Bakı, 2 dekabr, AZƏRTAC

Qərbi Azərbaycan məsələsi ilə bağlı problemin miqyasını işıqlandırmaq vacib əhəmiyyət daşıyır. Qeyd edək ki, 1897-ci il əhalinin siyahıya alınmasına əsasən, Cənubi Qafqazda yaşayan azərbaycanlıların təxminən 25 faizi indiki Ermənistan ərazisində məskunlaşmışdı. Onların hamısı bir neçə deportasiya dalğası ilə öz evlərindən qovulmuş və əksəriyyəti Azərbaycan ərazisində məskunlaşmışdı. Başqa sözlə desək, Azərbaycan əhalisinin ən azı 25 faizi özü və ya əcdadları indiki Ermənistan ərazisindən zorla çıxarılıb. Bu baxımdan, Azərbaycan hökumətinin, parlamentinin və ictimaiyyətinin bu məsələyə xüsusi diqqət göstərməsi təbiidir.

Bu sözləri AZƏRTAC-a açıqlamasında Milli Məclisin deputatı Qaya Məmmədov söyləyib.

“Ermənistanın və bəzi xarici dövlətlərin Qərbi Azərbaycan məsələsinin guya 2022-ci ildən sonra meydana çıxması barədə iddiaları əsassızdır. Xüsusilə qeyd etmək lazımdır ki, 1993-cü ildə Ulu Öndər Heydər Əliyev hakimiyyətə qayıtdıqdan sonra onun təşəbbüsü ilə Ermənistandan olan azərbaycanlıların qayıdışı məsələsi müxtəlif qətnamələrdə öz əksini tapdı. Ümummilli Liderin bu mövzuda dəfələrlə çıxışları olub. Eynilə Prezident İlham Əliyev 2003-cü ildən bəri bu məsələni çoxsaylı çıxışlarında gündəmə gətirib. Prezident İlham Əliyevin 2022-ci il dekabrın 24-də Qərbi Azərbaycan İcmasını ziyarəti və həmin İcmada etdiyi proqram xarakterli çıxış isə bu mübarizədə yeni bir səhifə açdı. Dövlətimizin başçısının Qərbi Azərbaycan məsələsinə yaxından diqqət göstərməsi və onu ən mötəbər platformalarda qaldırması bu mövzunun beynəlxalq aləmdə ciddi məsələ kimi qəbul olunmasını və konkret qərarların qəbul edilməsini təmin edib. Bundan əlavə, İslam Əməkdaşlıq Təşkilatının 2024-cü il sammitində Qərbi azərbaycanlıların qayıdışına dəstək ifadə edilməsini xüsusilə vurğulamaq lazımdır”, - deyə deputat bildirib.