“Müsəlman Azərbaycanı:Avropada antisemitizm meyllərinə qarşı mübarizə”
Bakı, 4 dekabr, AZƏRTAC
Bu yaxınlarda ABŞ Konqresinin “Roll Call” qəzetində Avrasiya Yəhudilərinin Müdafiəsi üzrə Milli Koalisiyanın sədri Stefan Qrinberqin və bu təşkilatın icraçı direktoru Mark Levinin “Müsəlman Azərbaycanı: Avropada antisemit meyllərinə qarşı mübarizə” sərlövhəli məqaləsi dərc edilib.
Qeyd etmək lazımdır ki, son zamanlar təkcə Şərqi Avropa ölkələrində deyil, həmçinin Qərbi Avropa ölkələrində, ABŞ-da və Kanadada da antisemit əhval-ruhiyyənin güclənməsi müşahidə olunur.
Dünyanın bir sıra ölkələrində antisemitizm təhlükəsinin artdığı şəraitdə multikulturalizmi özünün dövlət siyasəti elan etmiş Azərbaycan əsl tolerant cəmiyyət nümunəsi göstərir. Burada heç vaxt antisemitizm olmayıb.
Yuxarıda adı çəkilən məqalənin müəllifləri Azərbaycanın multikulturalizm siyasətinə heyran olduqlarını gizlətmədən bu ölkədə yəhudi icmasının həyatı barədə həqiqəti oxuculara çatdırmaq istəyirlər.
Genişlənməkdə olan antisemitizm dalğası fonunda keçmiş Sovet İttifaqı məkanındakı respublikalardan biri, Avropanın Cənub-Şərqində, Xəzər dənizi sahillərində yerləşən, əhalisinin əksəriyyəti müsəlman olan, dünyəvi, mötədil siyasət yürüdən Azərbaycan dövləti istisna təşkil edir.
İndi, yeni Konqresin formalaşması mərhələsində İsrailin Konqresdəki dostlarının əksəriyyəti üçün Azərbaycan haqqında daha çox məlumat almağın vaxtıdır. Yaxın vaxtlarda bu ölkənin yəhudi icması Həyəcan Günlərini (müqəddəs Roş-a-şan və Yom-Kipur günləri) dinc şəraitdə qeyd edib, Prezident İlham Əliyev bu münasibətlə onları təbrik edib. Azərbaycanı daha yaxından tanıyan hər kəs yəqin edəcək ki, bu dövlət İsraili necə dəstəkləmək lazım olduğunu göstərən, hörmətə layiq nümunədir.
2500 ildən bəri heç bir təqibə məruz qalmadan bu ölkədə yaşayan, hazırda 35000 nəfər üzvü olan yəhudi icması öz ləyaqətini, hörmətini və dini etiqad azadlığını tamamilə qoruyub saxlayır. İsrailin Azərbaycandakı səfiri Rafi Harpaz sentyabrın 22-də Nyu-Yorkda keçirilən görüşdə qeyd edib ki, Avropadan fərqli olaraq Azərbaycanda antisemitizm yoxdur.
R.Harpaz qeyri-sabitlik zonasının mərkəzində yerləşən Azərbaycanın tolerantlığını yüksək qiymətləndirərək deyib: “Azərbaycan yəhudilərə münasibəti ilə başqa ölkələr üçün model ola bilər”.
Müsəlmanların, xristianların və yəhudilərin dinc yanaşı yaşaması ənənələrinə, Avropa ilə Qərb arasında körpü funksiyasını yerinə yetirməsinə görə Azərbaycan beynəlxalq arenada unikal və müstəsna dərəcədə əhəmiyyətli rol oynayır.
Dünyanın 56 müsəlman ölkəsinin daxil olduğu İslam Əməkdaşlıq Təşkilatının, ATƏT və Avropa Şurası kimi çoxtərəfli Avropa təsisatlarının üzvü olan Azərbaycan Şərq ilə Qərb arasında mühüm əlaqələndirici elementdir.
Ukrayna böhranı göstərir ki, Avropanın qazla təchiz olunması üçün alternativ mənbəyə ehtiyacı var. Azərbaycan bu ehtiyacı Cənub Qaz Dəhlizi vasitəsilə təmin etməyə hazırdır. Avropaya ildə 16 milyard kubmetr qaz nəql edəcək bu layihə üzrə işlər sentyabrın 30-da başlanıb.
Azərbaycan NATO-nun hərbi təlimlərində və “Sülh naminə tərəfdaşlıq” proqramında iştirak edir, Azərbaycan hərbçiləri Amerika əsgərləri ilə birlikdə Əfqanıstanda xidmət ediblər. Azərbaycan həm də Əfqanıstandakı beynəlxalq koalisiya qoşunlarının təchizatının 40 faizə qədərinin göndərilməsi üçün mühüm tranzit məntəqədir.
Bu qeyri-sabitlik dövründə Amerikanın və İsrailin etibarlı dostlara ehtiyacı var. Xoşbəxtlikdən, onlar əlverişli strateji məkanda yerləşən, zəngin enerji resurslarına malik olan, ənənəvi tolerantlığı ilə seçilən və Qərb yönümlü ölkə kimi Azərbaycanın timsalında dost qazana bilər. Kapitoli təpəsində İsrailin dostları çoxdur. Onlar həm də Azərbaycanın dostları olmalıdırlar”.
Bölmənin digər xəbərləri
