Lenin Andres Zambrano: Yerli xalqların hüquqlarının qorunması ləyaqətli gələcəyin təminatıdır
Bakı, 22 may, AZƏRTAC
Yerli xalqların hüquqlarının qorunması, onların öz torpaqlarını və həyat tərzlərini müdafiə etməsi dayanıqlı və ləyaqətli gələcəyin təmin olunması baxımından xüsusi əhəmiyyət daşıyır.
AZƏRTAC xəbər verir ki, bunu Ekvadorun Kişva Otavalo azsaylı xalqının gənc lideri və hüquqşünas Lenin Andres Zambrano Ümumdünya Şəhərsalma Forumunun 13-cü Sessiyası (WUF13) çərçivəsində keçirilən “Yerli xalqların hüquqları üzrə dəyirmi masa”da çıxışı zamanı səsləndirib.
O bildirib ki, yerli xalqlar uzun illərdir öz torpaqlarını, mədəniyyətlərini və həyat tərzlərini qorumaq uğrunda mübarizə aparırlar.
“Ərazilərimizin qorunması, ayrı-seçkiliyə məruz qalmamaq, sıxışdırılma və destruktiv yanaşmaların qarşısının alınması bizim üçün mühüm məsələlərdəndir. Bu istiqamətdə apardığımız mübarizə bizə dayanıqlı, davamlı və ləyaqətli həyat yaşamaq imkanı yaradır. Yerli xalqların mübarizəsi nəsillər boyu davam edib və bu proses bu gün də davam edir. Biz burada olan insanların və əvvəlki nəsillərin apardığı mübarizənin davamçılarıyıq. Məqsədlərimiz, düşüncələrimiz və gələcəyə baxışımız bu dəyərlərlə bağlıdır. Biz hamımız bu planetin bir hissəsiyik", - deyə Lenin Andres Zambrano bildirib.
Bölmənin digər xəbərləri
