Qətiyyətli liderlik və strateji baxış Qarabağın dayanıqlı inkişafını təmin edir - RƏY
Bakı, 31 oktyabr, AZƏRTAC
Prezident İlham Əliyevin Qarabağ bölgəsinə ardıcıl səfərləri Azərbaycanın postmünaqişə dövründə formalaşdırdığı yeni reallığın bariz təzahürüdür. Bu səfərlər yalnız rəmzi deyil, həm də siyasi idarəetmə, iqtisadi planlaşdırma və sosial inteqrasiya baxımından strateji əhəmiyyət daşıyır. Qarabağ artıq, sadəcə, bərpa olunan ərazi deyil, dövlətin dayanıqlı inkişaf modelinin praktik müstəviyə keçdiyi regiondur. Prezidentin səfərləri göstərir ki, aparılan yenidənqurma işləri təkcə infrastruktur layihələri ilə məhdudlaşmır, həm də sosial rifahın, ekoloji bərpanın və icma əsaslı inkişaf siyasətinin reallığa çevrilməsini təmin edir. Prezident İlham Əliyevin yerində verdiyi tapşırıqlar və strateji yanaşması bir daha sübuta yetirir ki, dövlətimizin başçısı yenidənqurma və bərpa prosesinə şəxsən nəzarət edir, görülən işlərin gedişini yaxından izləyir.
Bu fikirləri AZƏRTAC-a açıqlamasında “Qarabağın Tərəqqisi Naminə” İctimai Birliyinin sədri Şəbnəm Səfərova söyləyib.
O qeyd edib ki, bu səfərlər Azərbaycanın regionda sülhün və inkişafın əsas təşəbbüskarı olduğunu nümayiş etdirir. Prezident İlham Əliyevin Qarabağa səfərləri, faktiki olaraq Cənubi Qafqazda formalaşan yeni təhlükəsizlik arxitekturasının əsas dayaqlarından biridir. Səfərlərin müntəzəm və sistemli xarakter daşıması dövlət rəhbərliyinin Qarabağın bərpasını “layihə” deyil, idarəetmə prioriteti kimi qəbul etdiyini göstərir. Prezidentin bölgəyə səfərləri dövlət institutları arasında koordinasiyanın gücləndirilməsinə, qərarların yerindəcə izlənməsinə və şəffaf icra mexanizmlərinin tətbiqinə xidmət edir. Qarabağda görülən işlər artıq ilkin bərpa mərhələsini geridə qoyur. Prezidentin son səfərləri zamanı istifadəyə verilən yollar, sənaye zonaları, kənd təsərrüfatı sahələri və yaşayış kompleksləri regionun iqtisadi xəritəsində yeni mərhələnin başlanğıcını qoydu. Füzuli, Şuşa, Ağdam və Zəngilan kimi ərazilərdə “ağıllı şəhər” və “yaşıl enerji” prinsipləri əsasında həyata keçirilən layihələr göstərir ki, Qarabağ təkcə fiziki infrastruktur baxımından deyil, həm də ekoloji və innovativ iqtisadi model çərçivəsində yenidən qurulur.
Şəbnəm Səfərova diqqətə çatdırıb ki, bərpa prosesi artıq tikinti mərhələsindən çıxaraq məzmun mərhələsinə daxil olub. Bu mərhələdə məqsəd, sadəcə, yollar və binalar inşa etmək deyil, regionu öz daxili iqtisadi potensialı ilə dayanıqlı sistemə çevirməkdir. Prezidentin səfərləri zamanı regionda özəl sektorun, kənd təsərrüfatı istehsalçılarının və kiçik sahibkarlığın inkişafına dair verdiyi tapşırıqlar və çağırışlar Qarabağın yaxın illərdə həm daxili, həm də regional bazarlar üçün istehsal və ixrac mərkəzinə çevriləcəyini göstərir. Səfərlərin ən dərin mənəvi və ictimai tərəfi isə insanların doğma yurdlarına qayıdışı ilə bağlıdır. Yeni inşa edilən yaşayış massivlərinin, məktəblərin, xəstəxanaların, mədəniyyət ocaqlarının açılışı Qarabağın həyatına insan nəfəsi gətirir. Bu səfərlər həm də cəmiyyətə “qayıdışın reallığı” mesajını ötürür, artıq Qarabağda həyat bərpa olunur, ailələr doğma evlərinə dönür, uşaqlar məktəbə gedir, yeni icmalar formalaşır. Sosial baxımdan bu, milli birliyin və vətəndaş həmrəyliyinin daha da möhkəmlənməsi deməkdir. Qarabağ bu gün yalnız coğrafi məkan deyil, həm də Azərbaycanın milli identikliyinin, dövlətçilik düşüncəsinin və yenilənmiş vətəndaş ruhunun mərkəzinə çevrilir. Prezidentin səfərləri həm də dövlətlə cəmiyyət arasında qarşılıqlı məsuliyyət hissini gücləndirir: bərpa və inkişaf prosesində hər bir vətəndaşın rolu var.
Prezident İlham Əliyevin Qarabağ bölgəsinə son səfərləri göstərir ki, Azərbaycanın postmünaqişə mərhələsində həyata keçirdiyi siyasət artıq “bərpa planı” deyil, dayanıqlı inkişaf strategiyasıdır.
Bölmənin digər xəbərləri
