Numizmat Rüstəm Hüseynovun yeni məruzəsi böyük maraq doğurub
Bakı, 4 aprel, Anara Axundova, AZƏRTAC
Azərbaycan Milli İncəsənət Muzeyində tanınmış numizmat Rüstəm Hüseynov növbəti məruzəsini təqdim edib.
AZƏRTAC xəbər verir ki, Rüstəm Hüseynov Azərbaycan sikkələrində zərb nişanlarına dair mühazirə zamanı Qaraqoyunlu, Ağqoyunlu, Səfəvi sikkələrinin nümunələrinin zərb nişanlarını ətraflı təhlil edib, onların xüsusiyyətlərindən, Azərbaycan tarixindəki rolundan danışıb.
Məruzə əsnasında böyük tarixi dəyəri olan nadir orta əsr gümüş və mis sikkələri nümayiş etdirilib, onların bəziləri ilk dəfə təqdim olunub.
Rüstəm Hüseynov AZƏRTAC -ın müxbiri ilə söhbətində 15 ildən artıqdır ki, sikkələrin öyrənilməsi ilə məşğul olduğunu deyib.
Numizmat qeyd edib: “Bir vaxtlar bəzi hökmdarların adlarının yalnız sikkələrdən məlum olması məni çox təəccübləndirdi. Saray salnaməçisi istədiyi hər şeyi düzəldə bilər, amma sikkələr real faktlar haqqında aydın məlumat verir. Məsələn, yaza bilərsiniz ki, dövlət müəyyən əraziləri əhatə edirdi, lakin o dövrdə başqa hökmdarın adı ilə sikkələrin kəsilməsi bunun əksini sübut edəcək. Sikkələrdə qiymətli metalların yüksək və ya aşağı standartı, onların miqdarı və yeri də dövlətin iqtisadiyyatı, ticarət əlaqələri haqqında ətraflı məlumat verəcək”.
Bu, Rüstəm Hüseynovun numizmatika mövzusunda ilk mühazirəsi deyil. Onun sözlərinə görə, onun təqdimatları xüsusilə Azərbaycan tarixinin həvəskarları və sikkə kolleksiyaçıları arasında populyardır.
“Mən tarix dərsliklərimizdə olmayan mühüm tarixi faktlardan danışıram və internetdə tapa bilməyəcəyiniz məlumatları təqdim edirəm. Bir çox kolleksiyaçılar mənə bu və ya digər sikkənin eyniləşdirilməsi xahişi ilə müraciət edirlər”, - deyə numizmat əlavə edib.
Rüstəm Hüseynov mühazirələr silsiləsini davam etdirmək və növbəti təqdimatını Səfəvi sikkələrinə həsr etmək niyyətindədir.
“Bu, çox maraqlı mövzudur. O dövrün sikkələri təkcə Azərbaycan numizmatikasına böyük təsir göstərməyib. Məsələn, vaxtilə Səfəvi sikkələrindən birinin nominalını bildirən “abbasi” sözü Səfəvilərdən 200 il sonra da gündəlik həyatda mütəmadi olaraq işlənirdi”, - deyə Rüstəm Hüseynov bildirib.
Məruzə tədbirin qonaqlarının böyük marağına səbəb olub, onlara az məlum olan tarixi faktlarla bağlı numizmata çoxsaylı suallar verilib. Sikkələrin dövriyyəsi və bununla bağlı hadisələr haqqında məlumatlar iştirakçıların diqqətini daha çox cəlb edib.
Öz sikkəsini zərb etmək dövlətin ən mühüm reqaliyalarından biridir, güc və suverenlik atributudur. Azərbaycan sikkələrində zərb nişanı müxtəlif səbəblərdən, ilk növbədə, siyasi motivlərə görə vurulub. İndi belə sikkələr hakimiyyət dövrünün və ayrı-ayrı hökmdarların tarixdəki real rolunun müəyyən edilməsində mühüm əhəmiyyət kəsb edir.
Bölmənin digər xəbərləri
