REGİONLAR
Lənkəranda bayramqabağı balığın qiymətində artım müşahidə olunur VİDEO
Lənkəran, 13 mart, İlkin Adıyev, AZƏRTAC
Cənub bölgəsində Novruz bayramı ərəfəsində süfrələrin əsas neməti olan balığın qiymətində artım müşahidə edilir. Bu artım xüsusilə martın ilk günlərindən daha çox hiss olunur. Alıcılar bildirirlər ki, əvvəllər daha münasib qiymətə əldə edə bildikləri balıqları, indi baha qiymətə alırlar.
AZƏRTAC-ın bölgə müxbiri Lənkəranın “Böyük bazar”ında olub, qiymətlərlə maraqlanıb.
Piştaxtalarda satılan balıqların kiloqramı 5 manatdan başlayır. Ən bahalı balığın qiyməti isə 50 manatdır. Əsasən, çərşənbənin rəmzinə çevrilmiş kütüm balığının qiymətində artım müşahidə olunur.
Alıcı Əli Rzayev də qiymətin baha olmasından şikayətlənir. “Hər il Novruz bayramı ərəfəsində kütüm balığı alırıq. Bayram süfrəsinin əsas nemətlərindən sayılır. Bu il qiymətlər çox bahadır. Əvvəllər kiloqramını 10-12 manata alardıq, indi isə 20 manatdan bahadır. Yerli balıq tapmaq da çətinləşib. Əsasən, İran və Rusiyadan gətirilən kütüm balığı satılır. Onun da dadı fərqlidir", - deyə o əlavə edib.
Lənkəran bazarında 10 ildən artıqdır balıq satan Ramiz Xamıyev qiymət artımının səbəblərini belə izah edir: "Son vaxtlar havaların qeyri-sabit keçməsi yerli balıqçılara balıq tutmaqda çətinlik yaradıb. Dənizdə balıq azalıb, çaylarda da vəziyyət əvvəlki kimi deyil. Ona görə də biz əsasən, İran və Rusiyadan gətirilən kütüm və sazan satırıq. Bu balıqların da qiyməti idxal xərclərinə görə yüksəlib. Kütüm balığı isə Novruz bayramının simvolu olduğu üçün tələbat daha çoxdur, amma bazara az çıxarılır, ona görə də qiyməti artır. İnsanlar yerli balıq axtarır, amma onu tapmaq çətindir. Olanda da baha olur".
Satıcılar qiymət artımını təbii resursların azalması, idxal xərcləri və qarşıdan gələn Novruz bayramı ilə əlaqələndirirlər. Onların sözlərinə görə, bayramdan sonra balıq qiymətlərində nisbətən də olsa azalma müşahidə ediləcək. Havaların mülayimləşməsi də qiymətlərin aşağı düşməsinə öz təsirini göstərəcək.
Bölmənin digər xəbərləri
