Meksika və Burkina-Faso növbəti illərdə Dünya Turizm Gününə rəsmi təşkilatçılıq edəcəklər
Bakı, 2 sentyabr (AZƏRTAC). Xəbər verdiyimiz kimi, Afrikanın Zambiya və Zimbabve respublikalarının birgə təşkilatçılığı ilə BMT-nin Dünya Turizm Təşkilatının (DTT) Baş Assambleyasının XX sessiyası keçirilmişdir.
AZƏRTAC DTT-nin rəsmi saytına istinadla xəbər verir ki, sessiyada Meksikanın 2014-cü, Burkina-Fasonun isə 2015-ci il sentyabrın 27-də Dünya Turizm Gününə rəsmi təşkilatçılıq edəcəkləri elan olunmuşdur.
2014-cü ildə Dünya Turizm Gününün mövzusu “Turizm və icmanın inkişafı”, 2015-ci ildə isə “Bir milyard turist - bir milyard imkan” olacaqdır.
Hər il sentyabrın 27-də keçirilən Dünya Turizm Günü turizm sahəsində ən böyük hadisədir. Məqsəd dünya ictimaiyyətinin diqqətini turizmin sosial, mədəni, siyasi və iqtisadi əhəmiyyətinə cəlb etməkdir.
Bu il Maldiv adalarında keçiriləcək Dünya Turizm Gününün mövzusu isə “Turizm və su resursları: ümumi gələcəyimizin qorunması” olacaqdır.
Bölmənin digər xəbərləri
