MDB VƏ AVROPA ÖLKƏLƏRİNİN ENERJİ SİSTEMLƏRİ ARASINDA ƏMƏKDAŞLIĞIN PERSPEKTİVLƏRİ MÜZAKİRƏ EDİLMİŞDİR
”Avroelektrik”in və MDB Elektroenergetika Şurası İcraiyyə komitəsinin birgə əlaqələndirmə komitəsinin Moskvada keçirilən 7-ci iclasında MDB və Avropa ölkələrinin enerji sektorlarında bazar islahatları, habelə bu sahədə əməkdaşlığın perspektivləri müzakirə olunmuşdur.
“Azərenerji”nin mətbuat xidmətindən bildirmişlər ki, iclasda SC-nin perspektiv layihələr və inkişaf şöbəsinin müdiri Azər Xammədov iştirak etmişdir. “Avroelektrik”in nümayəndələri Azərbaycanın enerji sektorunda aparılan islahatları müsbət qiymətləndirmişlər. Onların fikrincə, respublikanın enerji sisteminin Avropa enerji sisteminə inteqrasiyası üçün inkişaf etmiş, beynəlxalq standartlara cavab verən hüquqi baza yaradılmalı, bazar qanunları real surətdə işləməli, tarif siyasəti dəqiq tənzimlənməlidir.
İclasda MDB ölkələrinin enerji sistemlərinin perspektivlərindən və onların paralel rejimdə birləşdirilməsi imkanlarından, Avropa ölkələrinin enerji sistemləri ilə qarşılıqlı əlaqəsindən ətraflı söhbət getmişdir. MDB və Avropa ölkələri dispetçer xidmətlərinin fəaliyyəti haqqında informasiya mübadiləsi də aparılmışdır.
Bölmənin digər xəbərləri
