi qulluqçulardan söhbət açan kitab təqdim edilmişdir. 1907-1909-cu illərdə Qara Dəniz Donanmasında və Sevastopolda baş vermiş hadisələrdən bəhs edən əsər tarixi material əsasında yazılmışdır. Kitabda əksini tapmış bütün hadisələr, hətta ayrı-ayrı epizodlar gerçəklikdə olmuş hadisələrdir. Personajların soyadları da uydurulmamışdır. Gənc azərbaycanlı mühəndis Firudin Ağalarovun taleyi diqqət mərkəzindədir. Onun prototipi ilk sovet sualtı qayıqlarının aparıcı konstruktorlarından biridir.
Bölmənin digər xəbərləri
