Pakistanın Kəraçi şəhərində siklon təhlükəsi səbəbindən məktəblər bağlanıb
Bakı, 30 avqust, AZƏRTAC
Ərəbistan dənizində baş verən güclü fırtınadan sonra güclü yağışlar və küləklər Pakistanın hakimiyyət orqanlarını ölkənin ən böyük şəhəri Kəraçidə cümə günü, avqustun 30-da məktəbləri bağlamağa məcbur edib. Meteoroloji xidmət, həmçinin nadir siklonun gətirdiyi fırtına ilə bağlı xəbərdarlıq edib.
AZƏRTAC xəbər verir ki, yerli Meteorologiya bürosunun məlumatına görə, Kəraçinin bəzi ərazilərinə cümə gününə keçən gecə boyu 147 millimetr yağış yağıb. Şəhər meri Murtaza Vahab “X” sosial platformasındakı paylaşımında sakinlərdən ehtiyatlı davranmağı xahiş edib.
Pakistan hakimiyyəti balıqçılara və dənizçilərə dənizə çıxmamağı tövsiyə edib və vurğulayıb ki, fırtına yaxın günlərdə şəhərlərdə, eləcə də dağlıq ərazilərdə sel və daşqınlara səbəb ola bilər.
Təbii fəlakətlərin idarə edilməsi orqanlarının məlumatına görə, bazar günündən bəri Qucarat sahillərinə yaxın şəhərlərdə 28-dən çox insan həlak olub və 18 minə yaxın sakin təxliyə edilib.
“Indian Express” avqust ayında Ərəbistan dənizi üzərində siklon qasırğasının əmələ gəlməsinin nadir hadisə olduğunu yazıb və sonuncu belə fırtınanın 1964-cü ildə müşahidə edildiyini bildirib.
Bölmənin digər xəbərləri
