Quba, 18 sentyabr (AZƏRTAC). Sentyabrın 18-də Prezident İlham Əliyev Qubada “Şahdağ” Elektrik Stansiyasının açılışında iştirak etmişdir.

“Azərenerji” ASC-nin prezidenti Etibar Pirverdiyev məlumat verdi ki, ərazisi 14 hektar olan “Şahdağ” Elektrik Stansiyası ölkəmizin energetika sisteminə böyük töhfələrdən biridir. İnşasına 2008-ci ildə başlanan stansiyada tikinti-quraşdırma işlərini yerli “AZENKO” şirkəti həyata keçirmişdir. Stansiyanın elektrik avadanlığı İsveçrənin “ABB”, güc avadanlığı isə Finlandiyanın “Vartsila” şirkətlərinin istehsalıdır. Ən son elmi-texniki yeniliklərin tətbiq olunduğu stansiyada ildə 700 milyon kilovat-saatdan çox elektrik enerjisi istehsal etmək mümkündür. “Şahdağ”da istehsal olunacaq enerjinin ötürülməsi üçün 110 kilovoltluq 2-ci Quba hava xəttinin stansiyaya giriş-çıxışının təmin edilməsi məqsədi ilə 2 kilometr uzunluğunda yeni xətt çəkilmişdir. Stansiyanın qaz təchizatı üçün 14 kilometr uzunluğunda boru kəməri çəkilmiş, qazpaylayıcı stansiya tikilmişdir.

Elektrik stansiyası Sahdağ Qış-Yay Turizm Kompleksinin, eləcə də Quba və Qusar rayonlarının elektrik enerjisi təchizatını əsaslı surətdə yaxşılaşdıracaqdır. Şahdağ Qış-Yay Turizm Kompleksinin elektrik enerjisinə tələbatı ilkin mərhələdə 50 meqavat təşkil edəcəkdir. Sonrakı mərhələdə bu göstəricinin 100 meqavata yüksələcəyi gözlənilir.

Prezident İlham Əliyev stansiyanın iş prinsipi ilə tanış oldu.

Qeyd edildi ki, ümumi gücü 105 meqavat olan bu energetika qurğusunda hər biri 8,7 meqavatlıq porşen tipli 12 aqreqat quraşdırılmışdır. Bir kilovat-saat elektrik enerjisinin istehsalı üçün şərti yanacaq vahidi ilə cəmi 0,23 kubmetr və ya 267 qram təbii qaz sərf ediləcəkdir. Faydalı iş əmsalı 46 faiz olan stansiyanın işləməsi üçün təbii qazın 6 bar təzyiqlə verilməsi kifayətdir. Bu, buxar-qaz turbinlərinə verilən qazın təzyiqindən təxminən 4 dəfə azdır.

Məlumat verildi ki, tikintinin gedişində 500 nəfər çalışmış, onların yarısını yerli əhali təşkil etmişdir. Stansiyada isə 120 nəfər daimi işlə təmin olunacaqdır.

Prezident İlham Əliyev idarəetmə məntəqəsindən stansiyanı işə saldı.

Dövlətimizin başçısına bu stansiya ilə bağlı perspektivdə görüləcək işlər barədə də məlumat verildi. Qeyd edildi ki, “Xaçmaz” Elektrik Stansiyası ilə “Şahdağ” Elektrik Stansiyası arasında 40 kilometrə qədər uzunluqda 110 kilovoltluq elektrik xəttinin və Şahdağ Qış-Yay Turizm Kompleksinin enerji təchizatı üçün 40 kilometrlik 2 elektrik xəttinin, həmçinin müvafiq yarımstansiyaların tikintisi nəzərdə tutulmuşdur.

Stansiyanın ərazisində geniş abadlıq və yaşıllaşdırma işləri aparılmış, 10 minə qədər dekorativ ağac və gül kolu əkilmiş, 40 min kvadratmetr sahəyə asfalt döşənmişdir. Uzunluğu 1 kilometrə çatan daxili drenaj kanalı çəkilmiş, stansiyanı texniki və içməli su ilə təmin etmək üçün hər biri 120 metr dərinliyində 2 artezian quyusu qazılmış, uzunluğu 2500 metr olan su xətti çəkilmişdir. Yanğın təhlükəsizliyi məqsədi ilə su çənləri inşa edilmişdir.

Prezident İlham Əliyev ümumi sahəsi 530 kvadratmetr olan ikimərtəbəli inzibati bina ilə də tanış oldu. Buradakı fotoguşələrdə Azərbaycan elektroenergetikasının sürətli inkişafında müstəsna əməyi olan ulu öndər Heydər Əliyevin xalq və Vətən qarşısında xidmətlərindən, energetiklərlə görüşlərindən və müxtəlif tədbirlərdə iştirakından bəhs edən eksponatlar vardır. Bundan başqa, Prezident İlham Əliyevin respublikamızın energetika potensialının möhkəmləndirilməsi və enerji təhlükəsizliyinin təmin olunması istiqamətində reallaşdırdığı ardıcıl və fundamental tədbirlər də buradakı fotoşəkillərdə dolğun əksini tapmışdır.

Dövlətimizin başçısı respublikamızın energetika obyektlərinin əks olunduğu xəritəyə baxdı, ətrafı seyr etdi.

Stansiyanın iş rejimi və avadanlığı ilə yaxından tanış olan Prezident İlham Əliyev energetiklərlə görüşdü, onlara uğurlar arzulayaraq dedi:

- Sizi yeni stansiyanın açılışı münasibətilə ürəkdən təbrik edirəm, sizə uğurlar arzulayıram. Stansiyanın istifadəyə verilməsi çox böyük hadisədir. Həm bu bölgə üçün, həm də ümumiyyətlə, Azərbaycanın elektrik enerjisi potensialının gücləndirilməsi üçün stansiyanın çox böyük əhəmiyyəti vardır. 100 meqavatdan çox gücü olan stansiya, eyni zamanda, “Xaçmaz” Elektrik Stansiyası ilə birləşəcək, Qusar rayonu, Quba rayonu, ətraf rayonların elektrik enerjisinə tələbatını tam şəkildə ödəyəcəkdir. Tikilməkdə olan müasir “Şahdağ” Qış-Yay Turizm Kompleksinin dayanıqlı elektrik enerjisinə tələbatının ödənilməsi üçün stansiyanın əvəzolunmaz əhəmiyyəti vardır.

Çox gözəl stansiyadır. Çox qısa müddət ərzində - bir il ərzində tikilib. Son illər ərzində Azərbaycanda böyük sayda modul stansiyalar tikilibdir. Bu, sayca yeddincidir. Bununla bərabər, digər stansiyalar da tikilir və beləliklə, Azərbaycanın elektrik enerjisi potensialı tamamilə yeniləşir, güclənir, bunlar əlavə güc mənbəyidir.

Bilirsiniz ki, Azərbaycan çox sürətlə inkişaf edən ölkədir. Elektrik enerjisinə tələbat ildən-ilə artır, gələcək illərdə də artacaqdır. Çünki yeni müəssisələr, zavodlar, fabriklər, səhiyyə ocaqları tikilir, inkişaf gedir və əlbəttə ki, bütün bunlar elektrik gücü tələb edir. Bizim zəngin neft-qaz yataqlarımız vardır. Qaz istehsal edirik, neft istehsal edirik, emal edirik, yəni Azərbaycanın enerji təhlükəsizliyi daxili imkanlar hesabına tam şəkildə təmin edilir. Xüsusilə indiki şəraitdə bu, çox müsbət haldır. İndi enerji təhlükəsizliyi məsələləri dünya gündəliyində ön plana çıxır. Azərbaycan özünü tam şəkildə arxayın hiss edir.

Biz Azərbaycanda qazlaşdırma prosesini davam etdiririk. Elektrik enerjisinə olan tələbat tam şəkildə ödənilir. Son illər ərzində görülən işlər və bu gün istifadəyə verilən bu stansiyanın əhəmiyyəti bu sahədə çox böyükdür.

Mən çox şadam ki, qısa müddət ərzində, haradasa 4-5 il ərzində Azərbaycanda 7 gözəl, müasir modul tipli elektrik stansiyası tikilibdir. Bununla bərabər, digər stansiyalar, su elektrik stansiyaları tikilir. Biz alternativ enerji mənbələrini tam şəkildə işə salmalıyıq və beləliklə, Azərbaycan uzunmüddətli inkişaf strategiyasını çox böyük səmərə ilə icra edəcək. Bizim iqtisadi gücümüz gündən-günə artır və bu böhranlı aylarda, böhranlı zamanda yeni stansiyanın tikintisi özlüyündə böyük nailiyyətdir.

Mən stansiyanın tikintisində iştirak etmiş bütün mütəxəssisləri, fəhlələri bir daha salamlayıram, sizə öz minnətdarlığımı bildirmək istəyirəm. Azərbaycanın bütün energetiklərinə yeni uğurlar və can sağlığı arzulayıram. Stansiyanın açılışı münasibətilə sizi bir daha təbrik edirəm.

######