Leysan yağışla müşayiət olunan güclü külək Ağdam və Tərtər rayonlarına ziyan vurmuşdur
Ağdam, 23 may (AZƏRTAC). Mayın 22-də axşam saatlarında başlayan leysan yağışla müşayiət olunan güclü külək Ağdam və Tərtər rayonlarının yaşayış məntəqələrinə ziyan vurmuşdur.
AZƏRTAC xəbər verir ki, Dördyol ərazisində məskunlaşan ağdamlı məcburi köçkünlərə məxsus 3 evin dam örtüyü yararsız vəziyyətə düşmüş, 11 evə, Ergi ərazisində 3 evə, Quzanlı qəsəbəsində 2 evə, həmçinin taxıl zəmilərinə ziyan dəymiş, 10 kv-luq elektrik xətti qırılmış, 20-yə yaxın elektrik dirəyi aşmışdır.
Əsən güclü külək və leysan xarakterli yağış nəticəsində Tərtər rayonunun Azad Qaraqoyunlu, Köçərli, Qaynaq, İsmayılbəyli, Düyərli və Dəmirçilər kəndlərində fərdi yaşayış evlərinin və inzibati binaların 1670 ədəd şifer, 8 kubmetr taxta materialları yararsız hala düşmüş, elektrik təsərrüfatına, telekommunikasiya qovşağına xeyli ziyan dəymişdir.
Rayon fövqəladə hallar komissiyaları tərəfindən təbii fəlakətin törətdiyi fəsadların aradan qaldırılması istiqamətində iş aparılır.
Bölmənin digər xəbərləri
