Magistratura səviyyəsinə əlavə yerləşdirmə ilə qəbul olanların nəzərinə
Bakı, 20 avqust, AZƏRTAC
Ali təhsil pilləsinin magistratura səviyyəsinin boş qalan plan yerlərinə əlavə yerləşdirmə ilə qəbul olan namizədlərin qeydiyyat prosesinə avqustun 21-i saat 11:00-da start veriləcək.
Elm və Təhsil Nazirliyindən AZƏRTAC-a bildirilib ki, namizədlər https://portal.edu.az/ platformasında “Ali və orta ixtisas təhsili müəssisələrinə təhsilalanın qeydiyyatı” xidmətini seçməklə müraciət edə bilərlər.
Elektron sistem üzrə qeydiyyat avqustun 28-i saat 18:00-da yekunlaşacaq.
Müvafiq xidmətdən istifadə etməklə qeydiyyatdan keçməyən və təhsil müəssisəsindən təsdiq almayan şəxslər qəbul olanların siyahısından xaric ediləcəklər.
Qeyd edək ki, müraciətlərin elektronlaşdırılması nəticəsində tələbələr təhsil müəssisəsinə getmədən təhsil haqqını bank, poçt, “eManat” vasitəsilə nağd şəkildə ödəyə bilərlər. Nağdsız ödəniş üçün isə tələbələr “portal.edu.az” və ya bankların mobil tətbiqlərindən istifadə edə bilərlər.
Bölmənin digər xəbərləri
