Özbəkistanda koronavirusa yoluxanların sayı 15 nəfərə çatıb
Daşkənd, 18 mart, AZƏRTAC
Özbəkistanda koronavirusa yoluxanların sayı 15 nəfərə çatıb.
Bu gün səhər saatlarına olan məlumata görə ölkədə koronavirusa yoluxanlar 13 nəfər idisə axşama yaxın bu rəqəm 15-ə çatıb.
Özbəkistan Səhiyyə Nazirliyindən AZƏRTAC-ın müxbirinə bildiriblər ki, bir neçə saat əvvəl İstanbuldan Daşkəndə gələn bir cütlükdə koronavirus aşkar olunub. Bildirilib ki, son 24 saat ərzində bu virusa tutulanların sayı məhz Dubaydan və İstanbuldan Daşkənddə gələnlərin hesabına artıb.
Nazirlikdən bildiriblər ki, koronavirusa yoluxan xəstələrin hamısı Elmi-Tədqiqat Virusologiya İnstitutunun klinikasında müalicə alırlar.
Xatırladırıq ki, koronavirus ilk dəfə martın 15-də Parisdən Daşkəndə gələn Özbəkistan vətəndaşı olan qadında aşkar edilib. Sonra o qadının oğlu, qızı, həyat yoldaşı, nəvəsi və bir yaxın qohumunun da koronavirusa tutulduğu məlum olub.
Son məlumata görə dünyanın 166 ölkəsində 199 minə yaxın adam bu virusa yoluxub, onların çoxu sağalıb, 8 minə yaxını isə həyatını itirib.
Qulu Kəngərli
AZƏRTAC-ın xüsusi müxbiri
Daşkənd
Bölmənin digər xəbərləri
