Qusar, 18 sentyabr (AZƏRTAC). Sentyabrın 18-də Prezident İlham Əliyev 1918-ci ildə Qusardakı Qanlı dərədə erməni silahlı dəstələri üzərində qələbə çalmış Qusar və Quba qəhrəmanlarının şərəfinə ucaldılan abidənin açılışında iştirak etmişdir.

Bildirilmişdir ki, tarixin şanlı mərhələsinin gənc nəsillərə ötürülməsi məqsədilə ucaldılan bu abidə Azərbaycan gəncliyinin ata-babalarımızın qəhrəmanlıq salnaməsini daha yaxşı öyrənmələri və yadda saxlamaları üçün əsl mənbədir. Bu qəhrəmanlıq abidəsinin müəllifi əməkdar rəssam, heykəltəraş Şərif Şərifovdur.

Dövlətimizin başçısı İlham ƏLİYEV abidənin üzərindəki ağ örtüyü açdı və bu münasibətlə Qusar ictimaiyyətinin nümayəndələrini təbrik edərək dedi:

- Mən sizi qarşıdan gələn Ramazan bayramı münasibətilə təbrik etmək istəyirəm, sizə cansağlığı, xoşbəxtlik arzulayıram. Bu gün gözəl hadisədir. Qanlı dərədə erməni quldur dəstələri üzərində qələbə çalmış qəhrəmanların şərəfinə Qusarda çox gözəl, möhtəşəm abidə ucaldılıb.

Bütövlükdə deyə bilərəm ki, son illər ərzində Qusarda işlər çox yaxşı gedir. Yaxşı abadlıq işləri aparılır. Rayonun problemlərinin həlli üçün əməli tədbirlər görülür. Bu gün “Şahdağ” Elektrik Stansiyasının açılışını qeyd etdik. Bu stansiya 100 meqavat enerji istehsal edəcək və beləliklə, bütün şimal zonasını çox keyfiyyətli və etibarlı enerji ilə təmin edəcəkdir.

Bildiyiniz kimi, artıq bir ilə yaxındır ki, Qusarda mərkəzi xəstəxana tikilir. Əminəm ki, xəstəxana gələn il istifadəyə veriləcək və beləliklə, rayonun səhiyyə problemlərinin həlli üçün praktiki tədbirlər görüləcəkdir.

Samur-Həzrə yolunun tikintisi ilə bağlı mənim Sərəncamıma uyğun olaraq Prezidentin Ehtiyat Fondundan vəsait ayrıldı və artıq işlərə başlanmışdır. Bütün digər məsələlər də öz həllini tapacaqdır. Biz sizinlə keçən il görüşmüşdük. Ondan əvvəlki illərdə də görüşmüşdük. Keçən il Qusarda gözəl Olimpiya Mərkəzinin açılışını qeyd etdik. Bildiyimə görə, bu mərkəz artıq təkcə idman üçün deyil, eyni zamanda turizm üçün də yararlıdır və buraya turistlər də gəlir. Bu gün Şahdağ Qış-Yay Turizm Kompleksinin təməl daşı qoyulacaqdır. Deyə bilərəm ki, bu, Azərbaycanda son illər ərzində qeyri-neft sektorunda investisiyaların həcminə görə ən böyük layihədir. Bu layihəyə 100 milyonlarla dollar vəsait qoyulacaqdır və Qusarda, Şahdağda dünya miqyaslı yay-qış kurortu, dağ-xizəyi kurortu tikiləcəkdir. Şübhə yoxdur ki, biz bunu yaradandan sonra həm minlərlə yeni iş yerləri açılacaq, həm də turistlərin sayı artacaq və bir sözlə, Qusar beynəlxalq turizm mərkəzinə çevriləcəkdir.

Bütün bunları biz ona görə edirik ki, Azərbaycanın bütün bölgələri inkişaf etsin, Azərbaycanın bütün problemləri öz həllini tapsın. Bütün bölgələrdə müasir infrastruktur yaradılır, yollar çəkilir, abadlıq işləri aparılır. Qusar şəhəri də gözəlləşir, gözəl abadlıq işləri aparılır, parklar salınır. Bakıdan şimal istiqamətinə gözəl beton yol çəkilir. Yəni bütün bunlar Azərbaycanı gücləndirir və Azərbaycanda yaşayan hər bir vətəndaş da bu gözəl imkanlardan bəhrələnməlidir.

İndi dünyada iqtisadi böhranın yaşanmasına baxmayaraq ölkəmizin iqtisadiyyatı artır. Azərbaycanda yeni müəssisələr açılır - xəstəxanalar, parklar, elektrik stansiyaları, yollar, məktəblər və s. Bu onu göstərir ki, bizim iqtisadi və siyasi xəttimiz düzgün xətdir.

Biz bu xətdən dönməyəcəyik. Azərbaycan son illər ərzində öz imkanlarını böyük dərəcədə genişləndirə bilib və Azərbaycanda bütün insanlar mehribanlıq, qardaşlıq şəraitində bir ailə kimi yaşayır.

Bundan sonra da şimal zonasının inkişafı üçün əlavə tədbirlər görüləcəkdir. Mən əminəm ki, Qusar rayonunda bundan sonra da belə gözəl hadisələr çox olacaqdır. Bir daha sizi ürəkdən salamlayıram və sizə uğurlar, cansağlığı arzulayıram.

Göstərilən diqqət və qayğıya görə dövlətimizin başçısına Qusar əhalisinin minnətdarlığını çatdıran ağsaqqal Binyamin ZALOV dedi:

- Möhtərəm Prezidentimiz, icazə verin, bütün qusarlılar adından Sizi salamlayım, bütün qusarlılar adından Sizə “Xoş gəlmisiniz” deyim.

Əziz Prezidentimiz, Siz hər dəfə Qusara gələndə qusarlılar üçün bir bayram olur, bir şənlik olur. Bu gün camaat Qusarın mərkəzində açılan bu abidənin önündə böyük bir fəxrlə yığılıb Sizi qarşılayır. Bu abidə özlüyündə böyük bir tarixi hadisədir. Bu abidə bizim doğma Azərbaycanımızın bütövlüyünün, burada yaşayan bütün xalqların dar gündə bir-birinə dayaq durmasının və düşmənə qarşı mübarizə aparmasının böyük bir rəmzidir.

Əziz Prezidentimiz, biz qusarlılar həmişə dövlətçilik uğrunda, Vətən uğrunda mübarizənin önündə olmuşuq. Lazım gələrsə, biz həmişə düşmənə qarşı vuruşmağa hazırıq.

Əziz Prezidentimiz, qusarlılar Sizi çox sevir. Ona görə Sizi çox sevir ki, Siz Qusara böyük qayğı göstərirsiniz. Fürsətdən istifadə edib, mən demək istəyirəm ki, heç bir qüvvə, heç bir fitnə-fəsad qusarlıları Vətənə olan məhəbbətindən, Sizə olan sədaqətindən döndərə bilməz. İstər sülh cəbhəsində, istər hərb cəbhəsində - bütün qusarlılar Sizin arxanızda dayanıbdır.

Cənab Prezident, bu gün fəxr edirik ki, biz çiçəklənən Azərbaycan dövlətinin, Azərbaycan Respublikasının vətəndaşlarıyıq. Biz qusarlılar çox sevinirik ki, bizim Sizin kimi Prezidentimiz var, Sizin kimi rəhbərimiz vardır. Cənab Prezident, biz Sizə arxalanırıq, Sizə güvənirik. Allah Sizi qorusun, Allah Sizə kömək olsun.

Qusar rayonu möhtəşəm Azərbaycan ailəsinin bir üzvü kimi fəaliyyət göstərir, yaşayır, genişlənir, tərəqqi edir. Siz hər dəfə Qusara gəlib-gedəndə Qusarda özünüzdən bir yadigar qoyursunuz. O dəfə gələndə olimpiya kompleksində biz Sizi qarşıladıq. Özü də yağışlı bir gün idi. Siz gəlib bizimlə səmimi görüşdünüz. Elə bil ki, bir ailə başçısı, ata, qardaş kimi bizi içəri dəvət etdiniz. Bir masa arxasında oturduq. Siz bizə respublikada gedən yeniliklər haqqında danışdınız. Biz də öz problemlərimiz haqqında Sizə söhbət açdıq.

Cənab Prezident, üstündən bir il keçməmiş bütün problemlərimiz öz həllini tapıb.

Sonda mən demək istərdim ki, Qusar inkişaf edir, tərəqqi edir. Sizin xeyir-duanızla bünövrəsi qoyulan və keçən il istifadəyə verilən Olimpiya-İdman Kompleksi uğurla fəaliyyət göstərir. Bu gün orada hətta Avropa çempionatı, yarışlar keçirilir. Bu, bizim üçün böyük fəxrdir. Bundan sonra, Qusarda Sizin keçən il təməlini qoyduğunuz xəstəxana binası tikilir. Hansından danışım, Qusarda işlər çoxdur. Məktəblər tikilir, parklar salınır, küçələr gözəlləşir, yeni su, qaz xətləri çəkilir. Qusara böyük bir firavanlıq gəlib.

Mən fürsətdən istifadə edərək, ağsaqqalların bir sözünü burada qeyd etmək istəyirəm. Onlar deyirlər ki, həyat, kəndin həyatı, inkişafı gözəl yoldan başlayır. Siz o dəfə gələndə biz xahiş etdik ki, Samur-Həzrə yolunun tikintisinə, onun təzədən bərpasına kömək göstərəsiniz.

Sizin Sərəncamınızdan heç bir ay ötməmiş orada işlər başlanıb. Artıq iki kilometrdən yuxarı məsafəyə asfalt döşənib. Həmin yol 27 kəndi birləşdirir. Bu kəndlərdə 16 min əhali yaşayır. Bütün bu əhalinin arzusu idi ki, həmin yol yenidən qurulsun. Siz bu əhalini arzusuna çatdırmısınız. Əziz Prezidentimiz, nəinki öz arzusuna çatdırmısınız, hətta hər bir evə sevinc, şadlıq bəxş etmisiniz. Allah Sizi həmişə xoşbəxt eləsin. Allah Sizi bu xalqın başı üzərindən əskik etməsin.

Fürsətdən istifadə edərək deyirəm ki, rayonumuzda səhiyyə, mədəniyyət, maarif sahəsində böyük quruculuq işləri həyata keçirilir. Bu da Heydər Əliyev Fondunun, onun prezidenti, Milli Məclisin deputatı Mehriban xanım Əliyevanın sayəsində baş verir. Əziz Prezidentimiz, biz bilirik ki, Sizinlə birlikdə Mehriban xanım da rayonumuza böyük diqqət göstərir. Xahiş edirəm, qusarlıların salamını ona çatdırın.

Qusar ağsaqqallarının Sizə gözəl bir hədiyyəsi vardır. Mən çox xahiş edirəm ki, bu hədiyyəni qəbul edəsiniz. Bu hədiyyə elə-belə bir hədiyyə deyildir. Bu, xəncərdir, igidliyin, mərdliyin nişanəsidir. Cənab Prezident, Allahdan arzu edirik ki, sözünüz bu xəncər kimi kəsərli olsun, apardığınız siyasətiniz də bu xəncər kimi iti olsun.

Prezident İlham ƏLİYEV: Çox sağ olun. Mən də öz növbəmdə sizə söz verirəm ki, bundan sonra da sizin bütün xahişlərinizi yerinə yetirəcəyəm. Keçən il biz görüşəndə və siz mənə Samur-Həzrə yolu haqqında deyəndə artıq bir az gec idi. Çünki bu ilin büdcəsi demək olar ki, hazır vəziyyətdə idi. Ona görə də biz bu ilin büdcəsinə bu yolu sala bilmədik. Ancaq bir yol tapdıq və Prezidentin Ehtiyat Fondundan 6,5 milyon manat vəsait ayrıldı, artıq işlər başlamışdır.

Mən çox şadam ki, bu yolun tikintisi başlayıb və siz qeyd etdiyiniz kimi, 16 min əhali bu yoldan istifadə edir. Başqa yollar da tikiləcəkdir. Bu gün biz bütövlükdə Qusarın yol infrastrukturuna bir daha baxdıq, gördük ki, bu kəndləri birləşdirmək, insanlara rahatlıq vermək, rayonu gözəlləşdirmək üçün hələ çoxlu yollar çəkilməlidir.

Bütün məsələlər öz həllini tapır. Bizim əsas nailiyyətimiz ondan ibarətdir ki, sözlə əməl arasında fərq yoxdur. Nəyi deyiriksə, onu da edirik. Nəyi edirik? Onu edirik ki, insanların tələbatını ödəyir. İnsanlara nə lazımdır? Sabit şərait, təhlükəsiz vəziyyət. Bu, Azərbaycanda vardır və Azərbaycanda sabitlik tam şəkildə bərqərar edilib. Maddi rifah, insanların yaşayış səviyyəsi ildən-ilə yaxşılaşır. Tibbi xidmət - gözəl xəstəxana tikilir və mən göstəriş verdim ki, xəstəxana gələn ilin axırına istifadəyə verilsin. Yaxşı məktəblər, turizm, idman, yollar, elektrik enerjisi. İstifadəyə verilmiş elektrik stansiyası bütün bu zonanın elektrik enerjisini təmin edəcəkdir. O, əlavə xətlərlə “Xaçmaz” Elektrik Stansiyası ilə birləşəcək və beləliklə, bütün bu bölgə dayanıqlı elektrik enerjisi alacaqdır.

Əminəm ki, növbəti illərdə Qusar əhalisi həmişə olduğu kimi, Azərbaycanın hərtərəfli inkişafına, müstəqilliyimizin möhkəmlənməsinə öz dəyərli töhfəsini verəcəkdir. Bütün dövrlərdə qusarlılar Azərbaycan dövlətçiliyi uğrunda vuruşmuşlar. Bu gözəl abidə bunun bariz nümunəsidir. Bütün vətəndaşlar, bütün xalqlar bir ailə kimi düşmənə qarşı vuruşmuş, şəhid vermiş və tarixdə ucalmışlar. Bu birlik, bu qardaşlıq bu gün də vardır. Azərbaycanın xüsusiyyəti ondan ibarətdir ki, bütün xalqlar, bütün millətlər bir ailə kimi yaşayır. Heç bir ayrı-seçkilik yoxdur və olmayacaqdır. Bizim üçün hər bir vətəndaş əzizdir, doğmadır. Mən görəndə ki, Qusar qısa müddət ərzində öz simasını demək olar ki, dəyişib, gözəlləşib çox sevinirəm. Bizim görüşlərimiz hələ çox olacaqdır. Qusarda hələ açılışlar bundan sonra da olacaqdır. Mən əminəm ki, nəzərdə tutduğumuz bütün məsələlər öz həllini tapacaqdır. Sizə cansağlığı, xoşbəxtlik arzulayıram. Sağ olun.

Rayon sakini: Əziz və hörmətli Prezidentimiz cənab İlham Əliyev. Siz Qusara xoş gəlmisiniz. Sizin hər dəfə Qusara gəlişiniz biz qusarlıları həqiqətən səmimi qəlbdən sevindirir. Bu gün də elə gözəl günlərdən biridir.

X X X

Sonra Prezident İlham Əliyev mərasim iştirakçıları ilə abidə qarşısında xatirə şəkli çəkdirdi.

######