MOLDOVADA QAQAUZLARIN II BEYNƏLXALQ QURULTAYI KEÇİRİLƏCƏKDİR
Bakı, 17 avqust (AZƏRTAC). Moldovanın “İnfo-Prim Neo” portalının yazdığına görə, avqustun 18-də Komrat şəhərində qaqauzların II ümumdünya qurultayı işinə başlayacaqdır.
Azərbaycan, Türkiyə, Rusiya Federasiyası, Rumıniya və Bolqarıstanın qaqauz icmaları nümayəndələrinin qurultayda iştirak edəcəyi gözlənilir.
Forum iştirakçıları dünya qaqauzlarının mədəniyyət mərkəzinin açılışını, dil problemlərini və digər məsələləri müzakirə edəcəklər.
Təşkilat komitəsinin mətbuat üçün məlumatında deyilir ki, qurultay sayı təxminən 200 min nəfər olan qaqauz xalqının etnos kimi qorunması, iqtisadi və mədəni əlaqələrinin möhkəmlənməsi üçün mühüm hadisədir.
Birinci forum 2006-cı ildə keçirilmişdi.
Qaqauzların II ümumdünya qurultayı avqustun 20-də başa çatacaqdır.
Zeynal Ağazadə
AZƏRTAC-ın xüsusi müxbiri
Bölmənin digər xəbərləri
