Panamalı nazir: Ən vacib məsələmiz sosial infrastrukturun təmin edilməsidir
Bakı, 20 may, AZƏRTAC
Hazırda bizim üçün ən vacib məsələ sosial infrastrukturun təmin edilməsidir. Mövcud problemlərin təkrarlanmaması üçün milli səviyyədə ərazi planlaşdırılması sənədlərinin hazırlanmasını əsas prioritet kimi müəyyən etmişik.
AZƏRTAC xəbər verir ki, bu sözləri Panamanın Mənzil Təminatı və Məkan Planlaşdırılması naziri Xayme Xovane BMT-nin Ümumdünya Şəhərsalma Forumunun 13-cü Sessiyası (WUF13) çərçivəsində “İki Region, Bir Gündəm: İnklüziv Şəhər Yenilənməsi üçün Dərslər” mövzusunda panel müzakirəsi zamanı deyib.
O qeyd edib ki, əvvəlki dövrlərdə ölkə üzrə inkişaf layihələri çox vaxt sistemsiz şəkildə, məhdudiyyətlər nəzərə alınmadan və sosial infrastrukturun mövcudluğu qiymətləndirilmədən həyata keçirilib.
Nazir vurğulayıb ki, hazırda məqsəd ərazi planlaşdırılmasının hazırlanması və onların idarə olunmasının yerli hökumətlərin, yəni bələdiyyələrin, rayonların və ya şəhər şuralarının səlahiyyətinə verilməsidir: “Bu yanaşma hər bir regionun sosial xüsusiyyətlərinin, özünəməxsusluğunun və mədəni kimliyinin qorunmasına imkan yaradacaq. Bizim bərpa etmək istədiyimiz məhz budur. Bu, son dərəcə vacibdir”.
Bölmənin digər xəbərləri
