Macarıstan Beynəlxalq Cinayət Məhkəməsini tərk edir
Budapeşt, 3 aprel, AZƏRTAC
Bu gündən etibarən Macarıstan hökuməti ölkənin Beynəlxalq Cinayət Məhkəməsindən (BCM) çıxması təşəbbüsü ilə çıxış edir.
AZƏRTAC xəbər verir ki, bu barədə Macarıstan Baş nazirinin aparat rəhbəri Qergeli Qulyaş məlumat verib. O, BCM-nin ilkin məqsədindən uzaqlaşaraq siyasi təşkilata çevrildiyini, İsrailin Baş naziri Benyamin Netanyahunun ittiham aktının buna misal olduğunu deyib. “Hökumət bu prosesi qəbuledilməz hesab edir və buna görə də artıq məhkəmənin işində iştirak etmək istəmir”, -deyə Q.Qulyaş bildirib.
O əlavə edib ki, hökumət Konstitusiya və beynəlxalq hüquqi çərçivəyə uyğun olaraq, aprelin 3-də, cümə axşamı günü məhkəməni tərk etmə prosesinə başlayacaq.
“Beynəlxalq Cinayət Məhkəməsi nəcib təşəbbüs idi, amma son vaxtlar onun siyasi quruma çevrildiyinin şahidi oluruq. İsrailin Baş naziri Benyamin Netanyahuya qarşı irəli sürülən ittihamlar isə buna ən acınacaqlı nümunədir”, –deyə aparat rəhbəri qeyd edib.
O, Macarıstanın artıq xüsusi vəziyyətdə olduğunu onunla izah edib ki, digər BCM üzvü olan ölkələrdən fərqli olaraq, ölkə parlamenti heç vaxt bu məhkəmənin nizamnaməsini qəbul etməyib (Roma Statutu - AZƏRTAC-ın qeydi). Ona görə də bu, daxili qanunvericiliyin tərkib hissəsi deyil. “Bizim aydın hüquqi mövqeyimiz ondan ibarətdir ki, Macarıstanda BCM-nin Nizamnaməsinə əsasən heç kim həbs edilə və burada heç bir şəxsə qarşı hər hansı bir “proses” başlana bilməz”, -deyə Q.Qulyaş vurğulayıb.
Onun sözlərinə görə, Macarıstan bu şübhəli vəziyyəti Roma Statutuna qoşulmaqla deyil, denonsasiya proseduru əsasında BCM-dən çıxmaqla həll etmək niyyətindədir.
Son zamanlar BCM-nin fəaliyyəti ilə bağlı beynəlxalq səviyyədə ciddi narahatlıq ifadə olunur. Birləşmiş Ştatlar, Çin və Türkiyə heç vaxt BCM-nin üzvü olmayıb və ABŞ Konqresi iki partiyanın dəstəyi ilə bu məhkəmənin hakimlərinə sanksiya tətbiq etmək barədə qərar qəbul edib. Üstəlik, avropalı tərəfdaşlar arasında Almaniyanın gələcək Kansleri və Polşanın hazırkı Baş naziri daxili hüquqi öhdəliklərinə baxmayaraq, Məhkəmənin qərarına məhəl qoymayacaqlarını və İsrailin Baş nazirinin onların ərazilərində keçirilən tədbirlərdə iştirak edə biləcəyini bəyan ediblər.
Bütün bunlar sübut edir ki, BCM-nin fəaliyyəti ilkin məqsəddən kənara çıxıb və Budapeşt cinayət məhkəməsindən siyasi məhkəməyə çevrildiyi üçün gələcəkdə BCM-nin üzvü olmaq istəmir”, -deyə Macarıstan Baş nazirinin aparat rəhbəri bildirib.
Vüqar Seyidov
AZƏRTAC-ın xüsusi müxbiri
Budapeşt
Bölmənin digər xəbərləri
