-Zati-aliləri, möhtərəm cənab Prezident!

Hesabat dövründə nəqliyyat-yol kompleksinin fəaliyyəti ulu öndər Heydər Əliyevin qurucusu olduğu və cənab Prezident, Sizin rəhbərliyiniz altında hazırda sürətlə inkişaf edən ölkəmizin iqtisadiyyatının və əhalinin nəqliyyat xidmətlərinə olan tələbatının ödənilməsinə, respublikamızın tranzit potensialının artırılmasına, nəqliyyat infrastrukturunun və parkının yeniləşdirilməsinə yönəldilmişdir.

Zati-aliləri, dərin minnətdarlıq hissi ilə qeyd etmək istərdim ki, daimi diqqət və qayğınız sayəsində müasirləşən, sürətlə inkişaf edən, keyfiyyətcə yeni tələblər səviyyəsində formalaşan nəqliyyat sektorunda 2007-ci ilin 9 ayı ərzində müvafiq tədbirlər görülmüşdür. Bu dövrdə bütün növ nəqliyyat vasitələri ilə 88 milyon ton, əvvəlki ilə nisbətən 1,7 faiz çox yük daşınmışdır. Sərnişin daşınması 7,9 faiz artaraq 846 milyon nəfər təşkil etmişdir. Yüklərin 21 milyon tonu dəmir yolu, 7,6 milyon tonu su, 59,2 milyon tonu avtomobil nəqliyyatı ilə daşınmışdır. Sərnişinlərin 713,2 milyon nəfəri avtomobil, 5,1 milyon nəfəri dəmir yolu, 1,2 milyon nəfəri hava nəqliyyatı vasitəsilə daşınmışdır. Ötən dövr ərzində nəqliyyat infrastrukturunun bütün növlərinin davamlı və təhlükəsiz fəaliyyətinin təmin olunması, istismar işinin səmərəli təşkili üçün təsirli tədbirlər həyata keçirilmişdir. Məsələn, Heydər Əliyev adına beynəlxalq hava limanında sərnişinlərə göstərilən xidmətin keyfiyyətinin yüksəldilməsi məqsədi ilə müasir mehmanxana kompleksi istifadəyə verilmiş, Lənkəran və Zaqatala hava limanlarının tikintisi davam etdirilmiş, sifariş verilmiş ATR tipli 6 təyyarədən 2-si artıq respublikaya gətirilmişdir. Su nəqliyyatı sahəsində isə 56 vaqon tutumlu 3 ədəd yeni bərənin alınması nəzərdə tutulmuşdur.

Son bir il yarım ərzində dəmir yolunda 13 ədəd yeni müasir elektrovoz alınmış, dəmir yolu xətlərinin, vaqon və lokomotiv parkının bərpası üzrə müxtəlif miqyaslı təmir işləri həyata keçirilmişdir. Zirə-Pirallahı dəmir yolunda 200 metr sahədə dəniz sularından mühafizə səddi tikilmiş, Araz çayı üzərindəki dəmir yolu körpüsündə yenidənqurma işləri yekunlaşmaq üzrədir.

Zati-alilərinizin şəxsən iştirakı və nəzarəti altında son iki il ərzində aparılmış intensiv danışıqların və keçirilən görüşlərin nəticəsi olaraq, regionda çox böyük və tarixi əhəmiyyət kəsb edən Bakı-Tbilisi-Qars yeni dəmir yolu layihəsinin həyata keçirilməsi prosesinə başlanılmış, Türkiyə ərazisində tikinti işlərini aparacaq podratçı şirkət müəyyənləşdirilmişdir. Həmçinin Gürcüstan ərazisində inşa ediləcək yeni dəmir yolu xətti üzrə tenderin qalibi bu ayın 29-da müəyyənləşdiriləcəkdir. Tikinti işlərinə noyabr ayında başlanılması nəzərdə tutulmuşdur. Layihə ilə bağlı işlər Dövlət Komissiyasının və Əlaqələndirmə Şurasının mütəmadi keçirilən iclaslarında müzakirə olunur.

“Bakı-Tbilisi-Qars” yeni dəmir yolu layihəsinin həyata keçirilməsi ilə əlaqədar tədbirlər haqqında Sizin 2007-ci il 21 fevral tarixli Sərəncamınızda qarşıya qoyulan vəzifələrin yerinə yetirilməsi üçün “Azərbaycan Dövlət Dəmir Yolunun 2008-2011-ci illərdə inkişafına dair Dövlət Proqramı”nın layihəsi işlənib hazırlanmışdır. Bu Proqramın həyata keçirilməsi dəmir yollarında artan yük həcminin daşınması və “Şərq-Qərb” nəqliyyat dəhlizinin Azərbaycan Respublikasının ərazisindən keçən hissəsində dəmir yolu infrastrukturunun yenidən qurulması ilə yanaşı, dəhlizin rəqabət qabiliyyətinin gücləndirilməsinə, yüklərin mənzil başına çatdırılma müddətinin azaldılmasına və hərəkətin təhlükəsizliyinə xidmət edəcəkdir.

Möhtərəm cənab Prezident!

Sizin 2006-cı il 1 fevral tarixli Sərəncamınızla təsdiq edilmiş “Bakı şəhərində nəqliyyat sisteminin təkmilləşdirilməsi üzrə 2006-2007-ci illər üçün Tədbirlər Planı”nına uyğun olaraq, Bakı şəhərində sərnişin daşımalarının təşkili, idarə olunması və tənzimlənməsi ilə əlaqədar mərhələli işlərin görülməsi davam etdirilir. İlk növbədə, sərnişin nəqliyyatı vasitələrinin təhlükəsiz, texniki və ekoloji normalara uyğun istismarının təmin olunması, avtobus dayanacaqlarının yeniləşdirilməsi, taksi dayanacaq yerlərinin yaradılması və şəhər sərnişin nəqliyyatı parkının iri tutumlu avtobuslar hesabına yeniləşdirilməsi ilə bağlı tədbirlər görülür.

Doqquz ay ərzində respublikaya 140 ədəd orta tutumlu yeni müasir avtobus gətirilərək istismara verilmişdir. Noyabr ayının ortalarında Koreya istehsalı olan 60 ədəd, ilin sonuna qədər isə daha 140 ədəd iri tutumlu avtobus gətiriləcəkdir. Yük və sərnişin daşımalarına 828 lisenziya verilmiş, 291 min avtonəqliyyat vasitəsi vergiyə cəlb olunaraq büdcəyə 6 milyon manat vəsait ödənilmişdir.

“Bakı-Naxçıvan-Bakı” avtobus marşrutunun açılması ilə bağlı imzalanmış Memorandumun icrası ilə əlaqədar müvafiq hazırlıq işləri görülmüş, hərəkət cədvəli, marşrut xətləri müəyyənləşdirilmiş, digər texniki məsələlər həll olunmuşdur. Tezliklə tərəflər arasında yekun görüş keçiriləcək və marşrutun işə salınması ilə bağlı qərar qəbul olunacaqdır.

Möhtərəm cənab Prezident! Bakı şəhərində nəqliyyat sisteminin təkmilləşdirilməsinə dair Tədbirlər Planında yol infrastrukturu üzrə nəzərdə tutulmuş işlərin icrası ilə bağlı olaraq hesabat dövründə yol qovşaqlarının və piyada keçidlərinin inşası davam etdirilmiş və 150 milyon manatlıq iş həcmi yerinə yetirilmişdir. Ötən dövr ərzində 5 yol ötürücüsü və 5 piyada keçidi tikilərək, Zati-alilərinizin iştirakı ilə istifadəyə verilmişdir. Nəticədə, bu obyektlərin yerləşdiyi ərazilərdə nəqliyyatın hərəkəti asanlaşmış, hərəkətin və piyadaların təhlükəsizliyi təmin edilmişdir.

Eyni zamanda, tıxacların yaranma səbəblərindən biri olan hərəkət qaydalarının və sürücü intizamının pozulması hallarına qarşı Daxili İşlər Nazirliyinin aidiyyəti qurumları ilə birlikdə müvafiq tədbirlər həyata keçirilir.

Metronun “Əzizbəyov” stansiyası dairəsindən Heydər Əliyev adına beynəlxalq hava limanına qədər 14 kilometr uzunluğunda avtomobil yolunda layihə üzrə tikinti işlərinə başlanılmışdır.

Cari ilin mart-may aylarında ümumi uzunluğu 43,9 kilometr olan Xırdalan-Binəqədi-Balaxanı dairəvi avtomobil yolu təmir olunmuş, sentyabr ayında 6 zolaqlı Zığ-Binə və Bilgəh-Pirşağı avtomobil yollarının tikintisinə başlanılmışdır.

Yanvar ayında respublikanın 3 magistral yolunu birləşdirən, uzunluğu 21,5 kilometr olan “Bakı dairəvi avtomobil yolu”nun da inşasına başlanılmışdır.

“Bakı şəhərində nəqliyyat sisteminin təkmilləşdirilməsi üzrə 2008 - 2010-cu illər üçün əlavə Tədbirlər Planı” layihəsində daha 11 yol qovşağı, 10 piyada keçidi və 13 çoxmərtəbəli avtomobil dayanacağının tikintisi nəzərdə tutulmuşdur.

Şəhər nəqliyyat əməliyyatlarının intellektual idarə edilməsi mərkəzinin yaradılması və Nazirlər Kabinetinin cari ilin birinci rübündə sosial-iqtisadi inkişafın yekunlarına həsr olunmuş iclasında Nəqliyyat Nazirliyinə verilmiş tapşırığın icrasını təmin etmək məqsədi ilə Bakı şəhərində Koreya mütəxəssisləri ilə birlikdə ilkin tədqiqat və layihələndirmə işləri artıq yekunlaşdırılmışdır.

Bakı Beynəlxalq Dəniz Ticarət Limanının, cənab Prezident, Sizin, 2007-ci il 18 oktyabr tarixli Sərəncamınızla ”Şərq-Qərb” və “Şimal-Cənub” nəqliyyat dəhlizlərinin kəsişməsində, respublikanın əsas dəmir yolu və avtomobil yollarına birbaşa çıxışı olan ərazidə inşası ölkəmiz və region üçün böyük əhəmiyyətə malik olmaqla, keyfiyyətcə yeni nəhəng nəqliyyat qovşağının yaradılmasına və gələcəkdə burada azad liman zonasının və logistik idarəetmə sisteminin formalaşmasına şərait yaradacaqdır.

Bakı-Tbilisi-Qars yeni dəmir yolu bağlantısının məntiqi davamı olan bu layihə ölkənin tranzit potensialının genişləndirilməsini və Avropa-Qafqaz-Asiya nəqliyyat dəhlizinin rəqabət qabiliyyətinin artırılmasını təmin edəcəkdir.

Yeni limanın tikintisi ilə bağlı Azərbaycan Respublikasının və Koreya Respublikasının aidiyyəti qurumlarının mütəxəssislərindən ibarət birgə İşçi Qrupu tərəfindən təhlillər aparılmış, akvatoriyada tədqiqat işlərinə başlanılmış, cari ilin axırına qədər işçi layihənin başa çatdırılması istiqamətində müvafiq işlər görülür.

Nəqliyyat naziri Ziya Məmmədov ölkənin nəqliyyat sisteminin təkmilləşdirilməsi və avtomobil yollarının müasir standartlara uyğun yenidən qurulması üçün görülən tədbirlərin geniş şərhini verdi. Cari ilin ötən dövründə həmin sahəyə 330 milyon manat investisiya yönəldildiyini və həmin sərmayənin 255 milyon manatının dövlət büdcəsindən ayrılan vəsaitin təşkil etdiyini söylədi. Bunun 2006-cı ilin müvafiq göstəricisini 2,8 dəfə üstələdiyini dedi.

Beynəlxalq qurumlarla əlaqələrin durmadan genişləndirildiyini bildirən nazir dövlətimizin başçısının tapşırığıına əsasən, vahid nəqliyyat sistemi konsepsiyasının reallaşdırılması üçün ardıcıl tədbirlərin keçirildiyini bildirdi.