Ölkəmizdə daxili turizmin dəstəklənməsi üçün tədbirlər həyata keçirilir
Bakı, 13 iyul, AZƏRTAC
Ölkəmizdə turizmin müxtəlif növlərinin inkişaf etdirilməsi, regionlara turist axınının gücləndirilməsi və gəlmə turizmi ilə yanaşı, daxili turizmin inkişaf etdirilməsi əsas prioritet istiqamətlərdən biri hesab olunur.
Xalqımızın mədəni dəyərlərinin təbliği, onlardan turizm məqsədləri üçün daha səmərəli istifadə olunması, həmçinin regionlarda turizmin inkişafının təmin edilməsi məqsədilə Mədəniyyət və Turizm Nazirliyi tərəfindən cari ildə bir sıra tədbirlər həyata keçirilib.
Nazirlikdən AZƏRTAC-a bildirilib ki, ölkəmizdə milli adət-ənənələrin təbliği və folklor turizminin inkişaf etdirilməsi məqsədilə 7 ölkənin nümayəndələrindən ibarət Ağsu rayonunun Gəgəli kəndində Mədəniyyət və Turizm Nazirliyinin dəstəyi və “Miras” Mədəni İrsin Öyrənilməsinə Kömək İctimai Birliyinin təşkilatçılığı ilə II Beynəlxalq Tərəkəmə Çərşənbəsi Folklor Festivalı keçirilib. Üç gün davam edən tədbirdə milli folklor qruplarının, kənd mətbəxi və müxtəlif ölkələrin adət-ənənələri çıxışları nümayiş etdirilib.
Bununla yanaşı, ölkəmizdə yeni turizm marşrutlarının yaradılması və qeyri ənənəvi turizm növlərinin dəstəklənməsi məqsədilə daxili və gəlmə turizm üzrə ixtisaslaşmış turizm şirkətlərin nümayəndələri üçün Şamaxı rayonuna və Şamaxı Astrofizika Rəsədxanasına infotur təşkil edilib. İnfotur çərçivəsində iştirakçılar rəsədxanada astro-turizmin təşkili ilə bağlı açıq kosmos gecələrinin nümayişi, astronomiya muzeyi, teleskoplarda kosmik obyektlərə müşahidələrin aparılması, həmçinin rəsədxananın müvafiq turizm infrastrukturu və xidmətləri ilə tanış olublar.
Turistlərin ən çox səfər etdikləri əsas nümayiş obyektlərindən biri olan Qobustan Milli Tarix-Bədii Qoruğu 2007-ci ildə UNESCO Ümumdünya irsinin əsas siyahısına salındıqdan sonra burada mövcud infrastruktur yenidən qurulub, 2012-ci ildə isə müasir standartlara uyğun muzey yaradılıb. Həmçinin, 2016-cı ilin mart ayından başlayaraq turistlərə əlavə mədəni xidmətlərin göstərilməsi məqsədilə qoruq ərazisində yeni ekskursiya və interaktiv turların təşkilinə start verilib. Bu yeniliklərin yerli turizm şirkətlərinə, bələdçilərə və KİV nümayəndələrinə təqdim edilməsi üçün Mədəniyyət və Turizm Nazirliyinin təşkilatçılığı ilə infotur keçirilib.
Dövlətin daxili siyasətinin əsas istiqamətlərindən biri olan sosial siyasətin dəstəklənməsi, aztəminatlı və əlillərin asudə vaxtlarının səmərəli keçirilməsi, sosial turizmin inkişaf etdirilməsi məqsədilə Mədəniyyət və Turizm Nazirliyi tərəfindən Azərbaycan Respublikası Müharibə, Əmək və Silahlı Qüvvələr Veteranları Təşkilatının üzvləri üçün “Şahdağ” Turizm Mərkəzinə infotur təşkil edilib.
Bu cür tədbirlərin il ərzində davam etdirilməsi və daxili turizmin dəstəklənməsi məqsədilə yeni layihələrin həyata keçirilməsi nəzərdə tutulur.
Bölmənin digər xəbərləri
