Prezident son müsahibəsində Azərbaycanın qlobal proseslərə yanaşmasını açıq şəkildə ortaya qoyub RƏY
Bakı, 28 avqust, AZƏRTAC
Azərbaycan Respublikasının Prezidenti İlham Əliyev Səudiyyə Ərəbistanının “Əl-Ərəbiyyə” telekanalına müsahibəsində hər zaman olduğu kimi mühüm məsələlərə toxunub, ölkəmizin mövqeyini, qlobal miqyasda gedən proseslərə yanaşmasını açıq şəkildə ortaya qoyub. Bu müsahibə həm də Azərbaycanın beynəlxalq siyasi gedişata olan mövqeyinin təqdimatıdır. Dövlətimizin başçısı müsahibədə həm xarici, həm də daxili auditoriya üçün mühüm mesajlar verdi. Beynəlxalq münasibətlər sistemində olduqca mürəkkəb proseslərin getdiyi bir vaxtda Azərbaycan tək regional geopolitik proseslərə deyil, həm də qlobal miqyasda siyasi proseslərə təsir etmək imkanlarına sahibdir.
Bu fikirləri AZƏRTAC-a açıqlamasında Milli Məclisin deputatı Fəzail İbrahimli deyib.
O bildirib ki, beynəlxalq arenada siyasi, iqtisadi böhranın dərinləşdiyi bir vaxtda bütün bu proseslərin dəqiq, doğru-düzgün analiz edilib yönləndirilməsində şəxsiyyət və lider amili olduqca mühüm əhəmiyyət kəsb edir. Azərbaycan Prezidenti müsahibəsində məhz bu liderlik faktorunu, hadisələrə və proseslərə ən düzgün siyasi məntiqlə yanaşdığını bütün parametrlərlə ortaya qoyub. Vaşinqtonda sülh sazişinin paraflanmasından sonra bölgədə sabitliyin əleyhinə olan qüvvələr üçün dövlətimizin başçısının “Bu, iki dövlət arasında razılaşmadır. Bu, Paşinyan ilə mənim razılaşmamız deyil” mesajı kifayət qədər açıq və konkret ifadə olunmuş bir həqiqətdir. Yekun sülh üçün Ermənistan konstitusiyasında Azərbaycanın ərazi bütövlüyünü şübhə altına alan müddəanın çıxarılmasının dəyişilməz şərt olduğunu bir daha bəyan edən Prezident əks yolun qarşı tərəf üçün xoşagəlməz nəticələr yaradacağını qeyd etdi. Son razılaşma şərtlərindən geri durma və ya hər hansı xarici müdaxilə ilə rəsmi İrəvanın mövqeyində dəyişiklik yalnız ABŞ deyil, beynəlxalq ictimaiyyət, Avropa İttifaqı, Türkiyə və ərəb ölkələri yanında da Ermənistanın dövlət imicinin itirilməsinə gətirib çıxaracaq. Azərbaycan lideri bu kimi planları düşünən erməni revanşizminə də Azərbaycan dövləti adından qəti mövqeyini bildirdi: “Əgər Ermənistan bir daha bizim ərazi bütövlüyümüzü şübhə altına qoysa, biz də adekvat cavab verəcəyik”.
“Düşünürəm ki, müsahibədə tək Azərbaycan Respublikasında və İranda yaşayan soydaşlarımızın deyil, bütövlükdə Dünya azərbaycanlılarının sevinc və qürurla dinlədiyi məqam İran İslam Respublikasının Prezidenti Məsud Pezeşkian haqda fikirləri oldu. Məsud Pezeşkianın Azərbaycana səfərlərinə toxunan Prezident İlham Əliyev “O, mənim kimi eyni qanı daşıyır. Biz eyni dildə danışırıq”, - fikri bölgədə Azərbaycan və azərbaycanlı faktorunun diplomatik şəkildə ən ideal ifadəsi idi. Bu baxımdan Azərbaycan Prezidentinin Türk Dövlətləri Təşkilatı haqda da fikirləri xüsusi diqqət çəkir. Dünyanın siyasi proseslərinə bu və ya digər şəkildə təsir edən beynəlxalq təşkilatların bir çoxunun məhz ortaq etnik qrup halında birləşdiyini qeyd edən Prezident qarşıya qoyulan hədəfi də “təkcə daxili məsələlərlə məşğul olmayan qlobal oyunçuya çevrilmək” kimi açıqlayıb. Eyni zamanda, dövlətimizin başçısının Türk Dövlətləri Təşkilatının beynəlxalq arenada sabitləşdirici, müsbət rol oynayan nəhəng coğrafiyada heç kimə təhlükə törətməyən, əksinə dünya sülhünün keşiyində duracaq güclü birlik olduğunu bildirməklə həm də yüz illər boyu Türk hakimiyyəti altında bütövlükdə Asiyanın barış içində yaşadığı tarixi reallığı xatırlatmış oldu. Bu mənada Prezidentin müsahibəsində dünyanın siyasi gedişatında ədalətsiz yanaşmadan yaranan hərbi qarşıdurmalara da sərt münasibət var. Dövlətimizin başçısı uzun illər işğaldan əziyyət çəkən bir ölkə kimi Ukraynanın, Suriyanın ərazi bütövlüyünü tanıyan, Fələstinin dövlət müstəqilliyinin tərəfdarı olan Azərbaycanı dünyaya ədalət və barış örnəyi kimi təqdim etdi”, - deyə F.İbrahimli vurğulayıb.
Bölmənin digər xəbərləri
