REGİONLAR
Masallı: Cənub bölgəsinin turizm mərkəzi
Masallı, 25 iyun, Bağır Əliyev, AZƏRTAC
Azərbaycanın bölgələrində mövcud olan turizm potensialı, ilk növbədə, regionlarımızın əlverişli təbii-coğrafi mövqedə yerləşməsi, zəngin flora-faunası və gözəl təbiəti ilə şərtlənir. Son vaxtlar müasir tələblərə cavab verən istirahət mərkəzlərinin və turizm obyektlərinin tikintisi, yol infrastrukturunun yenilənməsi turistlərin bölgələrə axınına səbəb olub.
Cənub bölgəsində turizmin inkişaf etdiyi rayonlardan biri də Masallıdır. Masallı rayonu geniş turizm potensialına malikdir. Təbiət bu yerlərdən öz səxavətini əsirgəməyib, bərəkət boxçasını bütünlüklə onun qarşısında açıb. Masallı bir tərəfdən Xəzər dənizi, digər tərəfdən Talış dağları ilə sərhəddir. Rayon ərazisindən axan Viləş, Alvadiçay və Tatyan çayları Xəzər dənizinə tökülür.
Mənbəyini Yardımlı və Lerik rayonlarının ərazisindən, Talış dağlarından götürən, uzunluğu 115 kilometr olan Viləş çayında 1976-cı ildə ümummilli lider Heydər Əliyevin təşəbbüsü ilə su dəryaçasının bünövrəsi qoyulub. Viləşçay dəryaçası bu gün ulu öndər Heydər Əliyevin adını daşıyır.
Masallı bulaqları ilə də məşhurdur. Təkcə rayonun Ərkivan kəndində 37 bulaq var.
Bu gözəl məkan yeraltı və yerüstü sərvətlərlə zəngindir. Dağlar qoynunda yerləşən “İsti-su” istirahət mərkəzi turistlərin daha çox gəldiyi şəfa ocağıdır. Yerin dərinliklərindən çıxan isti sudan yel, oynaq, əzələ, əsəb sistemi, dəri, mədə-bağırsaq və qadın xəstəliklərinin müalicəsində istifadə edilir.
Rayon ərazisində yerləşən Qızılağac qoruğu da diqqətçəkən məkanlardandır. Burada 248 növ quş və 54 növ balıq var.
Masallı özünün qalaları, ziyarətgahları, hamamları, bulaqları ilə məşhurdur. Bu rayonun ərazisində 168 qədim abidə mövcuddur. Bunlardan 51-i tarix və memarlıq, 70-i arxeoloji abidədir.
Masallı Rayon Mədəniyyət Mərkəzinin direktoru Vəkil İsmayılov AZƏRTAC-a bildirib ki, rayonda mövcud olan 32 turizm obyektində gün ərzində 1300-ə yaxın turistin istirahəti üçün hər bir şərait yaradılıb.
Ötən il Masallı rayonuna 22 min 750 turistin gəldiyini bildirən V.İsmayılov bunun 907 nəfərinin xarici ölkələrin vətəndaşları olduğunu diqqətə çatdırıb.
Masallıda istirahət edən turistlər üçün rayonun görməli yerlərinə, tarix və mədəniyyət abidələrinə səyahətlər, gəzintilər təşkil edilir.
V.İsmayılov qeyd edib ki, turistlər üçün, həmçinin milli mənəvi dəyərlərimizin daşıyıcısı olan xalq tətbiqi sənəti nümunələrindən ibarət satış yarmarkaları, müxtəlif əyləncəli oyunlar, musiqili gecələr keçirilir: “Bütün bunların nəticəsidir ki, Masallıda turizm mövsümi xarakter daşımır. Turistlər bu gözəl məkana ilin bütün fəsillərində gəlirlər. Buna müvafiq olaraq buradakı otellərdəki şərait qonaqları qarşılamağa uyğunlaşdırılıb”.
Rayonun turizm obyektlərində və istirahət mərkəzlərində turistlərə üç istiqamət üzrə xidmətlər təklif olunur. Buraya rayonun təbiəti, gəzməli-görməli yerləri, zəngin flora və faunası, tarixi abidələri ilə tanışlıq daxildir.
Rayonun “Viləş”, “Gülüstan”, “Dəştvənd”, “Palma”, “Cənnət bağı”, “Nağıl dünyası” “Zirvə”, “Dəmirağac” istirahət mərkəzlərində turistlərin dincəlməsi üçün lazımi şərait yaradılıb.
V.İsmayılov bildirib ki, yay turizm mövsümünün başlanması ilə əlaqədar rayon mədəniyyət və turizm şöbəsinin əməkdaşları turizm və istirahət mərkəzlərində monitorinqlər apararaq, sanitariya-gigiyena qaydalarına ciddi əməl olunması, turistlərə göstərilən xidmətin səviyyəsinin yüksəldilməsi ilə bağlı xidmət obyektlərinin rəhbərlərinə tövsiyələr və tapşırıqlar veriblər.
Xatırladaq ki, Masallı 2012-ci ildə “Azərbaycanın folklor paytaxtı” elan edilib. Elə həmin ilin iyun ayında bu layihə çərçivəsində Masallı şəhərində birinci, 2013-cü ildə ikinci, 2014-cü ildə üçüncü Beynəlxalq Folklor Festivalı keçirilib. Beynəlxalq festivallarda Azərbaycanın folklor kollektivləri ilə bərabər, Türkiyə, Rusiya, İran, Gürcüstan, Özbəkistan, Ukrayna, Qazaxıstan, Latviya və digər ölkələrin folklor kollektivləri də iştirak ediblər. Azərbaycanın milli mədəniyyətinin təbliğində, ölkəmizin tanınmasında bu festivalların da mühüm əhəmiyyəti var.
Masallı rayonu turizmim inkişafı üçün geniş imkanlara malikdir. Hər cür sosial infrastruktura, gözəl təbiətə, ləziz mətbəxə malik olan turizm məkanlarında və istirahət mərkəzlərində dincələn turistlər onlara göstərilən xidmətdən razılıq edirlər.