Millinin baş məşqçisi: Vurduğumuz ikinci qol komandamızı ruhlandırdı və qələbəyə inamı artırdı
Bakı, 17 mart, AZƏRTAC
“Bolqarıstanla çətin oyunda qalib gəldik. Rəqibi öncədən təhlil etmişdik və bizi gərgin mübarizənin gözlədiyini bilirdik”.
AZƏRTAC xəbər verir ki, bu sözləri 17 yaşadək qızlardan ibarət Azərbaycan millisinin baş məşqçisi Nərgiz Qurbanova Bakıda təşkil edilən Avropa çempionatının II seçmə mərhələsində Bolqarıstan yığması ilə keçirilən oyunla bağlı AFFA-nın rəsmi saytına açıqlamasında deyib.
Mütəxəssis 3:2 hesablı qələbəni şərh edib: “Bolqarıstan yığması ilk matçla müqayisədə bizə qarşı əsas heyət oyunçularını meydana buraxmamışdı. Bu da onların görüşə rahat çıxdıqlarını göstərirdi. Fürsəti lazımınca dəyərləndirərək birinci hissədə əks-hücumdan qol vurduq. İkinci hissədə bolqarların əsas heyət üzvləri mübarizəyə qoşuldular. Buna baxmayaraq, ikinci qolu vurmağımız komandamızı ruhlandırdı və qələbəyə inamı artırdı. Son dəqiqələrdə hesabda bərabərlik yaransa da, sona qədər eyni ruh yüksəkliyi ilə çıxış etdik. Nəticədə qələbə qolunu vurmağı bacardıq”.
Qeyd edək ki, B Liqasının 2-ci qrupunda yer alan yığma ilk iki turdan sonra 3 xalla ikinci pillədə qərarlaşır. Komanda son tur çərçivəsində martın 18-də Malta seçməsi ilə qarşılaşacaq.
Bölmənin digər xəbərləri
