“Odlar Yurdu” fotomüsabiqəsi elan olunmuşdur
Bakı, 3 oktyabr (AZƏRTAC). Azərbaycan Respublikasının Mədəniyyət və Turizm Nazirliyi birinci Bakı Beynəlxalq turizm filmləri festivalı çərçivəsində “Odlar Yurdu” fotomüsabiqəsi elan etmişdir.
Mədəniyyət və Turizm Nazirliyinin mətbuat xidmətindən AZƏRTAC-a bildirmişlər ki, müsabiqəyə Azərbaycanın təbiət mənzərələrini, adət-ənənələrini, tarixi abidələrini əks etdirən fotolar qəbul olunur. Müsabiqənin məqsədi diqqəti tarixi və mədəni irsin beynəlxalq mərkəzlərindən olan Azərbaycanın turizm potensialına cəlb etməkdir.
Müsabiqəyə fotolar bu il oktyabrın 30-dək qəbul olunacaqdır. Hər iştirakçı maksimum 5 foto təqdim edə bilər.
Qalibləri beynəlxalq münsiflər heyəti müəyyən edəcəkdir. Ən yaxşı işlər noyabrın 20-dən 24-dək Nizami Kino Mərkəzində sərgilənəcəkdir.
Qaliblər festivalın təntənəli bağlanış mərasimində mükafatlandırılacaqlar.
Daha ətraflı məlumatı Bakı Beynəlxalq turizm filmləri festivalının rəsmi http://www.bitff.az saytından əldə etmək olar.
Bölmənin digər xəbərləri
