Paşinyan faşizm siyasətinin qurbanı kimi meydanda tək qaldığının fərqindədir
Bakı, 8 sentyabr, Səadət Hakıyeva, AZƏRTAC
Bu gün şanlı Azərbaycan Ordusunun Ermənistan tərəfindən işğal olunmuş torpaqlarımızı azad etməsi uğrunda mübarizədə mühüm irəliləyişlərə nail olması artıq Ermənistan cəmiyyətində ciddi narahatlıq yaradıb. Azərbaycan Prezidenti, Ali Baş Komandan Prezident İlham Əliyev dünya birliyinin öhdəsindən gəlmədiyi işi məhz qüdrətli ordumuza həvalə etdi. Güclü ordumuz, qəhrəman əsgərlərimiz bu işin öhdəsindən uğurla gəlir. Bu gün Azərbaycan xalqı bir yumruq kimi birləşərək torpaqlarımızı geri qaytarmaq üçün ordumuzun və dövlətimizin ətrafında sıx birləşib.
Bu fikirləri AZƏRTAC-a açıqlamasında Azərbaycan-Amerika Gənclər Birliyinin sədri Vüqar Əhmədov deyib.
V.Əhmədov Ermənistan rəhbərliyinin öz hakimiyyətini qoruyub saxlamaq üçün erməni xalqını qurban verdiyini bildirib: “Bu gün Ermənistan vətəndaşları ağır sosial-iqtisadi vəziyyət ucbatından ölkəni tərk edirlər. Bu ölkə Azərbaycanın müzəffər ordusu qarşısında nə qədər tab gətirə biləcək, zənnimcə, bu suala Paşinyan cavab tapmalıdır. Ermənistanın baş naziri özü-özünü çıxılmaz vəziyyətə salıb və bu dalandan çıxa bilmir. Bu, artıq Paşinyan hakimiyyətinin süqutunu yaxınlaşdırır. Hakimiyyətdə qalacağı halda belə o, bu əməliyyatlardan sonra erməni xalqı qarşısında cavab verməli olacaq ki, nəyə görə öz xalqını böyük itkilərə məruz qoydu. Digər tərəfdən, Ermənistan növbəti ciddi humanitar fəlakətin astanasındadır. Dağlıq Qarabağ və ətraf rayonlardan qaçan ermənilər Ermənistanda heç də xoş qarşılanmır, onların sosial təminatı məsələsi ortaya çıxır, görəsən Paşinyan yeni gələn qaçqınları hansı vəsaitlə saxlayacaq, Sorosdan aldığı pullarlamı? Bütün bu suallar ritorik olsa da, Ermənistan cəmiyyəti üçün taleyüklü suallardır”.
QHT sədri diqqətə çatdırıb ki, Paşinyan bu gün əbəs yerə dünya erməniliyini köməyə çağırmır, çünki tutduğu yanlış yolun ucbatından apardığı faşizm siyasətinin qurbanı kimi meydanda tək qaldığının fərqindədir. Heç bir dövlət Ermənistana açıq dəstək vermək istəmir. Feyk xəbərlər yaymaqla məşğul olan bir ölkənin baş nazirinin aqibəti başqa cür ola da bilməzdi. Müharibə də gərək müharibə qanunlarına uyğun aparılsın. Mülki əhalini və obyektləri hədəfə almaqla onlara qarşı raket hücumlarından istifadə olunması Ermənistanın bir daha dünya hüquq sisteminə, beynəlxalq konvensiyalara və sivil dünyaya zidd olduğunu göstərdi. Bunlarla bağlı artıq bütün faktlar toplanaraq beynəlxalq məhkəmələrə göndərilib və bütün bu cinayətlərə görə Paşinyan beynəlxalq məhkəmələrdə mühakimə olunacaq.
“Ermənistanın bugünkü addımlarına baxanda görürük ki, diplomatiyadan, ümumiyyətlə, söhbət gedə bilməz. Bu ölkə bölgədə yalnız dövlət terroru ilə məşğuldur və təxribat törədir. Bu təxribatlardan məqsədli şəkildə istifadə edərək Yaxın Şərqdən terrorçular gətirib istifadə edir. Özü isə həyasızcasına Azərbaycana və Türkiyəyə qarşı belə ittiham irəli sürür. Azərbaycan və Türkiyə illərdir ki, PKK və erməni terrorundan əziyyət çəkən ölkələrdir və bu haqda bütün dünya hər zaman məlumatlı olub. Terrorçuların Azərbaycan tərəfindən keçməsi iddiaları isə heç bir faktlarda öz əksini tapmadı. Əksinə, biz Suriya və Liviya mənşəli terrorçuların erməni bayrağı altında döyüşdüyünə dair yeni kadrların şahidi olduq. Ermənistan isə cəbhədə ciddi itkilərini kompensasiya etmək üçün xaincəsinə mülki əhalini hədəf almaqda davam edir. Ermənistanın məqsədi münaqişənin miqyasını daha da genişləndirməkdir. Münaqişənin böyüməsi isə nəinki regiona, dünya dövlətlərinə də sərf etməyən bir məsələdir, çünki münaqişənin yeni müstəviyə keçməsi bölgədə Qərb ölkələrinin maraqlarına xidmət edən enerji layihələrini təhlükə altına qoya bilər. Bu, qlobal təhlükəsizlik sisteminin bir tərkib hissəsidir”, -deyə V.Əhmədov qeyd edib.
Bu, bir faktdır ki, ABŞ İngiltərə başda olmaqla, NATO ölkələri öz ərazilərindən min kilometrlərlə uzaq məsafədə yerləşən ərazilərə müdaxilə edərək ölkələrinə qarşı təhdid yaradan terrorçuları məhv ediblər. Azərbaycan da erməni terroruna qarşı mübarizə aparır. Dünyanın aparıcı dövlətləri erməni lobbisinin əlində oyuncağa çevrilməməli, Azərbaycanın terrorla mübarizə apardığı bir dövrdə ölkəmizə dəstək olmalıdırlar. Çünki bu əməliyyatlar həm də regional təhlükəsizliyin təmin edilməsinə xidmət edir.
V.Əhmədov deyib: “Bu gün təəssüf hissi ilə qeyd etməliyik ki, nəinki Avropanın, bütün dünyanın təhlükəsizlik sistemi ciddi şəkildə sarsılıb və artıq dünya xalqları BMT, ATƏT və təhlükəsizlik mandatını öz üzərinə götürmüş digər beynəlxalq təşkilatlara, onların qətnamələrinə inamını itirib. Bu gün Azərbaycan dövləti məhz sözügedən təşkilatların həyata keçirə bilmədiyi işləri xalqın iradəsi ilə reallaşdırır. Əvəzində isə ATƏT-in həmsədr ölkəsi olan Fransanın dövlət başçısı səviyyəsində ermənipərəst bir mövqe nümayiş olunur, beynəlxalq təşkilatların Ermənistanın təcavüzkarlığına son qoyulması üçün çoxsaylı qətnamələrinə baxmayaraq, işğalçı ilə işğala məruz qalan arasında fərq qoyulmur, əksinə, Ermənistanın destruktiv əməllərinə haqq qazandırılır. Belə olan halda dünyada hansı ədalətdən danışmaq olar?”.
“Dünya dövlətləri, beynəlxalq təşkilatlar Prezident İlham Əliyevin göstərdiyi qətiyyətdən nümunə götürərək bir araya gəlməli və dünyada terrorçuluğu yayan Ermənistanın işğalçılıq siyasətinin aradan qaldırılmasına dəstək olmalıdırlar. Bacarmırlarsa, heç olmasa, Azərbaycan xalqının bu mübarizəsində obyektiv olsunlar, ikili standartlardan çıxış etməsinlər. Çünki Azərbaycan dövləti və xalqı üçün ölkəmizin ərazi bütövlüyündən daha vacib ikinci məsələ ola bilməz”, - deyə QHT rəhbəri bildirib.
Bölmənin digər xəbərləri
