Misirdə koronavirusdan ölənlərin sayı 10 nəfərə çatıb
Qahirə, 22 mart, AZƏRTAC
Misirdə koronavirusdan ölənlərin sayı 10 nəfərə çatıb. Şənbə günü daha iki ölüm faktı qeydə alınıb.
AZƏRTAC xəbər verir ki, bu barədə məlumat verən Səhiyyə Nazirliyinin mətbuat katibi Xalid Meqahed şənbə günü virusa daha 9 yoluxma halının qeydə alındığını bildirib. O əlavə edib ki, bu günədək ölkədə 294 nəfərdə COVID-19 virusu aşkar edilib.
Nazirliyin rəsmisi qeyd edib ki, son bir sutkada koronavirusa yoluxanların hamısı Misir vətəndaşlarıdır. Onlar xəstəxanalarda karantin altına alınıb və vəziyyətləri sabitdir. Həyatını itirənlər isə 68 yaşlı qadın və 75 yaşlı kişidir. Onların hər ikisi Giza vilayətinin sakinləridir. Meqahed əlavə edib ki, indiyədək koronavirusdan müalicə olunan 41 nəfər sağalıb.
Misirin Səhiyyə Nazirliyi dezinfeksiya işlərinin aparılması tələbi ilə vilayətlərin qubernatorlarına müraciət ünvanlayıb. Hazırda ölkənin bütün aeroportlarında profilaktik tədbirlər görülür, təkcə çarter uçuşları qəbul edilir.
Oqtay Bayramov
AZƏRTAC-ın xüsusi müxbiri
Qahirə
Bölmənin digər xəbərləri
