Masallıda təşkil olunmuş yay düşərgəsinin ikinci günündə məktəblilər meşədə ekoloji tədqiqatlar aparmışlar
Masallı, 10 iyul (AZƏRTAC). Masallı rayonundakı “Viləş” otelində Dünya Təbiəti Mühafizə Fondunun (WWF) Azərbaycan Nümayəndəliyinin, IDEA (Ətraf Mühitin Mühafizəsi Naminə Beynəlxalq Dialoq) İctimai Birliyinin, Heydər Əliyev Mərkəzinin və Təhsil Nazirliyinin birgə təşkilatçılığı ilə həyata keçirilən “Qafqaz bəbirlərinin (Panthera pardus) mühafizəsi” layihəsi çərçivəsində “Bəbirləri qoruyaq!” yay düşərgəsinin ikinci günü tədbirlərlə zəngin olmuşdur.
AZƏRTAC xəbər verir ki, Astara, Lənkəran və Lerik rayonlarından olan 30-dan çox məktəblinin iştirak etdiyi yay düşərgəsinin əsas məqsədi Qafqaz bəbirlərinin məskunlaşdıqları yerlərin yaxınlığında yaşayan məktəbliləri bu nadir heyvan növü haqqında məlumatlandırmaq və onun mühafizəsi işini təbliğ etməkdir.
Düşərgənin ikinci günündə məktəblilər hidroloji tədqiqat metodlarını öyrənərək suyun təmizliyini təyin etmişlər.
Bundan əlavə, insan fəaliyyətinin meşələrə təsirini öyrənmək üçün yaxınlıqdakı ərazidə olan meşə sahəsində ekoloji tədqiqatlar aparılmışdır.
Meşə ağaclarının diametri, hündürlüyü, yaşı biometrik üsullarla təyin olunmuş, ağacların ekoloji xüsusiyyətləri öyrənilmişdir.
Təhsil Nazirliyinin Respublika Ekoloji Tərbiyə və Təcrübəçilik Mərkəzinin əməkdaşı Lalə Dadaşova qeyd etmişdir ki, meşə ətrafı dağ kəndlərində meşələrin tükənməsinin qarşısının alınmasında məktəblilərin ekoloji maarifləndirilməsinin böyük əhəmiyyəti vardır.
Bu məqsədlə bəbirlərin yaşadıqları meşə ekosistemlərinə insan təsirini azaltmaq və ətraf mühiti çirklənmədən, ekoloji tarazlığın pozulmasından qorumaq məqsədilə məktəblilərin iştirakı ilə yay düşərgəsində ekoloji tədqiqatların öyrənilməsi bu problemlərin həllinə kömək edə bilər.
Düşərgədə məktəblilər arasında “Bəbirlərin həyatı” mövzusunda rəsm müsabiqəsi keçirilmişdir.
Məktəblilər ekoloji viktorinada bəbirlərin həyatı, əhəmiyyəti, tükənməsinin səbəbləri haqqında sualları cavablandırmış, həm də ətraf mühit haqqında biliklərini nümayiş etdirmişlər.
Müsabiqə və viktorinanın yekunlarına əsasən, qaliblərə qiymətli hədiyyələr təqdim olunmuşdur.
Aparılan ekoloji tədqiqatların, disput və müzakirələrin canlı və maraqlı formada keçirilməsi gənc nəslin ekoloji problemlərə biganə qalmadığını göstərir.
Dünya Təbiəti Mühafizə Fondunun Azərbaycan Nümayəndəliyinin direktoru Elşad Əsgərov qeyd etmişdir ki, Hirkan meşələri zəngin biomüxtəlifliyə malikdir, burada bir çox relikt və endemik növlərə rast gəlmək olar. Sevindirici haldır ki, bu vacib eksosistemin tam yarısı son illərdə xüsusi mühafizəyə alınmışdır və bəbirlə yanaşı, onun qida obyektləri də qorunmaqdadır.
Hirkan Milli Parkının ərazisində 3-4 bəbir ailəsinin sərbəst yaşayıb çoxalması üçün şərait yaradılmışdır.
Milli Parkın ətrafında yaşayan əhalinin, xüsusilə də şagirdlərin maarifləndirilməsi, onların mühafizə tədbirlərinə cəlb olunması bu ekosistemin qorunmasına öz töhfəsini verəcəkdir.
Bölmənin digər xəbərləri
