Masallıda “Qafqaz bəbirlərinin (Panthera pardus) mühafizəsi” layihəsi çərçivəsində yay düşərgəsi təşkil edilmişdir
Masallı, 9 iyul (AZƏRTAC, Bağır Əliyev). İyulun 9-da Masallı rayonundakı “Viləş” otelində Dünya Təbiəti Mühafizə Fondunun (WWF) Azərbaycan Nümayəndəliyinin, IDEA (Ətraf Mühitin Mühafizəsi Naminə Beynəlxalq Dialoq) İctimai Birliyinin, Heydər Əliyev Mərkəzinin və Təhsil Nazirliyinin birgə təşkilatçılığı ilə həyata keçirilən “Qafqaz bəbirlərinin (Panthera pardus) mühafizəsi” layihəsi çərçivəsində “Bəbirləri qoruyaq!” yay düşərgəsi fəaliyyətə başlamışdır.
AZƏRTAC xəbər verir ki, Astara, Lənkəran və Lerik rayonlarından olan 30-dan çox məktəblinin iştirak etdiyi yay düşərgəsinin əsas məqsədi Qafqaz bəbirlərinin məskunlaşdıqları yerlərin yaxınlığında yaşayan məktəbliləri bu nadir heyvan növü haqqında məlumatlandırmaq və onun mühafizəsi işini təbliğ etməkdir.
Üç gün davam edəcək düşərgədə məktəblilər bəbirlərin həyat tərzi, yayıldıqları ərazilər, onların əhəmiyyəti haqqında geniş məlumat toplayacaq, müxtəlif ekoloji tədqiqatların aparılmasında, viktorina və müsabiqələrdə iştirak edəcəklər.
Yay düşərgəsinin açılış mərasimində çıxış edən Dünya Təbiəti Mühafizə Fondunun Azərbaycan Nümayəndəliyinin ictimaiyyətlə əlaqələr üzrə meneceri Sevinc Saruxanova bildirmişdir ki, Qafqaz bəbirlərinin qorunmasına yönəlmiş layihənin icrasına 2002-ci ildə başlanılmışdır. Bu dövr ərzində Azərbaycanda bəbirlərin 4 ərazidə məskunlaşdıqları məlum olmuşdur. Bəbirlərin yaşayış məskənlərində xüsusi mühafizə olunan təbiət ərazilərinin sahəsi 4 dəfə artırılmışdır.
Dünya Təbiəti Mühafizə Fondunun Azərbaycan Nümayəndəliyinin direktoru Elşad Əsgərov bu qurumun yaranma tarixi barədə məlumat vermişdir. Qeyd etmişdir ki, ötən əsrin 60-cı illərində İsveçrədə yaradılan təşkilatın hazırda dünyanın 130 ölkəsində nümayəndəliyi fəaliyyət göstərir.
E.Əsgərov Azərbaycan Nümayəndəliyinin fəaliyyət göstərdiyi 12 il ərzində həyata keçirilən layihələr barədə məlumat vermişdir.
IDEA (Ətraf Mühitin Mühafizəsi Naminə Beynəlxalq Dialoq) İctimai Birliyinin ekoloqu Nəzakət İsayeva 2011-ci ildən fəaliyyət göstərən qurumun həyata keçirdiyi layihələr barədə məlumat vermişdir. Bildirmişdir ki, bəbirlərin mühafizəsi ilə bağlı Heydər Əliyev Fondunun vitse-prezidenti, Birliyin təsisçisi və rəhbəri Leyla Əliyevanın Qafqazda nəsli kəsilməkdə olan 5 fauna növünün (ayı, canavar, ceyran, qartal və bəbir) qorunmasını əhatə edən “Böyük beşlik” proqramı çərçivəsində gördüyü işlər öz bəhrəsini verməkdədir.
N. İsayeva layihə çərçivəsində “Eko gündəlik” rəsm və inşa, “Bəbirlərin kostyumu” müsabiqələri keçiriləcəyini diqqətə çatdırmışdır.
Qeyd olunmuşdur ki, bu istiqamətdə görülən işlər sırasında mayın 7-də IDEA (Ətraf Mühitin Mühafizəsi Naminə Beynəlxalq Dialoq) İctimai Birliyinin təşəbbüsü, Heydər Əliyev Fondunun və Heydər Əliyev Mərkəzinin təşkilati dəstəyi ilə Heydər Əliyev Mərkəzində keçirilən pişikkimilər fəsiləsinə aid olan növlərə həsr olunmuş Qafqaz Biomüxtəlifliyi Sammiti bu sahədə xüsusi əhəmiyyət kəsb edir.
Dünyanın qabaqcıl ekspertlərinin iştirakı ilə keçirilən Sammit Qafqazda məskunlaşan bəbirlərin qorunması istiqamətində atılan böyük addımlardan biri olmuşdur.
Diqqətə çatdırılmışdır ki, konfransda çıxış edən Heydər Əliyev Fondunun vitse-prezidenti, IDEA (Ətraf Mühitin Mühafizəsi Naminə Beynəlxalq Dialoq) İctimai Birliyinin təsisçisi və rəhbəri Leyla Əliyeva gənclərin dəstəyi olmadan ətraf mühitin qorunmasına ümid bəsləməyin çətin olduğunu vurğulamışdır.
Təhsil Nazirliyinin nümayəndəsi Lalə Dadaşova, Hirkan Milli Parkının elmi işlər üzrə direktor müavini Hacıağa Cəfərov ölkəmizdə təbiətin mühafizəsi sahəsində görülmüş işlərdən, həyata keçirilən layihələrin əhəmiyyətindən danışmışlar.
Astara rayonunun Siyov kənd sakini Babaxan Rəhmanov 1991-ci ildə rayonun ərazisində, “Şindan” qalasının yaxınlığında bəbirlə qarşılaşdığı səhnədən danışmışdır.
Bildirilmişdir ki, Qafqaz Biomüxləfliyi Sammitinin davamı olaraq keçirilən bu cür yay düşərgələri gənclərin kiçik yaşlarından təbiətin qorunması, biomüxtəlifliyin mühafizəsinə cəlb olunması və onların bu işdə fəallığının artırılması üçün olduqca məqsədəuyğundur.
Yay düşərgəsinin birinci günündə məktəblilər üçün “Bəbirləri qoruyaq” mövzusunda seminar, “İnsan və ətraf mühit” mövzusunda disput keçirilmiş, bəbirlərin həyat tərzi haqqında videofilmlər nümayiş etdirilmiş, dostluq tonqalı ətrafında musiqili əyləncəli proqram təşkil olunmuşdur.
Bölmənin digər xəbərləri
