Lətif Qəndilov: Prezidentlərin razılaşması ən yüksək səviyyədə yerinə yetirilib
Bişkek, 25 aprel, AZƏRTAC
Bişkekdə keçirilən Azərbaycan Mədəniyyəti Günləri triumf ilə başa çatıb. K.Moldobasanov adına Qırğızıstan Milli Konservatoriyasının Böyük konsert zalında Azərbaycan Respublikasının Qırğızıstan Respublikasında Mədəniyyət Günlərinin rəsmi bağlanış mərasimi keçirilib. Mədəni tədbirlər caz konserti ilə başa çatıb.
AZƏRTAC xəbər verir ki, bu barədə “Veçerni Bişkek” qəzeti məlumat yayıb.
Tədbirdə Qırğızıstanın mədəniyyət, informasiya və gənclər siyasəti nazirinin müavini Timurlan Ajımalıyev, Azərbaycan mədəniyyət nazirinin müavini Murad Hüseynov, ölkəmizin Qırğızıstandakı səfiri Lətif Qəndilov, yaradıcı ziyalıların nümayəndələri və tələbələr iştirak ediblər.
T.Ajımalıyev qeyd edib ki, Mədəniyyət Günləri iki xalqın mənəvi yaxınlığı, tarixi bağları və mədəni əməkdaşlığı tarixində daha bir parlaq səhifə açıb. O, Bişkekdə keçirilən tədbirlərin - sərgilərin, ədəbi görüşlərin, konsert proqramlarının və teatr sənəti üzrə ustad dərslərinin cəmiyyəti əsl mənəvi qida ilə zənginləşdirdiyini vurğulayıb.
Öz növbəsində, M.Hüseynov Azərbaycan Mədəniyyət Günlərinin yüksək səviyyədə təşkilinə və yaradılan şəraitə görə Qırğızıstan Respublikasının Mədəniyyət, İnformasiya və Gənclər Siyasəti Nazirliyinə minnətdarlığını bildirib.
Azərbaycanın Qırğızıstandakı səfiri L.Qəndilovun sözlərinə görə, dörd gün davam edən Azərbaycan Mədəniyyət Günləri çərçivəsində iki ölkə arasında mədəni əlaqələrin möhkəmləndirilməsinə yönəlmiş ikitərəfli görüşlər və danışıqlar aparılıb. Peşəkar yaradıcı kollektivlər tamaşaçılara Azərbaycan xalqının zəngin və orijinal mədəni irsini əks etdirən parlaq, rəngarəng konsert proqramları təqdim edib, milli mahnı və melodiyalar səsləndirilib, sərgilər təşkil olunub. Bütün tədbirlər tam anşlaqla keçib.
Səfir deyib: “Ölkələrimiz arasında əlaqələr, xüsusən də son üç ildə dərinləşən əməkdaşlıq həm siyasi, həm iqtisadi, həm də mədəni-humanitar istiqamətlərdə sürətlə inkişaf edir. Biz ortaq keçmişin, tarixin birləşdirdiyi xalqlarıq və bir-birimizi milli incəsənətimizin gözəlliyi, zəngin mədəniyyətimiz, adət-ənənələrimiz ilə daha yaxından tanış etməliyik. Mədəniyyət sahəsi bizim yaxın olduğumuzu göstərən geniş imkanlara malikdir, onun vasitəsi ilə qardaşlığımızı şüurlu şəkildə formalaşdırmaq, xalqlarımıza göstərmək imkanı var.
İki il əvvəl ölkələrimizin prezidentləri - İlham Əliyev və Sadır Japarov Bakıda və Bişkekdə qarşılıqlı Mədəniyyət günlərinin keçirilməsinə dair razılıq əldə etmişdilər və mən dövlət başçılarının qarşıya qoyduğu vəzifənin ən yüksək səviyyədə yerinə yetirilməsi münasibətilə hər iki ölkənin mədəniyyət nazirliklərini təbrik etmək istərdim”.
Mədəni tədbirlərin əhəmiyyətini qeyd edən L.Qəndilov daha sonra vurğulayıb: “Keçən il Bakıdakı Mədəniyyət Günləri hər bir azərbaycanlının ürəyincə olan məkanda - Heydər Əliyev Mərkəzində keçirildi. Bu tamaşa zalında çıxış etmək hər kəsə nəsib olmur. Lakin o, öz qapılarını qardaş qırğız xalqının üzünə geniş surətdə və qonaqpərvərliklə açıb.
Bu yaxınlarda Azərbaycan Dövlət Akademik Milli Dram Teatrında Qırğızıstanın görkəmli Xalq yazıçısı Kayrat İmanəliyevin əsəri əsasında hazırlanmış “Dədə Qorqud” tamaşası nümayiş etdirilib. Bakı tamaşaçıları - ziyalılar, teatrsevərlər qırğızıstanlı sənət adamlarını əsl hərarət və səmimi heyranlıqla qarşıladılar. Tamaşa teatrsevərlərdə unudulmaz təəssürat yaratdı. Onlar tamaşanın təkcə bədii dəyərini deyil, həm də dərin fəlsəfi mahiyyətini yüksək qiymətləndiriblər. Nümayəndə heyətinin üzvləri, incəsənət xadimləri, Azərbaycanın Mədəniyyət Nazirliyi, Xarici İşlər Nazirliyi adından Bişkekdə Azərbaycan Mədəniyyəti Günlərinin təşkilinə görə Qırğızıstan tərəfinə dərin minnətdarlığımı bildirmək istəyirəm. Ölkələrimizdə Mədəniyyət Günlərinin keçirilməsi ictimai həyatda nəzərəçarpacaq və əlamətdar hadisəyə çevrilib, habelə geniş rezonans doğurub”.
Mədəniyyət günləri Azərbaycanda və xaricdə tanınmış kollektivlərin möhtəşəm çıxışları ilə başa çatıb. Günün ikinci yarısında Qırğızıstanın “Manas” Milli Teatrında Azərbaycanın Qədim Musiqi Alətləri Ansamblının konserti olub. Axşam isə Elbəy Məmmədzadə (piano), Saleh Məmmədov (bas gitara) və Eyvaz Həşimovdan (zərb alətləri) ibarət “Etno-Jazz” triosu caz həvəskarları üçün çıxış edib. Qrup Azərbaycan bəstəkarları Arif Məlikov, Tofiq Quliyev, Vaqif Mustafazadənin əsərlərini, həmçinin caz aranjemanında dünya klassiklərindən fraqmentləri ifa edib. Bu qrupun üzvləri öz sənət janrlarını layiqincə təmsil edən dünyasəviyyəli musiqiçilərdir. Onlar öz bəstələrində müasir musiqini Şərqin mənəvi mədəniyyətində dərin kök salmış Azərbaycan xalq musiqisi - muğamla şərh edirlər. Ona görə də deyə bilərik ki, Azərbaycan cazında nəsillərin dialoqu hiss olunur. Caz muğamının nadir nümunələri ilə tanış olan Qırğızıstan ictimaiyyəti isə bu unikal musiqi janrını və ifaçıların məharətini yüksək qiymətləndirib, hər nömrəni gurultulu alqışlarla qarşılayıb.
Beləliklə, Qırğızıstandakı mədəniyyət bayramı başa çatdı, dost Azərbaycanın nümayəndə heyəti vətənə uçdu. Ancaq işıq və əmin-amanlıqla dolu günlər xoş təəssürat yaratdı, bir çox qırğızıstanlıları zəngin mədəni irsə malik bu gözəl ölkəni öz gözləri ilə görməyə ruhlandırdı.
Bölmənin digər xəbərləri
