Müdafiə və təhlükəsizlik sisteminin möhkəmləndirilməsi Azərbaycanın suverenliyinin təminatıdır - ŞƏRH
Bakı,19 dekabr, Səbinə Əlizadə, AZƏRTAC
Azərbaycanda dövlət siyasətinin prioritet istiqamətləri ölkənin ərazi bütövlüyünün və suverenliyinin qorunması, eləcə də vətəndaşların rifahının təmin olunmasıdır. Bu məqsədlərə nail olmaq üçün güclü ordu quruculuğu, müdafiə və təhlükəsizlik sisteminin davamlı şəkildə möhkəmləndirilməsi dövlət siyasətinin əsas sütunlarından biri kimi müəyyənləşdirilib.
Bu fikirləri AZƏRTAC-a açıqlamasında Milli Məclisin deputatı Arzu Nağıyev bildirib.
O qeyd edib ki, Prezident İlham Əliyev Milli Məclisdəki çıxışlarında sərhədlərin möhkəmləndirilməsinin, müasir texnologiyalara və silah sistemlərinə əsaslanan təhlükəsizlik mexanizmlərinin qurulmasının son dərəcə vacib olduğunu dəfələrlə vurğulayıb. Müdafiə və təhlükəsizlik sahəsində əsas hədəf NATO standartlarına uyğun, çevik və yüksək döyüş qabiliyyətinə malik müasir ordunun formalaşdırılmasıdır.
Arzu Nağıyev bildirib ki, Komando qoşun növlərinin yaradılması, milli kadr potensialının yetişdirilməsi və Silahlı Qüvvələrin müasir silahlarla tam şəkildə təchiz olunması bu siyasətin əsas istiqamətlərindəndir. Azərbaycan Ordusunun silahlanmasında Türkiyə, Pakistan, İsrail və bir sıra Avropa ölkələri ilə əməkdaşlıq prioritet hesab olunur və bu xətt ardıcıl şəkildə davam etdirilir.
“Müdafiə siyasətinin mühüm tərkib hissələrindən biri də hərbi sənaye kompleksinin inkişafıdır. Əvvəllər Azərbaycan əsasən silah idxal edən ölkə idi. Bu gün isə o, artıq silah ixrac edən dövlət kimi çıxış edir. Hərbi sənaye məhsullarımız beynəlxalq sərgilərdə nümayiş olunur və bu sahədə ixrac imkanlarının genişləndirilməsi istiqamətində addımlar atılır”, – deyə Arzu Nağıyev qeyd edib.
Deputat diqqətə çatdırıb ki, işğaldan azad edilmiş torpaqlarda Komando hərbi hissələrinin yerləşdirilməsi, ərazilərin minalardan təmizlənməsi və təhlükəsizliyin təmin olunması xüsusi maliyyə vəsaiti tələb edir. Bu baxımdan 2026-cı il dövlət büdcəsində müdafiə və təhlükəsizlik xərclərinin artırılması zəruri addım kimi qiymətləndirilməlidir.
Arzu Nağıyev bildirib ki, 2026-cı ilin büdcəsində müdafiə və təhlükəsizlik xərcləri 8 milyard 717 milyon manat səviyyəsində müəyyənləşdirilib və bu məbləğə əlavə olaraq 47 milyon manat vəsait nəzərdə tutulub. Onun sözlərinə görə, bu artım əvvəlki illərlə müqayisədə ümumilikdə 320 milyon manatdan çox vəsait deməkdir.
Deputat bəzi dairələrin “sülh danışıqları fonunda niyə hərbi xərclər artırılır” sualına da münasibət bildirib. O deyib: “Bu, sülh büdcəsidir. Regionda və sərhədlərimizə yaxın ərazilərdə davam edən münaqişələr, müasir dünyada güc amilinin önəminin artması göstərir ki, təhlükəsizlik daim möhkəmləndirilməlidir. Müasir dövrdə kibertəhlükəsizlik də milli təhlükəsizliyin ayrılmaz hissəsinə çevrilib və bu sahədə müasir texnologiyaların tətbiqi zəruridir. 2020-ci ildə qazanılan tarixi Zəfər və 2023-cü ildə həyata keçirilən antiterror tədbirləri Azərbaycanın NATO standartlarına uyğun, dünyanın ən güclü orduları sırasında yer alan Silahlı Qüvvələrə malik olduğunu bir daha sübut edib”.
Deputat əlavə edib ki, strateji əhəmiyyətli ərazilərdə hava limanlarının inşası, xüsusi xidmət orqanlarının və hüquq-mühafizə strukturlarının gücləndirilməsi də ümumi təhlükəsizlik sisteminin əsas elementlərindəndir. “Azərbaycan vətəndaşı bilir ki, onun arxasında güclü ordu, xüsusi xidmət orqanları və hüquq-mühafizə strukturları dayanır. Bu sistemin mərkəzində isə güclü siyasi iradəyə malik Ali Baş Komandan – Azərbaycan Prezidenti İlham Əliyev dayanır”, - deyə Arzu Nağıyev vurğulayıb.
Bölmənin digər xəbərləri
