“Minasız dünya - vətəndaş cəmiyyəti təşəbbüsləri” adlı tədbir keçirilib
Bakı, 4 aprel, AZƏRTAC
Qeyri-Hökumət Təşkilatlarına Dövlət Dəstəyi Agentliyində Beynəlxalq Mina Xəbərdarlığı və Minatəmizləmə Fəaliyyətinə Yardım Günü ilə bağlı “Minasız dünya - vətəndaş cəmiyyəti təşəbbüsləri” adlı tədbir keçirilib.
AZƏRTAC xəbər verir ki, Agentliyin Layihələrin idarə edilməsi departamentinin müdiri Elnur Bağırlı çıxışında minalar və partlamamış hərbi sursatların təkcə münaqişə zonalarında deyil, eyni zamanda, onilliklər boyu mülki əhaliyə ciddi təhlükə yaradan qlobal bir problem olduğunu diqqətə çatdırıb. Qeyd edib ki, Agentliyin fəaliyyətində mina problemlərinin işıqlandırılması, Azərbaycanın mina problemlərinin dünya ictimaiyyətinə çatdırılması prioritet məsələlərdən biri olaraq ön plandadır. Agentlik tərəfindən 2021-2025-ci illərdə mina ilə bağlı 24 layihəyə 355 min 500 manat maliyyə vəsaiti: "Postmünaqişə dövründə 383 vətəndaşımızın mina partlayışında həyat və sağlamlıqlarının itirib, ümumilikdə isə Azərbaycanda 4 minə yaxın mina qurbanı var".
Beynəlxalq Avrasiya Fondunun prezidenti Umud Mirzəyev bildirib ki, son illər mina problemi olan ölkələrin sayı artmaqdadır: “Azərbaycanda mina terroru ilə mübarizədə vətəndaş cəmiyyəti üzvləri xüsusi yer alır. Hesab edirəm ki, ölkəmizdə fəaliyyət göstərən qeyri-hökumət təşkilatlarının Azərbaycanda minalarla bağlı həyata keçirilən layihələrdə birgə fəaliyyət göstərməsi məqsədəuyğundur".
"Minalar Əleyhinə Azərbaycan Kampaniyası" İctimai Birliyinin sədri Hafiz Səfixanov bildirib ki, rəhbəri olduğu təşkilatın 27 şəhər və rayonda həyata keçirdiyi layihələr çərçivəsində 594 nəfər mina qurbanı iştirak edib, bəzi rayonlarda bu qəbildən olan şəxslər üçün arıçılıq və heyvandarlıq təsərrüfatı yaradılıb.
"Alternativ” Kommunikasiya və Tədqiqatlar İctimai Birliyinin sədri Anar Yusifoğlu bildirib ki, mina qurbanları torpağına geri qayıtmaq istəyən məcburi köçkünləri, orada tikinti-quruculuq işlərində iştirak edən şəxslər, eləcə də işğaldan azad olunmuş ərazilərdə heyvandarıq, əkinçiliklə məşğul olanlardır: "Bu vəziyyət təkcə bu günümüzü deyil, gələcəyimizi də girov saxlayır. Minalardan təmizlənmiş torpaq həyatın yenidən cücərdiyi torpaqdır. Biz QHT-lər olaraq maarifləndirmə işləri aparmalıyıq. Təəssüf ki, beynəlxalq təşkilatlar buna kifayət qədər dəstək vermir. Biz əngəlsiz qayıdış üçün mübarizəmizi davam etdirəcəyik".
Qeyd olunub ki, Qeyri-Hökumət Təşkilatlarına Dövlət Dəstəyi Agentliyinin yardımı ilə mina təhlükəsi sahəsində silsilə hesabatlar hazırlanaraq ictimaiyyətə təqdim olunub. İştirakçılara, həmçinin 2020-ci ildə Agentliyin dəstəyi ilə Cenevrədə BMT çərçivəsində keçirilən konfransda Azərbaycandakı mina təhlükəsi barədə məlumat verilib. Bildirilib ki, son 3 ildə həyata keçirilən layihələr zamanı hazırlanan hesabatlar beynəlxalq qurumların yekun hesabat sənədlərində də əks olunub.
Tədbirdə Qeyri-Hökumət Təşkilatlarına Dövlət Dəstəyi Agentliyinin dəstəyi ilə "Gilavar Foto Klubu" İctimai Birliyinin mina təhlükəsi ilə bağlı hazırladığı film nümayiş etdirilib.
Bölmənin digər xəbərləri
